用AI圖寫故仔(續): 二十一．陷阱
喺九賽軟體嘅會議室之中，營業部嘅職員戰戰兢兢咁匯報：「由於毛屌王喺『崛起』遊戲中橫行，嚴重影響玩家嘅日常活動，相關嘅投訴急升，玩家滿意度評分跌到新低，大量玩家表示覺得無癮棄game，而今季嘅營業額已經跌咗四成。」
坐喺會議枱盡頭嘅露西一如以往咁先係一輪問候匯報嘅員工，然後殺氣騰騰咁將矛頭指向技術部嘅吉米：「你哋成班都係廢柴，搞咗咁耐都未搞得掂！你話而家點算好？究竟有無辦法對付果集死獸人？」吉米沉點咗十幾秒，終於答話：「其實辦法係有一個，不過未測試過，唔一定會成功。」
露西：「Fuck！有辦法就快講啦，收埋等拜山先攞出嚟用咩？」
吉米：「根據收集到嘅資料，我相信係有人將自己帳戶連結咗落毛屌王度，當係自己角色咁控制住佢。根據呢個方向，我做咗一個特製嘅客戶端，同樣可以將玩家帳戶連結落遊戲角色度，包括啲世界級首領，不過就必須強制開啟官感同步。問題係個客戶端會令遊戲變得勁唔穩定，連結一個仲頂得順，如果多過一個帳戶連結，隨時搞到成個遊戲死機。咁即係話，我哋只可以控制一個遊戲角色去對付毛屌王，而佢所用嘅合體技，可以將攻擊力大幅加強，就算係世界級首領都未必頂得順。」
露西諗咗一諗：「既然係咁，用精靈女帝應該得啦？」原來露西自己都有玩呢個遊戲，知道精靈女帝喺遊戲之中，身為玩家勢力所信奉最高神嘅代理人，係一個絶對嘅存在，實力喺世界首領都係首屈一指。
吉米：「我都覺得精靈女帝係最好嘅選擇，不過呢件事唔方便由公司以外嘅人去做，萬一毛屌王係bug呢個消息傳咗出去，俾人知道改版係個騙局就好大鑊。而遊戲有審查玩家性別同角色性別一定要相同，呢個就算連結落遊戲角色度都無變，所以只可以由女玩家去連結落精靈女帝度。仲有要做到連結世界級首領角色，玩家嘅等級必須已經到達最高嘅60級。目前公司之中達到60級嘅女玩家，只有總經理你一個人，其他人如果要升到60級，恐怕要一段唔短嘅時間。」
「咁就等我親自出馬收拾殘局啦！」露西心諗都係打機啫，大不了打唔贏咪登出遊戲囉，就算要開官感同步可能要受吓苦，都總算係可以解決問題。不過佢都係再保險問清楚：「係咪有十足把握打得贏？」
吉米：「我計過毛屌王合體技嘅攻擊力，的確係好高，但係精靈女帝有防禦結界，至少要去到毛屌王而家五倍以上嘅攻擊力先至可以破壞到令佢受傷，根本無得輸。再退一萬步，就算真係打唔贏，精靈女帝設定上都係不死，血量點都唔會歸零死亡，只要未死，隨時都可以登出遊戲就得，大不了受到些少遊戲懲罰。」
兩日之後，露西坐咗喺安裝咗特製客戶端嘅電腦椅上面，決定要了結呢一隻搞到個遊戲滿城風雨嘅獸人。佢再一次確認精靈女帝嘅資料同技能，正如吉米所講，不死加上絕對防禦，要攻破嘅攻擊力比任何一隻世界級首領嘅總血量仲高，就算係毛屌王嘅合體技都無可能一下秒殺果種怪，咁就更唔可能破壞到護盾。一切準備就緒，露西身邊嘅吉米再次提醒：「總經理，用呢個特製嘅客戶端，我哋無辦法睇到你喺遊戲中嘅情況，只能夠靠你自己。如果真係有乜問題嘅話，請立即登出遊戲。」可惜露西並唔領情，只係覺得佢煩：「得喇，我駛你教？」跟住就登入遊戲，剩低吉米同其他同事你眼望我眼，好似聽到對方同自己講：「鬼叫你窮呀，頂硬上啦！」
露西以精靈女帝嘅身份登入咗遊戲，環視四周，喺神殿之內佈滿正向自己下跪嘅信徒，而四周有通向各個地方嘅傳送門。喺一眾信徒嘅目送之下，露西走入其中一道傳送門，消失於無形。而今日馬克同伊麗莎遇到久違嘅玩家討伐，自從佢哋掌握到合體技嘅發動條件，嚟挑機嘅玩家全部都俾佢哋打到落花流水，久而久之，啲公會同玩家都放棄咗再去挑戰，只有對佢哋避之則吉。而今日竟然又有人嚟送死，令佢地都有啲意外，不過呢種程度嘅對手，佢哋三兩下手腳就打到對方無咗一半人，而剩低嘅就開始轉頭逃走。
難得有人咁勇嚟挑機，唔玩個夠本唔知幾時先再有機會，馬克追住死剩果班玩家，慢慢嚟，一啲都唔心急擊殺佢哋。一路追呀追，估唔到呢班玩家走佬又幾耍家，跑過咗幾個唔同嘅區域，到死剩兩個人嘅時候，先至終於喺一座古城遺址之前停低。
「終於肯乖乖受死喇？」馬克慢慢行近兩個玩家，準備問吓佢哋仲有無乜嘢遺言。但係喺佢哋身後突然轉嚟一把女聲：「受死嘅係你至真喎！」同時古城四周地面出現發光嘅魔法陣，呢個就係攻略世界級首領嘅時候會出現嘅死鬥區域，喺打低首領之前，成個地區變成有入無出，令玩家無得逃走。露西所控制嘅精靈女帝由遺跡行出嚟，睇嚟呢班挑機嘅玩家係特登引馬克同伊麗莎過嚟，而露西就喺度守株待兔。只係馬克嘅反應遠比露西所預期嘅平靜，不慌不忙咁答一句：「果然係精靈女帝」然後就發出攻擊，同露西開始兩個世界級首領之間嘅惡鬥。
以角色實力嚟講，露西控制嘅精靈女帝比馬克絕對更勝一籌，不過露西雖然都玩到60級，但係戰鬥技術比馬克同伊麗莎都差幾皮。再加上馬克每次喺對方出招嘅時候，都會為伊麗莎提供掩護，反觀露西就完全無顧過自己果邊嘅兩個玩家，所以場上好快就只剩低露西、馬克同伊麗莎三個人。露西根本懶理果兩個人被打低，繼續向馬克發動猛烈攻勢，馬克靈活咁避開強大嘅招式，只係受到皮外傷，跟住就反攻向露西，招式確確實實咁打中佢。但係戰斧當接觸到露西身體嘅一刻，就俾一個透明嘅護罩擋住咗，傷唔到佢分毫，只係撞擊力令佢向後輕輕一搖。
馬克立即察覺：「防禦結界！」佢好清楚一般招式對精靈女帝無效，無半點猶疑，大叫：「伊麗莎！」正喺度走位避開露西攻擊嘅伊麗莎聽到馬克嘅呼喚，熟練咁同馬克夾好時間向露西發動攻擊，組成合體技。合體技化成一道強光向露西逼近，佢係第一次見到威力咁強大嘅招式，雖然問過吉米話防禦結界應該頂得住，但係佢都有啲笠水，不由自主舉起雙手扺擋。強光閃過，塵埃落定，露西向後退咗兩步，身上只係多咗一啲灰塵，完全無受傷。露西嘴角微微上揚，確認咗防禦結界嘅效果，咁就無後顧之憂，只要全力攻擊就可以。露西變成個流動炮台咁，不斷衝向馬克同伊麗莎，有前無後不停攻擊，雖然破綻百出，但係馬克佢哋亦無可奈何，只可以不停左閃右避。
好在露西嘅戰鬥技術實在唔算太出色，而佢操控精靈女帝更係新手，馬克佢哋先至叫做有啲喘息空間。但係一路只守不攻都唔係辦法，伊麗莎終於沉唔住氣，大叫一聲：「主人！」同馬克一齊準備好再一次發出合體技。攻擊再一次逼近露西，但係今次佢信心十足，不慌不忙咁繼續動作。強光退散之後，馬克望住露西原本所在嘅地方，竟然唔見咗人？根本見唔到露西。正當馬克四圍搜索敵人嘅去向，突然傳出一聲慘叫，正正係伊麗莎嘅方向。
馬克心知不妙，望向伊麗莎，果然露西恃住自己嘅防禦結界打唔爆，反為抓住剛才使出合體技嘅混亂，出其不意咁衝到伊麗莎身邊，一下重招將伊麗莎打到倒地不起。一個正常嘅玩家受到露西呢個級數嘅世界級首領直擊，一命嗚呼係最正常不過嘅事，伊麗莎亦唔例外，斃命之後身體慢慢變成透明消失。伊麗莎嘅角色唔似馬克，死咗唔駛由低等級重新玩過，只係會短時間受少少角色能力嘅懲罰，就可以喺主城復活再嚟過。不過主城同佢哋打緊嘅地方有一段距離，又無傳送門直達，伊麗莎復活之後即刻趕過嚟都要一段時間，呢段時間，馬克就只有孤軍作戰喇。
突襲成功嘅露西望住正喺度消失嘅伊麗莎，冷笑咗一下，諗緊要點樣對付剩低嘅馬克。「死獸人，搞到我咁鬼煩，今次睇吓我點慢慢整死你！」無咗伊麗莎，馬克連合體技都出唔到，完全唔構成任何威脅。正當露西要轉向馬克嘅方向，應該已經死咗嘅伊麗莎突然企返起身，拉滿長弓準備攻擊。原來伊麗莎裝備咗「遺願戒指」呢件一次性嘅道具，喺下一次死亡嘅時候會短暫復活，仲可以作出最後一次攻擊先至消失。
面對突如其來嘅攻擊，露西係估計唔到，但係佢無驚過，反正都傷唔到自己分毫。亦的確一如佢所料，伊麗莎發出嘅一陣箭雨攻擊，打到露西身上嘅部分，全部都俾佢嘅防禦結界彈開。箭雨完結，伊麗莎再一次瞓低，終於真真正正咁死咗。露西毫髮無損，正諗住繼續狩獵剩低嘅馬克，但係周圍突然陷入濃霧，原來伊麗莎最後呢一招又係「煙雨亂射」。煙霧好快就令周圍一片模糊，而馬克亦趁住呢個機會，匿到遺跡建築嘅掩護物後面。
「係想乘機逃走？定係想搏大霧偷襲？露西腦內快速閃過各種可能性，但係喺死鬥區域同防禦結界嘅效果之下，兩種做法嘅成功機會都係零。露西勝算在握，向唔知匿埋咗喺邊度嘅馬克大叫：「橫死掂死，你都係快啲出嚟受死好過啦！唔好嘥大家時間！」