F4嗰年，我的太陽出來了: 乖啦唔好扁嘴

【盧愷玥視角】 

「*」：請去「雜崩冷介紹」！ 

——————————————————

 「鈴鈴鈴鈴鈴鈴！」

 「起立！各位同學再見！」 





終於畀我頂到放學。我要離開呢度，呢度只會令我不停亂諗嘢。

今日放學之後，我約咗蓮姐一齊去大快樂* 食嘢，當然就係要順便講吓八卦㗎啦⋯⋯嘿嘿嘿，終於嚟到我同蓮姐嘅二人世界時間喇⋯⋯我快快手執好書包，行去佢個位側邊。蓮姐執緊嘢嘅同時，同隔籬位有講有笑，完全冇留意到我出現咗喺佢隔籬。

哎呀，咁我係咪應該行開啲呢？阻住佢兩個講嘢又唔係幾好⋯⋯

突然，蓮姐褪後咗一步，於是就發現咗我嘅存在。佢擰轉頭問我：「乜你執嘢咁快嘅？」

「為咗話你執嘢好慢。」我踎低望實佢。





唔講大家可能唔知，雖然蓮姐氣場一米八，但實際上身高得156。嗱，我有163㗎，我高佢 7cm 㗎，咁我話佢矮都合情合理啦，係咪先。

「同我企返起身。」

蓮姐使出手刀，一嘢劈咗落我個頭度。唔記得講，當我話佢矮嘅時候，就一定會俾佢打。雖然唔痛，但綜藝效果始終都係要做嘅，唔痛都要扮痛。

「哎呀，好痛啊⋯⋯」我抱住個頭呻吟。

「扮咩嘢喎，我都冇出力。」蓮姐指住仲踎緊喺度嘅我，同佢隔離位講：「唔使理佢，佢傻傻哋㗎。」





搞錯啊，咁樣話我，你知唔知我會好傷心㗎——人哋可以點答你喎，實淨係識 kam 笑啦⋯⋯我抱住無奈嘅心情岳高個頭，結果⋯⋯

「哈哈哈哈，你兩個好fun⋯⋯」

條友都笑得幾大聲吓。之但係，佢笑點會唔會有啲太低？

/

「我同你講，佢真係自己友嚟⋯⋯佢鍾意南南* 㗎！好 taste！雖然我都係鍾意我個仔多啲⋯⋯」

「南南即係邊隻？黃色嗰隻？」

「橙色嗰隻啊！黃色嗰隻叫檸檸*！」

跟住，蓮姐又開始係咁講佢個仔。唔講笑，佢份人真係好專一——佢嘅書包、筆袋、鎖匙、電話繩全部都掛咗提提嘅吊飾，更加唔好講嗰啲電話殼、電話 wallpaper、IG 頭像、Whatsapp 頭像、Threads 頭像⋯⋯全部都係提提⋯⋯





「唉，你就好啦，咁快同人哋傾到計⋯⋯又係你R人吹水㗎？」

「唔係，係佢同我講嘢先。」

蓮姐同佢嘅新隔離位淨係識咗幾個鐘，就已經有傾有講。佢叫黃樂彤，英文名 Bianca，同我哋一樣都係今年先第一次入精英班。見佢笑嘅時候幾靚，棚牙又白，眼睫毛又長咁，仲有兩個酒凹，唔錯！

「就喺我自我介紹完之後，佢突然黐埋嚟同我講：『我都鍾意花花貓㗎！』仲 show 咗個南南襟章畀我睇。我同你講，鍾意花花貓嘅絕對唔會係衰人，所以嗰刻我就知道，佢係好人！」

「仲有一點：佢笑點好低。」

忍唔住提咗句真心話㖭。

「我同意。」跟住，佢反問我：「咁你隔離係邊個？」





「Hannah 李軒柔。我 f1 同佢一班，嗰陣時講過幾句嘢，不過始終唔係好熟。我淨係記得佢以前好細粒，同埋有啲八卦。」 「八卦啊⋯⋯」

聽到「八卦」兩個字，蓮姐個樣好似若有所思。「咁唔太好喎⋯⋯我唔係要講人哋壞話，但係你——成日都好似食咗誠實豆沙包咁，好易講曬自己啲嘢出去，都係小心啲好。」 

未識人哋就喺度批評對方，唔係太好啩？我一時間唔識反應。

蓮姐見我呆咗，即刻有啲緊張：「我知，我知，我唔應該同人哋三唔識七就喺度話佢嘅，只不過我中過伏，唔想你都中伏啫⋯⋯」

哇——好鬼肉麻！但係幾令人感動嘅，不枉我咁愛你⋯⋯

 「真㗎！阿姐我見過咁多人，點會唔知呢個世界嘅險惡啊？」

聽完呢句，我都係畀唔到答案。

「乖啦，唔好扁嘴。」佢決定伸出食指輕輕撳住我嘅櫻桃小嘴。





好嘢，竟然識氹人喇，蓮姐好嘢！我總算係笑咗出聲。

「咁就乖喇。」蓮姐見我笑返，成個人都輕鬆曬，用佢頭先壓住我嘴唇嘅手指搲我下巴，十足十玩貓。呢個時候，趁佢唔留意，我即刻耷低頭想咬佢手指。

可惜，佢縮手縮得太快。

「喂呀，你黐孖筋㗎咩！」