【愛情】拜托，別再見: 06
星期三
我行去巴士站，未行到嘅時候離遠已經見到程栩顥喺度
今日同程栩顥約咗一齊食晏，因為我陣間要番工，佢亦有佢嘅補習兼職要做，所以我地約好食完晏就各自上班
「我到啦！」我喺離程栩顥仲有一步距離嘅時候，選擇咗跳一小步到佢隔離
「計得咁準嘅你？巴士差唔多到你就嚟啦。」程栩顥將手機收起
「我呢啲叫準時。」我點點頭
「你又話星期三冇報更番工嘅？」程栩顥問我
「本來我今日的確係冇報更番工，但係琴日經理突然打比我問我可唔可以加更番晏晝，本來我都有啲猶疑，但比經理再三游說，我都係揀咗番工⋯」諗起都有啲無奈，我覺得我對番工嘅責任感太重，唔好意思拒絕經理
喺巴士嚟到上車之後，我同程栩顥行上上層嘅座位坐低
「我想講我隻腳仲係好痛，已經痛咗幾日⋯」我將手㩒住喺膝頭上，明明已經過咗幾日，但我對腳都係未完全恢復
今朝早起身嘅時候，都仍然有種對腳唔係自己嘅感覺，實在難受⋯
「你做多啲運動啦，就係因為你成日都唔做運動，所以先會腳痛。」程栩顥理直氣壯咁教訓我
「你有做好多運動咩？你咪又係日日喺屋企灘⋯」我反駁佢
「還好啦，至少唔似你腳痛咁多日。」程栩顥嘅腳踢咗我一下
我冇理佢，只係默默咁望咗佢一眼表達我嘅不滿，然後打開IG開琴日睇到嘅一個po比佢睇
「睇下呢個，下次食唔食呢間？」我問佢
「咩嚟？」程栩顥靠過嚟睇，伸出指尖撥我嘅螢幕，「泰國菜？好呀，想食就下次食囉。」
佢一靠過嚟我就聞到洗衣液嘅香味，平時他去幫小學生補習嘅時候都係咁樣著，好簡約但又唔會係頹look，有時著T-shirt，有時係裇衫搭件T-shirt
程栩顥嘅成績好好，幫人補習都好啱佢，因為佢教人都會好有耐性，會慢慢講解比時間你去理解同消化
「仲有呢間，之前睇咗但都一直冇試。」我搵出另一個po出佢睇
「下次試，你send出嚟啦。」程栩顥道
程栩顥睇手機嘅時候睇到好笑嘅嘢，將手機遞咗比我睇，我send喺group嘅po好快都得到遠菁嘅回應
我同程栩顥喺落車之後揀咗間以前番學嗰陣成日食嘅茶餐廳，我地行咗去旁邊嘅卡位坐低，呢個時間人唔算太多
「睇下食咩先～」程栩顥將餐牌打橫放喺我同佢之間，等我都可以睇到餐牌
我望住餐牌，諗緊要食常餐定係食份三文治算，心大心細都唔知食咩好
「你食咩呀？」我喺決定前抬頭望程栩顥
「食常一。」「嗨～」
程栩顥回答我嘅同時，有個人影喺我地嘅枱邊突然出現，我可以感覺到佢嘅視線落喺我身上
我地兩人同時抬頭，企喺度打招呼嘅原來係潘煦言，佢身上仍然著住校服，我望向後面枱嘅時候見到另外幾個都著住同一間學校嘅校服
「嗨，放補課呀？」我禮貌咁微笑回應佢
「嗯！」潘煦言帶住笑容點點頭，視線落喺程栩顥身上一秒又望番我，「我地陣間喺餐廳見啦～」
我點點頭，程栩顥喺佢行開嘅時候將手機遞比我睇，佢已經用code落咗單
「你幫我嗌咗啦？嗌咗咩呀？」我呢一刻先反應過嚟，我仲未講比程栩顥聽我要食咩
「常一，凍奶茶，免得你又三心兩意諗十分鐘都諗唔好要食咩。」程栩顥耷低頭睇手機，但我都係睇到佢嗰個無奈嘅眼神同笑容，「夠了解你嗎？」
「夠，最了解係你⋯」我順住佢嘅說話點點頭
「啱啱嗰個係餐廳同事？」程栩顥回頭望一眼番到同學身邊坐低嘅潘煦言
「嗯，就係我之前同你講嗰個男仔。」我微微點頭，我同程栩顥比較多話題，所以平時咩都講
喺同程栩顥嘅視線錯開嘅瞬間就見到潘煦言又擰轉頭望我一眼，對我露出佢嘅陽光笑容
「睇起嚟好細個，雖然都幾高。」程栩顥將餐牌放番喺一邊
「F.5， 都唔係真係好細個。」我思考咗半秒之後回答，「細我地兩年。」
程栩顥睇起嚟冇咩太大反應，不過都好正常唔係咩？佢繼續耷低頭睇手機，偶爾我地會講幾句
我同程栩顥單獨一齊食嘢嘅次數都幾多，所以都唔會覺得太尷尬，而且我地都幾熟，大概係因為之前F.4嘅時候有一次小組討論，我、佢、遠菁同關澤文都喺同一組，嗰個學期都一齊坐所以先會熟起嚟
店員將兩碗常一嘅沙嗲牛肉麵放低喺枱上，接住又拎咗兩份奄列過嚟放低，程栩顥伸手將其中一碗先推到我面前，奄列都先放喺我面前，順手拎隻叉擺低喺奄列上面
「唔該～」我拎起叉先食奄列
雖然奄列係好食，但我果然都係唔中意食火腿，食咗半份就唔想食，我都唔知由幾時開始我唔中意食火腿⋯我都係食咗塊多士先啦⋯
「你又食剩半份⋯」程栩顥將碗放到空碟上嘅時候瞄到我嘅碟上被拋棄嘅奄列，「火腿係做錯咗咩事？」
「唔中意食火腿⋯」我扁起嘴，用叉輕輕咁戳咗奄列兩下，「你食嘅話就食啦。」
「我又做錯啲咩要食剩低落嚟嘅奄列？」程栩顥雖然口喺度抱怨，但都係將嗰半份奄列拎咗去面前消滅
「唔知以後仲有冇機會可以咁樣一齊食早餐呢。」我問程栩顥
「應該，都有嘅。」程栩顥先係挑起眉，然後又笑道，「唔會上到大學就絕交嘅～睇下夾到咩堂囉，夾到堂咪食，食晏都得㗎啫。」
認真一諗又好似係，我地唔會因為上到大學就絕交，但唔知點解有啲怕我地幾個以後會疏遠，慢慢就唔再聯絡，會變成只係讚好IG po嘅關係
「唔好諗咁多啦，我地唔會走散。」程栩顥只係咁樣講咗一句
聽到佢咁講我就忍唔住一笑，真係好似佢會講嘅嘢，一句就會令人打消所有疑慮
IG Link: https://www.instagram.com/nd_cotttoncandy/?hl=zh-tw