用AI圖寫故仔(續): 二十二．黃雀在後
你有你嗌，馬克睬你都傻，露西嘅叫陣得唔到任何回應，佢等濃煙散咗少少，開始周圍搜索。啲煙雖然遮咗視線，但係馬克都走唔出死鬥區域，搵到佢只係時間嘅問題。就講就嚟，一個黑影喺霧中彈出，快速向離開露西嘅方向逃跑。露西就係等你走出嚟，早就準備好攻擊，一個金色能量球由手中彈射而出，準確咁命中黑影。黑影慘叫一聲，竟然就咁倒地不起，露西心諗毛屌王無理由咁渣一招就死喎，唔通係扮死？
就算對方係詐死偷襲，擁有防禦結界嘅露西亦無有怕，急步衝到黑影面前，如果未死就對佢補多幾招。露西望清伏喺度嘅黑影，的確係一隻死獸人，不過唔係馬克，而係佢召喚出嚟嘅一隻獸人手下。呢班手下只係得60級，難怪會一招就無命，趁住露西俾呢隻手下引開，馬克同其他淨低嘅獸人手下靜靜轉移位置，匿咗去更遠嘅地方，只剩低露西喺逐漸消失嘅屍體旁邊暴跳如雷。
「嘥我時間，俾我搵到就要你死無全屍！」露西咬牙切齒咁一次又一次擊殺跳出嚟嘅黑影，但係每一次都只係獸人手下，而馬克嘅真身依然鬼影都唔見。召喚出嚟嘅獸人手下數目有限，總會死清光，馬克明顯係喺度拖時間，究竟係等乜嘢？係想等伊麗莎復活返嚟再加入戰團，定只係單純喺度苟延殘喘？露西唔知道，只係越殺越起勁，邊殺邊破口大罵，反正就算伊麗莎再同馬克使出合體技，仍然只會俾防禦結界擋住，改變唔到任何形勢。
十幾分鐘之後，捉迷蔵去到盡頭，黑色能量球打中最後一隻獸人手下，終於只剩低馬克同露西進行困獸鬥。正當露西金晴火眼留意住馬克嘅動靜，身邊突然傳出一陣猛獸嘅吼聲，然後一道黑焰直撲露西，好在防禦結界自動啓動，即使周圍土地全部燒到焦黑，露西依然毫髮無損。喺佢面前出現嘅，係一條四腳著地嘅巨大飛龍，而飛龍背上就有一個全身厚重鎧甲嘅騎士，正正就係另一個世界級首領，終極魔龍騎士。
「嘩！大佬，你仲有無慢啲添呀？」見到終極魔龍騎士出現，馬克終於離開遮蔽物現身，向佢大聲投訴。
「哈哈，唔好意思，估唔到一路跑過嚟原來咁嘥時間。」終極魔龍騎士一副輕佻嘅口吻，同角色嘅外型一啲都唔夾。
「跑？你騎住條龍喎，點解唔飛過嚟呀？」
「哎喲！喺天空度飛係快，不過咁高好恐怖呀，我畏高㗎！」
「我頂．．．」
露西對呢個突如其來加入戰團嘅新對手感到一頭霧水，但係由佢同馬克嘅對話，可以睇出佢哋係同一陣線。不論佢哋係由於乜嘢原因合作，對付嘅方法只有一個，就係將佢哋全部消滅！露西二話不說，同時向兩個敵人發起攻擊，馬克唔再匿埋，認真接招，熟練技術加持之下居然都不落下風。而終極魔龍騎士嘅基本實力更係喺馬克之上，應付露西嘅攻擊可謂游刃有餘，仲不時作出反擊，條龍亦好似個流動炮台咁，不斷向住露西開火，牽制住佢嘅行動。
一時之間雙方猛烈嘅攻擊你來我往，成個區域打到地動山搖，土崩石壞。雙方都攞唔到明顯嘅優勢，表面上係勢均力敵，只係三個人心裏面都明白，只要露西嘅防禦結界無被破壞，咁最後嘅勝利者就非佢莫屬。呢個時候，一把熟悉嘅聲音又再響起。
「主人！」復活咗嘅伊麗莎終於趕到返嚟，一躍而起，手上嘅長弓已經拉滿，向露西射出一箭。馬克見狀，亦向露西放出衝擊波，同伊麗莎嘅攻擊組成合體技。
露西已經唔係第一次接招，心諗：「So what？就算係合體技，都傷唔到我㗎啦！」，充滿信心咁舉起手擋格。而馬克同伊麗莎嘅目光同時投向終極魔龍騎士，似乎早就夾好咁，終極魔龍騎士嘅攻擊亦準備就緒，飛龍吐出黑焰纏繞住佢佩劍，然後佢將自己嘅魔力注入黑焰，用盡全力由劍尖射出。攻擊同馬克佢哋嘅合體技碰上，竟然好似電光毒龍鑽咁互相糾纏，合而為一，仲要發出比之前更強嘅金色閃光！
露西見到咁嘅場面，心知不妙，但係要避開已經太遲，立即雙手齊出擋喺身前，同時發出攻擊希望抵消部分威力。只係馬克佢哋嘅聯合攻擊完全無受影響，依然直撲露西，轉眼之間已經觸發佢嘅防禦結界。兩股巨大嘅力量碰撞，不斷釋放出強烈嘅爆風，除咗周圍嘅建築同樹木，連伊麗莎都幾乎都吹走，只能夠匿喺馬克身體後面，緊緊捉住佢。
爆風維持咗十秒左右，終於分出勝負，喺爆風嘅中心，防禦結界開始出現裂痕，而且快速擴散。轉眼之間，包圍露西身體嘅防禦結界爆裂成無數碎片，而聯合攻擊嘅餘威狠狠吞噬露西嘅身體，將佢身上嘅護甲打成粉碎，底下嘅紗裙亦爛咗一大忽，露出一邊豐滿嘅乳房同成隻雪白大脾。而佢嘅血量扣到淨返一點，不支倒地，喺露西能夠認清發生咗乜嘢事之前，亢奮莫名嘅馬克已經撲咗埋嚟，壓住喺佢身上大叫：「得咗！打爆咗，我哋真係打爆咗精靈女帝嘅防禦結界！不過一招就打爆，睇嚟個結界都唔係咁犀利啫！」
一邊嘅終極魔龍騎士搖搖頭：「你咁講就唔啱喇，呢次喺你同伊麗莎嘅合體技之上，再疊加一次我攻擊嘅合體技效果，威力幾何級數上升。啱啱果一擊，威力大到可以完全毁滅一個主要城市，好彩俾精靈女帝嘅防禦結界抵銷咗一部分，先至無將成個區域打爛晒。本來威力太強，直情會殺死佢，好在佢係不死之身，點被攻擊都至少會剩返一滴血，咁就唔駛驚佢會返據點復活再生啦。」
俾馬克壓到動彈不得嘅露西百思不得其解，呢兩個究竟係乜嘢人？佢哋點解會合作？乜嘢係雙重合體技？佢哋又點知精靈女帝係不死之身？
件事要由馬克同伊麗莎當日攻入終極魔龍騎士嘅巢穴講起。話說當日終極魔龍騎士向馬克提出合作，令馬克嚇咗一跳，但係佢腦筋轉得極快，即刻就明白當中嘅原因：「你都係玩家控制住嘅遊戲角色？」
「無錯，就同你一樣。」終極魔龍騎士大笑一聲：「不過我唔係普通玩家，而係九賽軟體嘅技術部員工，我叫做吉米，應該點稱呼你呢？」原來吉米早就整好咗連結去遊戲角色嘅客戶端，仲自己先用咗，而佢無好似馬克咁擺烏龍，真係連結咗落終極魔龍騎士度。至於同露西所講乜嘢多過一個帳戶連結就會搞到成個遊戲死機，其實純屬亂噏，只係為咗阻止佢帶其他人嚟幫手。
馬克聽到對方係九賽嘅員工，不禁有啲猶疑，會唔會係想套料搵自己出嚟？如果真係俾九賽發現自己嘅真正身分，到時真係唔死都一身孱。吉米見馬克面有難色，明白佢嘅想法：「咁或者我都係叫返你做毛屌王啦，你知道我係九賽嘅人，懷疑都好正常，不過你放心，我唔係想捉你，而係好似之前咁講，想同你合作。」
「我唔太清楚你想搞亂呢個遊戲世界嘅原因，但係呢件事，對我嚟講係一個可以報復公司女魔頭嘅機會。而我向佢報復，又會令呢個遊戲，甚至成間公司都更混亂，唔知你有無興趣呢？」
馬克對呢件事的確感興趣，佢嘅目的亦正正係想搞到九賽雞犬不寧，但係佢並未完全放低戒心，小心翼翼咁問：「咁你講嘅合作，究竟係點做法呢？」
吉米：「其實你只需要繼續做你做緊嘅嘢，就係搞亂個遊戲世界，我會睇啱機會，引個女魔頭以精靈女帝嘅身分入嚟遊戲世界討伐你。精靈女帝擁有防禦結界，即使你哋使出合體技，都一樣傷唔到佢，咁樣，我就可以說服到佢入嚟遊戲世界，我哋先可以對付佢。」
馬克：「你知道合體技嘅事？」
吉米：「當然知道，就連發動嘅條件，我都一清二楚，因為我就係設計呢一招嘅創作者。」
馬克：「原來係你．．．之但係如果連合體技都傷唔到佢，我哋又可以點樣對付佢？」
吉米：「單以你哋嘅合體技的確係爆唔到防禦結界，但係合體技係可以再次疊加，只要有符合發動條件嘅角色加入攻擊，就可以同原本嘅合體攻擊再組成合體技，化成威力大幅上升嘅強化攻擊。以終極魔龍騎士嘅攻擊力，加入嘅強化合體技絕對可以打爆防禦結界！咁而家嘅問題係，要令我同你哋符合發動嘅條件．．．」