【驚慄甜】惡魔寶貝: 第1話 - 我最鐘意惡魔
「我..我懷疑自己中左詛咒。」
我係警局報案。
「先生,玩野唔該出返去。」報案室個警察咁同我講。
拿是咁的,
話說呢排Netflix上咗一套黐線紀錄片,令我回想起其實喺我身邊都發生過一啲黐撚線故事...
所以我就真係忍唔住啦,真係要將呢個黐線嘅經歷公諸於世。我稱呼呢一個女仔叫做惡魔寶貝。
===================================================
「我最鐘意惡魔~~」
===================================================
我係Nathan,25歲。我一直都係一間Cafe裏邊做侍應。間Cafe有好多有錢人同名人幫襯,做了好多年,已經是senior,咁多年都好比心機做,經理都好Like我。
話說有一日...我好記得,就係5月12號,我遇到一個世界上最瘋狂既人!
呢一日既朝早開鋪無耐,有個女仔就已經係我唔知既情況下坐左係Cafe既一個角落。佢外貌非常清新脫俗,女仔來講都算高喎睇落,目測有165 cm,模特兒身材。個樣有少少鬼妹輪廓,但係感覺又唔似係混血兒。身材苗條之餘,對波都唔算話細。(當然都唔會好大啦,比例來講)
我知你地想問乜,惡魔寶貝仲未出場呀,比d耐性。
作為一個懶係文青嘅Cafe,公司規矩盡可能都要同客人傾吓計,尤其是喺呢一個咁風和日麗嘅下午,基本上人客唔多,so far都唔算太忙。
「想叫啲咩呢?」我將抹枱毛巾擺埋一邊,然後行過去問呢位ok靚既女女。
「啊..我...再諗諗先..」個女仔好似好驚咁,比我講野嚇左一跳,然後好驚青咁答我。我有一刻真係覺得自己係咪太猥褻?
不過佢怕醜都唔係重點,有樣野真係係我腦海入面揮之不去。
我係未正眼望過去既時候已經感覺到有件充滿邪氣既東西係度。但當我行近女仔身邊,更加確認佢係一件邪物。
血紅色、黑色,血淚、紅色角、666.......佢個手機殼係一啲關於....惡魔嘅嘢,令人非常不安。
「領...領域展開!」我舉起右手兩隻手指,應付呢個特級咒物。(我認真講,我係因為嚇親先做呢個動作,唔係搞緊笑)
呢個女仔竟然笑左出黎!似乎感覺唔到我其實好不安。
「..係咪好靚?」女仔指住自己個手機殼。
「ok呀都,不過如果再多d紅色會好d囉。地獄應該唔會得一種紅色既。」我用我被訓練好既吹水功力鳩up緊。「不過我都無去過地獄,科科。」
「哈哈...」女仔竟然笑左起黎。佢雙眼好似充滿光彩,笑容非常好睇。唔知點解明明頭先望佢個樣都無乜野,而家呢一刻,我對眼好似磁石咁比佢吸引住。
暫時,呢個女仔睇落唔似任何黐線嘅人呀下。
我好似呆左兩秒,搞到個女仔開始避開我眼神,面好似有d紅。
我突然都都覺得熱,馬上都避一避眼神先。「係咪...未諗到食咩?我轉頭再過嚟幫你落單,你睇一睇Menu先。」
我走果陣再回望一下個手機殼,的確令我好不安,安已不!!
但個女仔見到我對佢個手機殼有興趣,又對住我好開心笑。
「喂,我條女好似好撚camp。」我同同事Ruby講。
「唔係呀,睇落都幾靚女。」洗緊菜既Ruby話。
「你陣間行過去幫佢送餐你就知,我而家好撚不安好不好。」我話。
我自己本身都唔係啲咩基督徒耶撚,都冇話特別抗拒某啲宗教咁嘅。不過佢嗰個真係好似血淋淋嘅手機殼,應該都真係唔係一般人口味。大鑊,佢會唔會係啲咩特級咒物 ?
「會唔會係啲咩咒術工具呀嗰啲咁嘅嘢嚟㗎 ?」我問返Ruby。
「點會呀,生人唔生膽。係既話你咪出無量空處打鳩佢囉。」Ruby話。
「仆街。」Ruby又笑鳩我成日睇漫畫。
「諗好食咩味呢?」我又行過去同呢個惡魔女女講。我嘅視線仍然離唔開佢個手機殼。
「我...想要呢個意粉...同埋Mocha..」女仔講野又開始變返怕醜。
「OK,墨魚汁意粉。」我重複客人嘅訂單。墨魚汁意粉,其實就好少女仔會叫,因為真係容易整污糟個嘴,如果女仔又查唇膏就非常之唔方便,不過我真係唔敢再問太多,我淨係幻想起佢個嘴唇變咗黑色已經有啲不安。
「你..如果得閒既話...我講多d我朋友既野你聽...」女仔面紅紅,眼神閃縮,成熟既外表之下既可愛表情,有點反差萌。
「你朋友有煩惱?」我今次就唔講『你朋友就是你』呢d說話一語道破佢。
「我朋友..好想認識你...」女仔指住...佢個手機殼!!!!
我諗,如果我一開始就拒絕呢條惡魔女嘅話,我打後嘅日子應該會平凡好多。
![](https://i.ibb.co/qsHBys5/17.jpg)