F4嗰年，我的太陽出來了: 多啲搵我打波

【盧愷玥視角】

——————————————————

今日係開學日，所以十一點就可以放學，但係我哋班十點半就已經派晒所有嘢。

呢個時候，班主任叫我哋自我介紹：「距離放學仲有啲時間，不如你哋嚟介紹一下自己，畀啲同學認識一下你哋。」然後佢就按住學號逐一叫啲同學起身。

數吓先，我係十七號。十八、十九、二十⋯⋯所以曾同學係二十一號。幾好，我仲有啲時間做吓心理準備——唔好問點解要做心理準備。





度完要講乜嘢之後，等咗一陣就輪到我——十七號佳麗盧愷玥，芳齡十五歲，志願係成為⋯⋯冷靜啲，冇理由講埋啲咁黐線嘅嘢㗎？

「大家好，我係盧愷玥 Cathy，平時鍾意打排球，將來想教小朋友打排球。Thank you。」

講得幾好！Nice！

跟住就到蓮姐上場。佢企咗起身，清一清喉嚨就話：「大家好，我係雷泳嘉 Evelyn！我鍾意嘅卡通人物係花花貓嘅提提！」

有啲人發出咗「喔——」嘅叫聲。





頭先我仲話自己講得好好喎⋯⋯明明蓮姐呢種可以引起人哋注意嘅自我介紹，先至係好嘅自我介紹⋯⋯

哎呀，擅長溝通嘅人就係特別唔一樣⋯⋯我哋 f2 識嗰陣，都係佢主動同我講嘢，我先會有同佢交流嘅機會。再之後，都係佢搵我一齊食飯、一齊做 project、一齊出街，我哋先會越嚟越熟。於是者，我哋就過上咗幸福美滿嘅日子⋯⋯講笑，我哋冇結婚。不過我哋成為咗好朋友！

反正佢唔會知道，我就姑且喺心裏面多謝吓佢啦。畢竟，如果唔係佢主動嘅話，我哋都唔可能咁熟。

回過神來，又有幾個人完成咗佢哋嘅自我介紹。咦，咁而家去到邊個？

係我咁樣諗緊嘅時候，我好似見到右邊有個人影企咗起身⋯⋯唔通，唔通，咁快就到佢？！等陣先，等陣先！我仲未做好心理準備㗎！等陣啊⋯⋯





「我叫曾天陽 Brian，鍾意打籃球。大家可以多啲搵我打波！」

跟住佢就坐低咗。 吓，我仲未做好心理準備喎⋯⋯喂呀，未開始已經結束？

但係佢把聲幾好聽。頭先同佢講嘢嘅時候都冇認真聽㖭，有啲可惜。同埋聽佢咁講，佢似係幾外向嘅人！唔知佢打排球打成點呢？

啊，等陣先，我唔係睇過咩？

/

事源於我哋女子排球隊偉大嘅隊長李芯桐（Sharon）同隔離男子籃球隊嘅蘇澤光（Matthew）係情侶關係。有一日，我哋女排隊進行緊恆常練習，而男籃隊因為就嚟要比賽而加操緊。喺我哋嘅恆常練習完咗之後，我留低咗陪 Sharon 一齊等佢 bb。

我同男籃隊啲人唔熟，最多就係同 Matthew 講過幾句嘢。除此之外，我仲認得嘅就只有佢哋嘅隊長——劉家永（Ken）。嗰陣時仲有個高高瘦瘦又跑得好快嘅人，但係我唔知佢叫咩名，而家諗返轉頭，嗰個人好似就係曾天陽。

等到男籃隊嘅朋友休息，Sharon 即刻攞住 Matthew 嘅水樽行去佢身邊。望住呢個場景，大家都好識做咁喺度起鬨，開始稱 Sharon 做「阿嫂」、「老婆仔」，又話 Matthew 係「阿叔」、「老公仔」，令兩位當事人羞恥到就快要打我哋。





跟住我仲加咗一句：「老婆仔你應該煲啲愛心湯水畀老公啊嘛！」

聽到呢句，Sharon 真係一拳打咗落我手臂度。不過我唔介意，我只係要將現場氣氛推到最高點。

然之後，兩位面都紅曬，同時行去對方身邊，然後攬埋咗一嚿。

哎呀，原來而家先係現場氣氛最高漲！大家齊齊讚佢哋好默契。

呢個時候，有個人——好似係阿 Ken，問咗兩位一個問題：「唔知你兩個打波嗰陣係咪都咁好默契呢？」

於是，全場又再次起鬨！經過我哋嘅請求（其實係威迫），我哋決定舉行一個小型嘅排球比賽，由老公仔老婆仔對「起鬨小隊」。「起鬨小隊」包括有我、曾天陽、阿 Ken，同埋另一個男籃隊成員王清（Liam）。

結論係——其實冇咩特別嘅結論，但係可以見到嘅係老公仔同老婆仔真係好有默契，一人死守一邊，令佢哋可以一次又一次咁接到個波。即使佢哋得兩個人，但係都打得贏我哋四個人，都證明咗佢哋好犀利！





我哋組主要都係靠我得分。咁好歹我都係打開排球嘅人，冇理由俾班打籃球嘅人帶飛啩，咁我好瘀啫？

另外就係嗰位親愛嘅曾同學⋯⋯手腳長果然係有優勢。佢真係跑得好快，嗰啲就嚟出界嘅波都係靠佢撲過去先可以接到。我係喺心底裏欣賞佢嘅！雖然嗰陣我唔知佢叫咩名。嗰陣嘅我仲幾想同佢再打多次波，再互相切磋一下㖭。

不過，而家知道佢叫咩名之後，我連嘢都唔夠膽同佢講，又何況同佢切磋球技呢⋯⋯