【愛情】拜托，別再見: 05
我一番到屋企沖完涼，一灘落床就可以直接痴住喺床唔郁
灘咗都冇10秒就收到一個message：「你到底睇咗有咩game未？」
係喎，我應承咗潘煦言要睇下買咗咩game，可以嘅話就同佢一齊玩，差啲都唔記得咗⋯
「睇咗幾日都未睇到⋯唔可以咁㗎⋯」佢又send咗個message過嚟
「我啱啱先灘落床10秒都冇⋯」「緊要咩？你應承咗我睇完影比我，結果人呢！？」
我真係唔想起身，但唔起身嘅話又拎唔到switch⋯
「哎呀～」我灘多咗兩秒後都係忍住酸軟感坐起身，「睇啦⋯」
打開switch之後我影咗主頁比佢睇，免得佢話我言而無信，我其實都已經好一段日子冇開過機玩啦
Send出去嘅圖喺兩分鐘內就有回覆：「加我朋友呀，晏啲玩唔玩？」
「你收工啦咩？」「未呀」
「晏啲未瞓著就玩啦，今日踩完單車，成個人都好似碎咗咁⋯」「好啦TAT你唔好瞓著」
「我都好難控制瞓唔瞓得著，可能轉個頭就瞓著咗」「提提你，你聽日係要番工㗎，係番早㗎」
「唔好提醒我⋯」「唔好唔番工，我會提你」
睇起嚟宜家餐廳都幾得閒，潘煦言仲可以咁悠閑咁拎住手機同我傾計，係真係得閒到冇嘢做
我冇覆佢，拎住手機大字形咁灘喺床上面，我覺得我成個人都已經比張床黏住分唔開
灘下灘下，意識愈嚟愈迷糊⋯最後我都係瞓著咗，到我醒嘅時候已經係清晨6點，手機仍然喺我手上
「哎⋯」我艱難咁坐起身，拎起手機就見到潘煦言send咗好多個message比我
「我收工啦收工啦」
「我沖完涼啦但你人呢？」
「瞓咗啦？」
「太過份啦TAT拋棄咗我！」
「聽日番工見啦，晚安啦」
「啱啱瞓醒，好好瞓」我覆咗一句，我諗今日番到餐廳嘅時候絕對會比佢控訴
我將手機放去叉電，再瞓多兩個鐘就要起身準備出門口番工，我宜家就連企喺度都覺得腳好痛，番餐廳嘅話仲要成日行嚟行去，痛上加痛
「嘩⋯實在太過份啦⋯」潘煦言好快就覆咗我，「我等咗你成晚呀⋯」
「你通宵冇瞓所以可以覆我覆得咁快？」我望住佢send出嚟嘅哀怨表情貼圖笑咗出嚟
「係呀⋯我太可憐啦⋯」佢又回覆我，「食唔食早餐？請我食早餐」
佢真係諗得開心，仲想我請佢請早餐⋯
我拎起手機默默回覆咗一句「我會買早餐，但冇你份」然後放低手機番上床瞓多陣，等鬧鐘響嘅時候先再起身，如果唔係我怕我企喺餐廳一直打喊露
⋯
我宜家覺得我嘅手手腳腳都唔係屬於我自己，有氣無力咁行到商場門口係靠我對番工賺錢嘅責任感
「早晨！」喺我伸手要去推門嘅時候，一隻手喺我嘅手旁伸出嚟先一步將門推開
唔洗擰轉頭就知道呢個人係潘煦言，不過我都係慣性咁擰過去望咗一眼
「早呀。」我望住佢朝氣勃勃嘅樣，忽然覺得更加攰，呢個人係唔係已經提早適應緊社畜生活？
「琴日踩完單車今日就番工啦？」潘煦言笑問我
「係呀，我宜家全個人都好似散咗咁⋯」一聽到我就覺得全身嘅酸軟感又湧出嚟
「你買早餐有冇預我㗎？」潘煦言一眼就望到我手上拎住嘅M記袋
「冇呀，我買咗自己嗰份咋。」我笑道
「估唔到你係呢種咁冇良心嘅人，琴晚又甩我底，今日買早餐又冇我份⋯」潘煦言扁起嘴，我有時懷疑佢有發現自己有啲可愛所以先係咁
潘煦言係有啲活潑又有啲陽光嗰種人，有時會喺無意識間撒嬌，但唔會令人覺得討厭，身邊嘅同事都話佢幾可愛，可能係因為佢嘅外表唔錯再加上係年紀最細嗰幾個，自然會深受姐姐們嘅喜愛
「下次囉，下次！」我踏上電梯梯級後轉身同佢講
「你下次幾時番工番早？」潘煦言一臉懷疑，「你其實好少番早⋯」
我擺出苦惱嘅表情，其實我都唔知我下次番早會係幾時，因為我唔太中意早起身
「你之後讀U仲會唔會番呢度？」潘煦言轉話題嘅速度有啲太快，「定你會辭職？」
比佢咁樣一問，其實我都冇諗過會唔會繼續番呢個問題，因為呢度都只係兼職，所以番工嘅次數都冇太多限制，番同唔番對我嚟講又冇咩影響
「應該都會繼續番，我番開呢度，所以都會繼續番。」我有啲遲疑咁點頭，「睇下啲堂點樣再決定啦～」
「咁就好啦，幾驚連你都要走⋯！」潘煦言一副鬆一口氣嘅模樣
「最近有人要走咩？」我有啲疑惑，最近都冇聽到邊個同事話要走唔做
「冇呀，不過都擔心下嘛，都一齊番咗咁耐，都會有啲唔捨得。」潘煦言輕嘆一口氣
「可能係你先辭職唔做呢～」我無奈笑道
「吓？唔會囉！」潘煦言即刻反駁，「我都想考到大學呀⋯！」
「幾時開始補課呀？」我好奇一問，我F.5嘅時候都成日有補課，都係番去做下卷
「星期三，番半晝⋯」潘煦言嘆氣，「所以我報咗更，打算放咗補課再番嚟番工⋯你星期三又唔番！」
「下星期三我有報更，睇下佢編唔編我。」我即刻安慰佢
有時我都會覺得佢係真係幾可愛，只係單純覺得佢可愛，難怪其他同事都咁中意佢
「我會同經理講叫佢記得編你番工。」潘煦言笑道
「咁我希望佢到時已經夠人番工唔洗我。」我伸手輕輕撞咗佢一下
宜家先朝早準備開工，都唔知幾時先收工，希望今日唔好咁忙啦～
IG Link: https://www.instagram.com/nd_cotttoncandy/?hl=zh-tw