【愛情】拜托，別再見: 29

第二日嘅我行程好緊密，其實都係番學校嘅輔導班同番餐廳番工

「我今日番餐廳番工呀⋯」我喺行出學校門口嘅時候輕嘆一口氣，「今日係全日工作⋯」

「眨下眼就收工啦～」程栩顥拍一拍我嘅背安慰我，「同你食嘢？」

「唔洗啦，陣間番到餐廳先食。」我搖搖頭，已經諗緊陣間番到去叫咩食好

我同程栩顥行到去學校外面嘅行人路，我諗住行去小巴站小巴番去餐廳，所以同程栩顥應該唔同路





行到去斑馬線嘅分岔口嘅時候，有一個人影喺我嘅餘光快速閃過

「姐姐！」我比突然撞過嚟嘅人撞到一個踉蹌，我都未反應過嚟就比人一手扶住膊頭一手托住手踭

喺企穩嘅瞬間我望到程栩顥懸喺半空嘅手同愣住嘅表情，喺我抬頭之際對方鬆開咗我，我一抬頭就對上潘煦言嘅嘅笑臉

「你喺度嘅⋯？」我一時間都愣住咗，訝異佢會喺呢度出現

我嘅手臂貼住佢嘅胸膛，佢身上散發住止汗劑嘅味道，但有邊個牌子嘅止汗劑係棉花糖一樣嘅甜味⋯？





「啱啱同同學食完嘢～」潘煦言向後行一步，同我保持少許嘅距離，「你喺度嘅？同朋友去食嘢呀？」

「番完學校嘅功課輔導班，打算番餐廳先食⋯」我仍然未喺訝異嘅情緒中出嚟，下意識望向程栩顥

潘煦言順住我嘅目光望向程栩顥，佢地兩個人對上視線，程栩顥嘅目光有啲冷漠，潘煦言微微抬起下巴，嘴角微微翹起嚟，友善禮貌嘅微笑夾雜住一絲雜質

「下次我地再一齊食晏啦。」程栩顥先一步收回目光，視線落喺我身上後對我微笑道

我可以感覺到氣氛中嘅異常，唔係劍拔弩張嘅氣氛，而係好似一條橡筋拉扯到盡頭嘅緊繃，眼前兩人嘅對視搞到好似有咩大件事要發生一樣⋯





「哦好呀⋯」我有啲不知所措，連微笑都變成咗尷尬而不失禮貌嘅微笑，「咁下次見啦⋯」

「拜拜。」程栩顥點一點頭就轉身往車站嘅方向行

「你打算搭咩車番餐廳呀？巴士定小巴？」潘煦言嘅手喺我眼前揮一揮

「小巴啦。」我回神一樣抬起頭望佢，佢臉上掛住笑容

我同佢並肩行到小巴站，比我高嘅佢企喺我隔離啱啱好可以擋到太陽，啱啱嗰個唔知稱唔稱得上係擁抱嘅擁抱令我到呢刻都有啲反應唔切

我唔會討厭或者抗拒，只係就算係我同程栩顥咁熟都唔會做到呢個地步，所以有啲⋯意外⋯

「嗯？」潘煦言察覺到我停喺佢身上嘅目光，微微側頭

「冇嘢。」我將所有想法都往下壓，搖搖頭





「陣間番去食咩呀？諗好未呀？」潘煦言見我一直冇講嘢就主動撞一撞我打開話題，「你唔開心呀？」

「吓？」我都未嚟得切答作前半句，就比佢後半句剎咗個措手不及，「冇呀⋯我做咩要唔開心？」

「啱啱你朋友喺度呀～」潘煦言帶住笑容道，我覺得呢句說話只係前半句，應該仲有後半句

「咁都冇關係㗎⋯？」我有啲不解，露出禮貌嘅微笑，「只係嚇親⋯」

潘煦言半信半疑，仲要探頭望我睇下我係唔係真係冇嘢，我一臉認真咁抬眼瞄佢一眼，一對上佢嘅目光我就想笑，於是我撇開臉迴避佢嘅視線後嘴角先上揚起嚟

「仲笑！」我聽到潘煦言輕哼一聲，我望過去見到佢理直氣壯咁抬起下巴，「陣間佢係你男朋友，話我搞到你地分手咁點算呀！我都啱啱先諗到⋯」

前一句仲理直氣壯咁抬起下巴，下一句又冇咗氣勢，前後嘅反差令我有啲懷疑佢係唔係都未諗清楚自己要講啲咩？不過係有啲可愛





「冇男朋友，我都想有！」我比佢嘅反差逗笑，我伸手對駛緊過嚟嘅小巴揚一揚手

小巴喺站前停車，但睇嚟剎車剎唔必仲要向前再移咗半米，我行前幾步上車，坐喺門隔離嘅位置靠住窗坐

潘煦言拍完八達通，向後行兩步坐喺我隔離，佢一坐低我就見到佢明顯嘅笑意

「笑咩？」我有啲好奇佢嘅笑容嘅意思

「嗯？冇呀，心情好咪笑囉～今日天氣好好～」潘煦言嘅手指住外面猛烈嘅太陽

「你係會比天氣影響心情嘅人嚟㗎咩？」我輕笑一聲，側側頭望向車窗外，陽光啱啱好曬到我呢個位

我提起手擋喺額角擋住太陽嘅光線，手背已經比太陽曬到有啲熱

「係呀，我都會比天氣影響心情～」潘煦言嘅聲線完全冇辦法遮蓋住佢內心嘅高興





小巴開得快，都唔知有冇坐到5分鐘就落車，坐近門口嘅潘煦言先一步落車，佢企喺行人路上等我

「今日陽光好猛，就嚟溶啦⋯」潘煦言嘅雙手擋喺眉上面遮太陽

「快啲行去商場，唔得啦真係⋯」我連忙加快腳步，至少喺樹蔭之下會有少少風

「你做咩咁有閒情逸致番學校幫人做功課輔導班？」潘煦言忽然提起呢件事，「平時叫你番工又唔見你番。」

「學校嘅功課輔導班都係一星期一日，餐廳嘅話我番三日！」我露出震驚嘅表情，震驚嘅係我一星期番餐廳居然番足三日

「哦～真係好多～」潘煦言恍然大悟，但睇起嚟下一句係都唔夠佢番得多

我行入商場踏上電梯，企嘅級比潘煦言企嘅高一級，我原地轉咗90度，可以望到潘煦言亦可以望到電梯到頂未





「仲唔夠多咩？我覺得好多啦～」我嘅手攬住我袋番工衫，朝潘煦言側一側頭

就算比佢企高一級，我都好似冇高過佢，只係視平線同佢好似變到差唔多水平，但喺電梯隔離嘅鏡面可以睇到我都係冇佢咁高

「但你番學校嗰度係唔係有錢收？」潘煦言問

「冇，我係義工。」我嘆氣搖頭，不過我覺得冇咩所謂，都係3個鐘啫

「義工你都做？」潘煦言拍拍我，指住前面變緊平路嘅梯級

「同你補習都係義工⋯」我聳肩

「但係我有回報可以比你！而且我話咗以後賺到錢會還番比你！」潘煦言即刻認真咁講

「我會記得追你找數㗎啦～」我附和佢，佢只係開心咁笑，「以後記得還比我呀～」

「我應承咗你就唔會走數啦！」潘煦言先我一步行入餐廳，「咁你以後要同我保持聯絡先追到筆補習費！」

「好好好，盡量啦～」我有啲敷衍咁點頭，畢竟以後嘅事邊個知？




IG Link: https://www.instagram.com/nd_cotttoncandy/?hl=zh-tw