我嘅大學生涯 (有甜): Ocamp(五)
玩下玩下已經黎到夜晚，亦都係最後一個活動。
「Campfire」
簡單講姐係成班人圍住一堆火，係真嘅火唔係假火然後係到跳舞，就好似啲食人族一路燒野食，一路跳舞慶祝自己今日所得到嘅獵物。
利申未做過食人族，都係鳩up的。
我唔知點解要咁做，聽佢地話咁樣好青春，好浪漫，好熱血，而我一啲都感受唔到。
嘛，總有一啲浪漫係我地唔識欣賞，但人地識。
就好似有啲人會大費周章咁堅持每日煮飯，有啲人寧願收工買兩餸飯一樣。
不過大家都好用力咁跳，甚至仲有人感動到喊，而我咁啱見到Bella，佢只係好感傷咁企係隔離望住呢堆Year one嘅學生，傻下傻下咁。
佢今年其實都已經Year four，姐係話已經無機會再玩同再搞Ocamp，所以我都明白點解佢會咁失落。
或者Ocamp代表嘅只係一班啱啱投身到大學嘅後生仔女，可以暫時完全咁放低學業，好好咁玩一場，識一啲以前無接觸過嘅同輩，甚至做好朋友。
又或者有啲人只係將Ocamp當係食仔食女嘅地方，將迎新營變做破處營，甚至吸毒營。
但我相信，Ocamp帶比大家，咁多嘅係年少多好。
我企起身，行到去營火個邊同大家一齊跳，雖然無佢地跳得咁勁，但有啲野有心就夠，唔一定要做啲好。
Bella：「估唔到你都黎跳喎。」佢行咗去我隔離。
我無理佢，只係好似隻馬騮咁繼續跳。
Bella：「你仲嬲緊我琴日講嘅野...？」
我：「無嬲，只係唔想同你講野。」
Bella：「你唔好嬲啦，我請你食粒棉花糖啦。」佢唔知係邊到變咗粒棉花糖出黎塞落我個嘴到。
我：「你想點呀？你都識講我做唔到佢，咁你宜家又要埋黎我到，我假野黎架咋，你走開啦。」
Bella：「咁你做唔到佢，咪試下做自己囉，我覺得你個人本身都已經好好，唔洗一定要似佢。」
我：「我好好？乜你好了解我咩？」
事實就係我連自己都唔了解，你點講得出話你了解我？
Bella：「係呀，我唔了解你呀，但係我鍾意你呀嘛。」
我停低咗馬騮舞，而佢只係好無力咁坐咗係地下，望住啲火。
我：「你鍾意我...？」
Bella：「唔係...應該講我鍾意嘅係佢，但係你地實在太似，令到我不由自主咁鍾意咗你...」
Bella：「但係我唔想鍾意佢，所以我叫你唔好好似佢咁樣，做返你自己，因為我唔想再鍾意多次佢，或者一個好似佢嘅人呀。」
佢想走，但係比我攬實咗。
我：「咁我問你一次，你鍾唔鍾意我？」
佢望住我諗咗好耐，最後答咗兩隻字。
「鍾意。」
我：「咁…你願唔願意比啲時間我？」
佢點點頭，再係個胸到拎粒棉花糖出黎再塞落我個口到。
嘛，一時同太多女仔搞埋一齊，我都要諗下自己到底想點。
結果呢個時候，Hidy行咗過黎。
Hidy：「阿燕...？Bella...？」
Bella：「Hidy？你又係到嘅？食唔食棉花糖呀？」
Hidy：「我唔食啦，同埋唔阻你地，走先。」
我私心其實有諗過Hidy，佢同我搞過野，呢2日都不斷幫我。
但係我感覺佢呢種女仔到最後唔會係一個好情人。
喂咪住先，點解我無啦啦會係到諗揀邊個做女朋友，明明我根本唔需要呢樣野。
男女朋友係一個身份，當呢個身份基建於口頭承諾之下，呢個身份嘅意義同朋友，甚至同學同事都無分別。
返到屋企之後，我沖完涼就直接瞓到第二日夜晚六點，證明我係有幾攰。
我拎部電話諗住叫外賣，先發現阿蓉不斷打電話比我。
而佢宜家又打黎，我本身想繼續唔聽，但佢阻住我叫外賣，所以都係聽咗。
我：「喂...？」
阿蓉：「你去咗邊呀？！我地個嗰都入哂camp啦！！」
我即刻望一望個月曆，仆街原來今日係佢地個Ocamp，而我一玩完Dan Soc個嗰就無咗件事。
我：「Sorry呀，我琴日玩完Dan Soc個Ocamp太攰，我諗我黎唔到啦。」
阿蓉：「有無搞錯呀！我係你女朋友黎架！女朋友搞嘅Ocamp都唔黎，你有無諗過我感受呀？！」
我：「咁我真係好攰呀嘛，琴日跳舞跳咗幾粒鐘呀。」
阿蓉：「我唔想同你講野呀！」
佢cut咗我線，無諗到一起身就會搞啲咁嘅野，我太攰唔去玩姐，唔洗鬧咁嚴重呀嘛。
我嘗試打多次電話比佢，但佢唔聽，咁我都繼續叫我嘅外賣。
老實講唔係佢打黎我都未必記得阿蓉呢個人，琴日個Ocamp已經一下子令我識咗起碼二十個人。
同埋想講就係我無住Hall，我報咗但係佢話我住得近學校所以唔比我住，如果唔係我應該瞓都唔洗瞓。
Hidy：「各位呢2日玩得咁開心，我地唔係唔Reu呀嘛！」
Reu即係完咗Ocamp之後，成組人再出黎玩，例如食個飯，去Party room。
不過我覺得呢樣野無乜意義，正如我之前所講嘅一夜情一樣，個晚完咗就係完咗，仲留戀想有下次係無意思。
而且之後同佢地都唔知唔知會唔會再見，好多人會出現係你身邊，但有幾多人真係會陪係你身邊？
所以都係再講啦，我只係開始期待第一日上堂會係點。