實不相瞞，井型屋其實係鎮魂塔: 消失的王太
消失的王太
不知不覺，在這裏已經住了一個月，自己井的左鄰右舍大致都見過面，熟識的程度是碰到面會點頭打招呼。至於另一面井，我一次都未去過，對那邊的鄰居自然也沒有多認識，連點頭打招呼也沒有，而且另一面井不知怎的，總有一種陰沉的感覺。
「都住咗喺度成個月，我哋返放學，平時落街，都已經好多唔同時間會搭lift，點解都無撞過嗰個王太嘅？」在等升降機上學的阿旻突然問。
「吓？邊個王太？」我下意識的回答。
阿旻走到我跟前，以極度猜疑的眼神看着我一會，然後說︰「阿哥你無嘢吓？嗰個奇奇怪怪，借我哋衣架無還嗰個王太喎，你真係唔記得？」
坦白說，我一早已忘記了此事，但阿旻一提起我便想起了，而升降機此時亦正好到達，裏面站滿了人，我倆好不容易才能擠進去，到達地面後我們一個向左走一個向右走，對話也停在令我憶起王太這個人上。
不過這一段對話，害我全日也想着王太這個人，上學也心不在焉。真的是沒緣份碰巧遇不到？還是她根本不住在十五樓？抑或還有其他原因？或許我要去查證一下。無錯，放學後就去查證一下吧！
好不容易熬到放學，我二話不說立即飆回家，戰戰兢兢的開始探索我從未到過的另一面井。雖然時間還是下午四時多，陽光普照，但這面井始終還是比較陰森。我吞了一大口口水，鼓起人生目前為止最大的勇氣，以逆時針方向走一圈，邊走邊查看各個單位內的情況，看看能否找到王太。
甫踏進去，立即有一陣怪風吹過，令我打了一個哆嗦，現在回想，或許這是一個警告，但當時的我未有理會。下午四時多，陽光還很充足，但當我查看開着門的每家每戶，室內始終都是暗暗的，我始終未能清楚看到內裏的情況。
「嘭」！身後突然傳來的嘭門聲嚇了我一跳，應該是剛才我經過的其中一個單位，看到我這個鬼祟的陌生人，基於安全理由而關上門。
雖然繞一圈也只不過是一分鐘的事，但不知怎的，我踏進去之後，好像永遠也走不完，繞了很久才能回到升降機大堂。
「好似都唔見王太，唔通佢唔係住呢層？」我心想，口裏雖然說害怕，但身體卻不由自主的往樓梯走去。我首先去了十六樓，一般情況下，人們都會先選擇下樓梯而不是上樓梯，畢竟下樓梯用的力氣較少。
十六樓的升降機大堂和十五樓的無異，只是數字由十五變成了十六，那面井依然陰沉。我又一次在十六樓的井繞了一圈，還是沒有發現。
「唔通王太鍾意先苦後甜？」於是我走了到十四樓，十四樓的升降機大堂除了垃圾多了點之外也無異樣，我再次快速的繞一圈，還是看不到王太的身影。
「叮」，升降機門突然開啟，我被它嚇了一跳，一個雙手拿着餸菜的老婦步出。
「會唔會咁啱就係王太？」我一面想一面站在原地看着她蹣跚的走，然後再次失望︰「果然唔係。」但這卻啟發了我，或許王太住在十七樓，是乘升降機下來的。
於是我便跑上十七樓，第四次在這面井繞一圈，最終還是沒有發現，但卻發現一個令人心寒的巧合︰四層樓一共六十八個單位，竟然會同時都中門大開，雖然看不清楚單位裏面，但這巧合也太詭異了。我不由得心寒了一下，然後頭也不回的趕快跑回家。
在家門前，阿旻正好關門，我一面叫住她，一面告訴她我剛才的經歷，她聽到後並沒有懷疑，反而覺得很刺激，躍躍欲試，還慫恿我與她再去一次，我斷言拒絕，但她仍不死心。
「阿哥你咁大個人唔係驚呀？」阿旻使出激將法︰「平時睇咁多鬼片，咁小嘅事就驚成咁？廢唔廢咗啲？」
我完全知道她甚麼葫蘆賣甚麼藥，並不打算給她機會說下去，所以打斷道︰「你咁叻自己去，我去過喇，而且有大把功課要做。」
「唓！」阿旻不屑，於是說︰「畀個機會你陪我去喳，擺明益你。」
「免喇，咁好嘅嘢留返畀你自己，」我依然回絕，但還是提了一句︰「真係有啲怪，你自己小心啲。」之後我便進屋，而阿旻則前往另一面井。
兩分鐘後，阿旻帶着一條黑色長長、尾部有勾的鐵線回來，我看到後很好奇，於是問︰「做咩帶條鐵線返嚟？」
她把鐵線遞到我面前，我仔細一看，這條鐵線原本應該是一個衣架，只是被人扭成這個形狀，方便勾東西，難道是小偷的工具？
「呢個係我哋嗰時借畀王太嘅衣架，」阿旻說︰「啱啱喺隔籬井王太畀返我嘅。」
「吓？」我不知道自己是懷疑，驚訝，害怕，還是單純條件反射，我還是忍不住吐出了心聲︰「咁都得呀？點都還返個正常衣架啦！」
阿旻用變形衣架輕輕打了我一下然後說︰「呢樣都唔係重點，重點係佢一早就攞住個衣架企喺隔籬井入口等我嚟，好似知我會過去咁。」
「可能係啱啱見到我醒起，打算過嚟還，點知見到你，咁佢咪唔行等你囉。」我嘗試給出一個合邏輯的解釋。
可是阿旻不接受這解釋，堅持王太有古怪，還提出新理據︰「佢啱啱木無表情，面無血色，雙手冰冷，邊忽正常？計我話佢十足十死人就真……可能係鬼嚟！」到最後她故意加大聲線嚇我。
「又亂講嘢，日光日白邊有鬼，你睇錯喳？」我的口堅決否認，但心裏已經毛毛的。
「嘻嘻，」她詭異的奸笑說︰「呢個人相當有嫌疑，有必要調查吓。阿哥，我哋去探吓險囉！」
由我看到她的表情開始，已經想到不好的事會發生，想不到她提出如此大膽的事，作為哥哥的我，當然會第一個拒絕，畢竟實在太恐怖了。
「無膽鬼！咁大個人都生人唔生膽，呢個世界邊有鬼㗎？」她留下一句評語便失望的進屋。
王太的事，大概會告一段落吧……可惜這只是我的一廂情願，因為晚飯的時候，最不希望發生的事還是發生了。
「你哋記唔記得之前嚟借衣架開門嗰個王太？」媽媽在席間問。
「哦……記得，拎咗個衣架，又唔駛我幫手嗰個嘛，做咩事？」爸爸口裏含着一口飯並反問。
「佢好似死咗，我見佢屋企門口個土地遮住咗。」媽媽輕描淡寫的說。
聽到這消息的我和阿旻立即對視了一眼，異口同聲問︰「幾時嘅事？」
「聽講係琴日。」媽媽對我們的神同步和大反應表現得有點錯愕，但還是回答了。
「吓？琴日？無可能囉！我晏晝先見到佢，佢仲畀返個衣架我㖭。」阿旻不相信。
我用手肘頂了阿旻一下，小聲說︰「你唔信有鬼，今次親眼見到，無得你唔信啦啩？」
「但佢又真係無哂血色又凍嘅。」阿旻憶起下午的情況，不過她還是不相信有靈異之事，於是說︰「我今日晏晝先見過佢，點會琴日死咗，係咪第二個喳？」
「你今日撞鬼？」媽媽放下碗筷，反應極大。
「唔係囉，佢一定係人，呢個世界邊有鬼㗎？」阿旻堅持己見。
「係咪真係鬼，去八吓咪知囉。」爸爸開玩笑道。
「好，食完飯就去，係邊個單位？」阿旻問。
「八室。」媽媽爽快的答。
飯後，阿旻拉着我道︰「行啦阿哥。」
「唔得，我要教阿曦同阿晴功課。」一直無話語權的小弟妹被我作為擋箭牌。
阿旻早料到我有這一着，瞪大眼問他們︰「你哋仲未做完功課咩？」
阿曦和阿晴嚇得連忙搖頭否認，接着阿旻便用勝利者的眼神看着我，不過我還未認輸，立即再用另一個理由推搪她︰「我要幫佢哋温默書。」
阿旻再次用凌厲的眼神望向小弟妹，他倆立即驚慌的說︰「我哋今日默完喇。」
得到答案後，阿旻以不輸輪迴眼的瞳術望着我，我感覺到雙耳熾熱，只好投降認輸，隨她出發調查八室。
甫踏進另一面井，一陣風又吹來，縱使走廊燈已亮了，但這面依然陰森，不過我們沒有多理會，只是徑直前往八室。轉了一個彎，八室就在走廊末端，遠遠已經看見單位前方的土地被紅紙遮蓋，門上的八卦鏡也一樣，這正是有家人過身的象徵，但過身的真是王太嗎？
我們躡手躡腳走到門前，大門緊閉着，於是我們有默契地一個從大門信箱看，一個從門旁氣窗望，單位未有亮燈，只有微弱的燭光，隱約看到地上有一個像人的物體安祥的躺着，但因為角度問題，始終看不到他的臉。
「喂，睇嚟王太真係死咗，你今日真係撞鬼。」我為了盡快離開，便妄下判斷。
「亂講，你睇得清佢個樣咩？佢未必係王太，可能係王生呢！」阿旻駁斥。
此時，躺在地上的類人物體好像動了一動，嚇得我立即遠離窗口，指着它驚惶失色道︰「你……你啱啱見唔見到？屍變呀，佢係殭屍嚟！」
「妖！屍咩變啫，佢根本就係一個人囉好唔？你睇清楚啲，佢有呼吸，只係瞓咗喺地下喳。」她沒好氣的說。
我不相信，繼續爭辯道︰「好人好者點會無啦啦瞓喺地下？肯定有古怪！」
阿旻白了我一眼，然後說︰「真係無你咁好氣。」之後她按了門鈴。
「喂！」我即時喝叱︰「你做乜㩒鐘？」
「唔叫佢開門我哋點調查？佢開門咪知佢係王生定王太囉。」阿旻理直氣壯道，難得的是我竟然覺得她這次有道理。
「嚟喇。」屋內回應的是一把老人的聲音，但聽上去難以分辨是男是女。
「吱」……門骹發出了駭人的聲音，這很合理，恐怖片一般都是這樣開場的。
開門的是一位老伯伯，他看上去已經超過八十歲，但腰板挺直，精神奕奕，沒有半點老態。
「噢！請問兩位有咩事？」老伯伯問。
阿旻一馬當先回話︰「我想揾王太。」她毫不避忌、單刀直入的問，我一時之間也腦閉塞，想不到如何解釋。
「王太？」老伯伯先是錯愕，然後笑說︰「佢唔喺度好耐喇，你哋做咩突然想揾佢？」
「唔喺度好耐？」我心裏重唸了一次，再看到微弱燭光映照下，屋內的枱上正正放了一張王太的車頭相，前面還有一碗吃了一半的白飯，看到這樣的佈置，我心知不妙。
可是，阿旻還是沒有任何懼色，她是看不到這個場景佈置嗎？還是她的膽真的那麼大？我不知道，也不想知道，此刻的我只想盡快離開這個名符其實的鬼地方。
我拉着阿旻的手臂要離開，可是她用力一甩，把我的手甩開，並責怪的問︰「做乜鬼嘢？」
「做乜鬼嘢？」不知怎的，聽到這句話令我無名火起，我加重語氣道︰「你唔走我唔阻你，係咁先。」接着頭也不回的離開。
「黐線，唔駛理佢㗎王生。」阿旻無視我的離開繼續說︰「因為之前王太無帶鎖匙，嚟我哋屋企借咗個衣架開門，雖然佢今日還咗畀我哋，不過我哋見咁耐都無撞過佢，所以諗住嚟揾吓佢咁解。」
聽完這番說話後，老伯伯的臉立即變得鐵青，語氣也不同了，但我已經離開了這面井，所以他說甚麼我也聽不到了。
約半小時後，阿旻也心滿意足的回來，看來她已經得到滿意的答案。此刻，我的好奇心壓制了我的恐懼，但自尊心依然高企，令我開不了口問她後續發展，幸好媽媽的出現完美解決了這件事。
「點呀？調查完有咩結果？講嚟聽吓。」媽媽剛洗完碗出來便問。
「問我哋借衣架嗰個係王太無誤，但佢已經唔喺度好耐。」阿旻輕描淡寫的說，對自己的說話絲毫不感到震驚或恐怖。
「咁姨姨去咗邊？」阿晴天真的問。
阿曦也無邪的問道︰「佢係咪死咗？」
「梗係唔係喇，呢個世界都無鬼嘅，死咗又點會問我哋借到同還到衣架呢？」阿旻蹲下摸着兩位小孩的頭微笑着說。
「咁係咩一回事？」我認不住問。
「叛徒。」阿旻白了我一眼，造了一個口型，我頓時慚愧起來。
「係囉，我都認為係無鬼，咁事實係點？」一直在電腦前忙的爸爸此時也插話問道。
阿旻於是把事實娓娓道來︰「實情係咁，王生話王太其實係有老人痴呆症，一早已經喺老人院住，嗰日佢係偷走出嚟返屋企，咁啱王生唔喺度，所以就嚟借衣架，咁我哋成日都撞唔到佢就係咁嘅原因。」
「咁張車頭相同埋半碗白飯，仲有王生臉色咁難睇又點解釋？」我追問。
「佢哋無得成日見，所以放張相嚟睇住對住食飯，解吓相思之苦啫。」阿旻逐一解釋︰「臉色難睇係因為王太今日又偷走出嚟，所以佢唔高興囉。」
「王太偷走出嚟，老人院會唔通知佢？」我覺得很詫異，即時提出疑問。
「你都覺得奇怪呢，如果唔係老人院失職，咁就一定係王生有嘢隱瞞。」阿旻壓低聲線，故弄玄虛再說︰「另外有樣嘢你哋都忽略咗。」
大家立即一臉疑惑，阿旻看到後一臉得意的說︰「如果王太真係住老人院偷走返屋企，佢借衣架係有機會開到木門，但鐵閘又點開到呢？再瘦嘅人都無可能捐過鐵閘啦，老人痴呆啫，又唔係弱智，點會唔知先？」
「又係喎！」我驚嘆道︰「咁即係話王太真係住喺度而唔係老人院，佢真係倒垃圾嘭咗門要開門啦，點解王生要講大話？」
「真係唔知，不過有啲嘢都幾奇怪，我有個諗法但好匪夷所思，所以想你哋都睇吓。」阿旻說完後拿出手提電話，向眾人展示了一張相片。
「普通一道門，有咩奇怪？」媽媽率先問。
「畀得我哋睇一定唔會咁簡單嘅。」睿智的爸爸說，但他亦看不出哪裏有問題。
「門上面有貼紙。」阿晴看到相片後立即說。
「唔係貼紙，係膠紙。」阿曦糾正道。
「無錯，咁叻嘅你哋兩個，道門上面有膠紙跡。」阿旻嚴肅的說。
「咁唔代表啲乜，過年貼揮春啲痕跡啫。」我理性的說。
「但會唔會貼到連鎖匙窿都遮住？」阿旻反駁。
我無言以對，爸爸總結道︰「即係佢唔想畀人入屋，所以先封埋鎖匙窿，但睇哂成張相，有幾個位都有呢種膠紙跡，而且大小睇落似符，即係佢唔想畀某啲嘢入屋？」
「點會呢？」媽媽說出疑點︰「唔想畀某啲嘢入屋又點解要遮住土地？好唔合理，兩種做法都好矛盾。」
「會唔會係曾經唔想畀某啲嘢入屋，然後而家又想？」我提出一個新觀點。
「你咁講都係想講係鬼啫。」阿旻提議︰「點解唔直接去揾王太？咁咪唔駛估估吓。」
「點揾？如果王生肯畀我哋揾嘅話，我哋啱啱就已經見到佢喇，仲駛乜而家咁樣估估吓？」我反駁她。
「其實好簡單之嘛，問佢隔籬鄰舍咪得，又唔駛驚動王生，又得到答案。」媽媽一開口便給了一個兩全其美的辦法。
「好似幾有道理，咁仲唔行動？」阿旻急不及待要出發，我們也隨着她一起動身。
不過這麼多人一起去問，不會很奇怪嗎？而且要問哪個？怎樣問？我完全沒有頭緒，或者他們有吧……
「你哋喺度等等，等我去問吓張師奶。」媽媽在升降機大堂叫停我們，果然方法由她提出的時候，便已經想好了要如何實行。
媽媽走到了零四室，找到張師奶，與她閒聊了約十分鐘便回來，我們在升降機大堂急得像熱鍋上的螞蟻，很不容易才等到媽媽回來匯報。
「今次劇情真係翻轉再翻轉，張師奶話個單位好上手真係王生王太住，但十年前搬走咗，而家係一個新移民家庭住，但唔知係咪疫情返咗大陸，好耐無見過有人出入。」說到這裏，媽媽故意停一停，吞了一大口口水，加上突然又刮起了一陣風，使得整個氣氛更詭異和凝重，待風停後，她續說︰「不過唔知幾時開始，單位個土地畀人遮住咗，而道門都畀人貼滿哂大字報，係殺人填命嗰種，但過咗幾日就畀人撕走咗，不過就無人見到係邊個同幾時撕，而張師奶到而家都仲未見過單位有人出入。」
媽媽一口氣說出打聽到的情報，正當我們以為她說完之際，她又突然補充︰「張師奶仲話幾個禮拜前喺樓下撞到王太，仲同佢傾咗幾句，話探開王生順便返嚟懷緬吓見吓啲街坊，話王生已經住咗院成個月。」
「咁複雜嘅……」我聽得一頭霧水，勉強總結道︰「即係王生王太仲在生，我哋見到嘅都係人，好彩唔係鬼啫。」
阿旻則有另一番解讀︰「首先王生喺間屋入面已經好唔尋常，間屋已經係人哋嘅，除非佢識穿牆，唔係點會喺入面？王太走嚟借衣架開門都好怪，擅闖民居喎，拉得喇，成件事都好唔make sense，兩個老人家點解要搞咁多嘢？我真係諗唔到點解釋。」
「王生瞓咗醫院成個月，王太又咁啱出現，間屋又係佢哋舊居，王太又凍又面無血色，㩒鐘王生又應門，屋入面又有王太車頭相，話見到王太時王生又面有難色，咁多矛盾嘅嘢我淨係得一個結論最易解釋，」爸爸給出最後答案︰「佢哋都死哂，你哋都撞鬼。」
「叮」！升降機的響聲把我們都嚇了一跳，步出的是一個外賣員，他很嫻熟的右轉往目的地進發，他徑直走，去到八室前便停下，按下門鈴，很快大門便打開了一條縫，外賣員小心翼翼的把食物從鐵閘的隙縫遞進去，一手交貨一手收錢，然後便離開，整個過程王生始終沒有露面，只看到他的手。
「難怪無人見過有人出入，連交收外賣都咁鬼祟。」我吐槽道。
外賣員漸行漸近，到他回到升降機大堂時，阿旻冷不防問他︰「見你好熟路，望都唔駛望，平時你都送開外賣畀王生？」
外賣員先是嚇了一跳，然後冷靜下來便答︰「王生？邊個嚟？八室嗰個？佢姓雲㗎喎！佢個姓咁特別，我記得好清楚。佢每日都叫外賣，每次都叫粟米斑塊飯汁另上，每次都係我送，每次都開少少門，每次都只係見到佢個樣少少，好彩佢啲錢係真錢，唔會返到鋪變溪錢，咁我先知佢係人喳。」
「變溪錢？你估呢度係油麻地，有人喺度打麻將咩？不過佢係姓王唔係姓雲喎，今日我先見過佢，一個老伯伯嚟。」阿旻說，我也點頭附和。
「阿伯？妹妹你係咪眼花？雖然我睇得唔係好清楚，但最多都係四、五十歲左右，有排都未到阿伯喎。」外賣員說，此時升降機到了，他便跟我們道別。
外賣員走後，我們面面相覷，莫名的寒氣由心而發，大家都打了一個哆嗦，而八室的門也正好在此時被大力關上，像是在警告我們此事要到此為止，我們也顧不上究竟他是王生還是雲生，嚇得急急回家。
只是如果外賣員所說屬實，那下午的老伯是誰？遇鬼的究竟是我們還是他呢？
這一切都已經無從稽考，因為翌日單位門外已經貼了告示，未來一個月會進行打拆工程，不管是人還是鬼都不會再出現了。