我嘅大學生涯 (有甜): Ocamp(二)

啲人話Ocamp係睇樣，我都好認同呢個講法，因為我宜家呢個Ocamp都係。
 
雖然我覺得佢地已經一早揀過，但再靚仔啲嘅隔離接近全女，再靚女啲隔離就全仔，所以學袁國勇咁講
 
對唔住，物競天擇，你生得唔夠靚就係要過身。
 
而我，明仔同麻呼三個係呢個Ocamp算係比較熟，因為淨係對佢地有印象，玩咩game都揀佢地一組。
 
而宜家佢地玩緊一隻game，每組要派兩個人出黎，一個人公主抱起另一個人，跟住跑到終點線。
 


咁一班狗公就當然衝出黎，展示一下自己二頭肌同三頭肌。
 
Hidy：「你地有無人玩呀？」之後就靜咗，因為之前都玩咗唔少game，大家都開始有啲攰。
 
Nathan：「阿燕同麻呼啦，我知你地頭先有好多game都扮哂野唔玩呀，宜家快啲搞掂佢。」
 
迫於無奈同比其他人係到噓，我同麻呼行咗去起點。
 
麻呼：「你得唔得架啦，我驚我一陣會掉低喎。」
 


我：「我都諗緊我抱唔抱得郁你，你咁...瘦」佢個樣即刻好似想殺咗我咁。
 
Bella：「各位騎士可以抱起你地嘅公主啦~」
 
我隻右手擺落佢隻腳下面，隻左手托住佢背脊，好彩我都夠力抱起佢，但實跑唔郁。
 
Bella：「OK！3、2、1，GO！！」
 
仆街，其他男仔一支箭咁跑過去終點，個距離大約十米到，而佢地個嗰都好似想拎第一，最後係個終點線撞埋哂係一齊，全部人掉哂落地。
 


結果，得返我呢個仲係到行嘅人，都唔知開心定唔開心好。
 
我望一望麻呼，佢亦都望住我，我同佢就好似係結婚典禮咁樣，直到我抱住佢慢慢咁行到去終點。
 
Bella：「實在太感動啦...我以後見唔返呢個畫面點算...我宣佈第八組贏！！」佢係到拍手，其他人又跟住拍手。
 
有人問佢點解會係我贏，明明我係包尾個嗰。
 
Bella：「人無事先做到世界第一架嘛，你地啲騎士為咗贏，唔好好睇住個公主搞到佢地受哂傷，唔配贏呀。」 呢個說法又好似說服到佢地。
 
我好開心咁望住麻呼，因為我無諗過咁都有得贏。
 
麻呼：「你肯放低我未...」佢塊面有啲紅，眼甘甘咁望住我。
 
我：「想一世都唔放架喇。」


 
我再次用甜言蜜語去呃一個女仔，呢樣野已經變成我嘅護身符，對住邊個我都講得出，除咗肥妹加樣衰。
 
食飯個陣，我見到阿蓉搵我。
 
阿蓉：「BB你宜家得唔得閒呀？」
 
我：「食緊飯。」
 
阿蓉：「我好掛住你，不過個Ocamp好唔好玩呀？」
 
我：「好玩呀，仲有好多靚女添，我以前都唔知原來大學咁多靚女，組媽都好正。」
 
阿蓉：「喂呀，唔準睇其他女呀！你咁樣我會嬲架！」
 


我：「知啦，我個阿蓉先係最靚個嗰。」
 
我呢個人有兩套，講一套同做另外一套。
 
阿蓉：「唉，睇黎遲啲個Ocamp要好好睇住你先得。」
 
我無再覆佢，因為麻呼夾咗舊雞想餵落我個口到。
 
麻呼：「邊個搞到你食飯都要係到睇電話呀。」
 
我：「我阿媽咋嘛，擔心我係到比人蝦。」
 
麻呼：「你阿媽真係諗多咗，明明你先係蝦人個嗰。」
 
我：「我邊有蝦人喎。」我搭住佢膊頭再講。


 
麻呼：「最叻咪蝦我囉。」
 
明仔：「喂你兩個好啦喎，好停止一下自己嘅行為，請留意下其他人仲食緊飯架。」
 
我：「其他人咪得你一個，個嗰都去哂玩，得我地三個仲係到食飯。」
 
無錯，我地個組啲人已經唔見哂，懷疑有幾個都唔知係咪已經去咗扑野。
 
麻呼：「話時話，明仔你係咪對阿贏有興趣呀？」佢聽到之後即刻噴飯。
 
明仔：「邊…邊有呀…」
 
我：「仲扮，一開始係到問人地對邊個有好感，跟住玩game個陣成日行埋去佢到，傻嘅都知你沉佢啦。」我同麻呼係到笑佢。
 


明仔：「係呀，佢跳舞個樣真係好吸引我呀嘛。」
 
麻呼：「咁你就去馬啦，唔去遲早比人搶先一步呀。」
 
明仔：「我盡力啦。」
 
時間黎到夜晚，作為一個淫亂嘅Ocamp，一定唔少得嘅就係玩酒game。
 
當你一醉咗嘅時候，個處女膜就唔使旨意留得低，實會有人執屍。
 
Chris：「聽枚，五、五、五，飲啦羅拉。」
 
Fuck boy真係Fuck boy，睇得出真係成日出去蒲，玩個五五枚都勁過人。
 
塊面已經紅哂嘅羅拉拎住杯溝咗橙汁嘅Vodka，好似驚再飲就準備瞓低。
 
Hidy：「羅拉唔得啦，塊面仲紅過麥當勞叔叔呀，阿爸頂啦。」佢拎走羅拉個杯比Nathan。
 
Nathan：「係嘅。」佢一口氣就飲哂杯Vodka。
 
而我好驚自己醉，每次輸都係飲少少扮飲咗，佢地掛住玩又無留意到。
 
Hidy：「既然大家都有啲進入狀態，不如我地玩Truth or Dare？」我見到佢打一打眼色比Nathan。
 
Nathan：「就咁話啦，但如果邊個揀真心話又答唔出，或者揀完大冒險又唔做嘅話，就要飲一shot齋lit 。」