留給自己最後的寶物: 第一章

他已年邁六十有七，仍朝思暮想要寫完那本愛情小說。
 
他打算出版一篇自己嘔心瀝血編寫而成的故事書，為的就是要用文字記載着自己那份仍存在着的愛念和激情，寫出一本有關自己錯過了的青春浪漫史。
「昌，咪發你個春夢啦！」他老婆忠告他:「你貴庚呀？邊有人會去睇一個老人家寫嘅初戀故事？你唔認老，人哋都嫌你過時喇！家下談戀愛嘅方式已經唔同晒我哋舊時！」
他答老婆:「妳咪理喇！我一定要寫，就算我病死都要寫落去！人生冇幾多個十年！」
 
他要堅持的，就算連家人也勸阻不了，唯有任由他去做這件對大家來說沒有半點意義的事情。
 
廖成昌老婆:「咪話我唔提醒你，你要小心身體！你嘅糖尿惡化就麻煩喇。」
兒子:「最好你顧住身體先至好講，有起事上嚟又煩到我哋要我哋請假嚟照顧你，然後又要送你去醫院……」




兒媳:「老爺，有乜嘢故事咁重要，誇張到一定要寫書？」
昌:「我一生未成就過任何一件轟轟烈烈嘅事，所以呢本書對於我嚟講好重要，我一定要完成先至會心息！」
 
兒子:「聽阿媽講你仲要係上網尋找線上戀愛感覺？！……唔係下話……」
媳婦回答昌兒子:「老爺一定係從你身上學返嚟㗎喇？」
廖成昌為了去搜尋創作靈感，不惜走進交友平台，充當小伙子去結識年輕女孩，說要親身體會時下年青人在網上戀愛的滋味。
 
雖然太太和兒子一直都不相信他可以完成這本故事，有時看見他埋頭苦幹地去爭取靈感，連一點自我料理的生活能力都鬆懈了，這令屋企人十分擔心他的過度投入。
 
「阿昌扮成後生仔上網識女仔，會唔會畀人告佢呃細路女㗎？」廖太擔心地向兒子詢問。




兒:「佢唔畀人呃返轉頭咪算偷笑囉！」
昌:「我親愛嘅英子，妳咁擔心，係咪呷醋啫？」
昌老婆廖太:「咦！你好耐冇用呢個名咁叫我咯喎，昌……你冇嘢吖嘛？見你咁風騷真係攞命。」
兒媳取笑:「原來阿爸阿媽以前咁煙韌嘅喎。」
廖太:「嘿……你宜家叫我聽返呢個名叫我打晒冷震就真。」
兒子:「我好懷疑阿爸你咁老土，點樣冧啲青春女網友嘅心？」
昌看來一點都不擔心，而且還給人有種自信的感覺。
兒媳:「老公啊，你阿爸好似有啲絶招我哋諗唔到。」
 
昌對兒子打了一個眼色，然後以自己電話的顯示屏幕解釋了兒子的所有疑惑，他指着電話:「和仔，嗱，我用咗呢樣嘢……」




這時，兒子似乎才驚覺父親的聰敏超出了自己所意料的，看了電話內容後，竟恍然大悟:「我廖漢和真係甘拜下風，有呢個阿爸喺屋企，真係家裏如有一寶！」
媳:「阿和，老爺用咗啲咩喺電話度咁爸閉？」
兒子:「佢老人家學人哋玩科技喎，用A.I. ChatGPT撰寫情信，幾犀利！」
 
媳:「吓？……咩嚟㗎？老爺點知道點樣玩呢家嘢嘅？」
廖太:「梗係唔知喺邊個豬朋狗友度學返嚟㗎喇！」
廖成昌:「咩豬朋狗友呀？……我啲friend好正經㗎！佢介紹咗我睇一段YouTube片，佢裏面有報導呢個人工智能平台，咁咪試下去玩囉。……佢講明話可以幫助寫作嘅喎！」
廖太:「昌，你又識得玩呢個……呢個……咩Chat話？」
兒子:「阿爸只需要輸入文章嘅關鍵字，ChatGPT會幫你完成埋其餘整篇情信。」
 
媳:「呵呵，由電腦寫嘅嘢感情到唔到肉㗎？依家啲人好醒目㗎，唔到肉唔受溝。」
兒子:「我同妳講，你要幾肉麻都仲可以。」
廖太「乜寫小說寫到咁複雜，為乜？……唔好寫喇！」
兒子和仔靜靜對老婆說:「阿媽怕老豆拈花惹草啊……哈哈……」
 




然後和仔又對父親說:「算罷喇，老豆，阿媽唔畀你寫你咪唔好繼續寫囉！更何況你啲咁嘅故仔: 《老人家嘅故事》，冇人睇㗎喇！」
昌:「你千祈唔好話咁大聲！我同你講，我寫嘅每隻字係經歷千辛萬苦，千錘百練總匯而成嘅故事，呢本小說將會好好睇！一定會好好睇呀！」
 
和:「有過咩經歷啊？！咪拍下拖，結過婚，生咗個仔，然後老來春，借寫小說為名去溝後生女，有乜咁好睇？」
 
昌:「我會寫一個充滿同你媽媽有過激情同深刻印象嘅愛情故事，用網上情緣去回味往日有過嘅滋味。」
媳:「其實我都想知道老爺同奶奶以前嘅浪漫史，因為聽阿和提過老爺專程搭火車去到蒙古接奶奶返屋企求婚！……好Romantic呀！」
 
廖太:「唔好再提返呢啲醜怪嘅嘢好唔好？！我唔想張揚呢件事呀！」
和:「點解阿媽對呢件事咁反感？」
廖太:「你唔好問喇。」
和:「阿爸，你知唔知點解阿媽佢咁嘅反應嘅？」
昌:「……哭泣……我記得有過哭泣。」
媳:「老爺，你冇問題吖嘛？我哋冇心刁難你，唔想講嘅就唔好講。」
 




阿和向老人家抱怨:「我問你以前啲嘢啫嘛，你呢個咩答案呀？」
昌:「我……我……好似……你阿媽佢……我解釋唔到佢咩原因，總之，睇見過流眼淚嘅一幕，我畀唔到原因你。」
 
和:「嘥氣！咁你學咩人寫愛情？咁重要嘅事都解釋唔到！仲點樣好好敘述同阿媽一齊嘅愛情故事?」
廖太:「阿昌，你唔好寫落去喇！」
昌:「我印象中妳喊過。」
和:「妖，你聽媽子講，咪寫落去喇，好心！」
媳:「阿和！」
和:「我最唔妥係佢冇心裝載同阿媽以前嘅過去！」
媳:「佢解釋唔到啲見過嘅畫面啫，唔係冇心。」
昌:「你哋咁樣討論我，當我係實驗室裏面隻白鼠呀？！可唔可以畀少少尊重呀？！真係他媽的豈有此理！」