［重口味］SEX x FAMILY: 第三十七回 紅顏

第三十七回 紅顏
（十多年前）

眼見老豆間公司生意越嚟越差，志文結婚無耐就決定返上去接手。
呢個階段好辛苦乜都要親力親為忙過不停。

就好似今日咁作為公司高層，志文都要落手落腳係工廠幫手，為出貨做最後檢查。做做下望一望鐘於是話：「大家快啲手，啲送要準時出發。」

志文攞起每一件產品檢查過無問題就放返入箱，確保運出去嘅每一件產品都唔會有瑕疵。



當佢埋頭苦幹嘅時候有一把女性聲音問：「仲有幾耐做曬？」

志文回頭一望，見到一個短頭髮好高嘅女人，
「愉悅，妳嚟得啱，過嚟幫手最後呢批貨啦。」

愉悅立即除低件黑色外套，一身中性打扮白卹衫長西褲，完全冇化妝面容有啲蒼白，望落仲有少少男子氣概，企喺志文身邊同佢一樣攞係每一件貨睇一睇。

就喺佢地忙緊時，突然聽到大門口有人大叫：「所有人停手！！」

志文望向遠方，見到有幾個著整齊公安制服嘅人企係到指住做緊嘢嘅人要佢地停手。



志文眉頭一皺細細聲講：「又係呢班麻煩人。」

愉悅只係講咗一聲：「交比我啦。」
然後立即放低手上面嘅嘢行過去話：「黃隊長，咁得閒過嚟呀。」

黃隊長望住愉悅笑笑口話：「無，睇下有無人做嘢唔啱手續啫。」

愉悅好有禮貌咁微笑：「當然，我地做生意一定會跟足指示辦事。」



黃隊長繼續話：「咁就要查過先知。」

講完指示手下行過去打開啲貨，其他工人當然好緊張，因為啲貨啱啱封箱，比佢地搞一搞有排都出唔到貨。

愉悅當然知道佢想做乜，要打發呢啲人只有一個方法。
「黃隊長，呢啲粗重嘢唔洗你親自郁手啦，不如我同你上寫子樓涼下冷氣先，我買咗啲新茶葉特登比你試。」

黃隊長微微一笑對住手下講：「你地喺到等我。」
之後就跟住愉悅行。

係大陸做生意幾乎每星期都有唔同單位上門搵著數，有啲攞正牌，有啲魚木混珠，根本唔知邊個真邊個假，如果你唔比就有排煩，志文都見到麻目不過都無辦法。

所以每次有人上門都由愉悅應付，佢對呢啲人有一手。
志文亦無咁多時間招呼佢地。



做生產最後一環永遠都係最緊要，只要把關唔好隨時全部貨退返轉頭。搞咗成個鐘終於望見曙光，志文將手上最後一件貨睇過冇問題就放返入箱。

睇住啲貨慢慢搬上貨車，終於可以鬆一口氣。見到愉悅同黃隊長係寫字樓落呢，收咗錢當然笑笑口同志文打招呼。志文只好回報一個微笑。

送走咗黃隊長愉悅行返去志文身邊話：「啲貨搞掂晒？」

志文點點頭話：「無啲麻煩人阻住當然得。」

愉悅笑笑口話：「嗰個麻煩人唔係我丫嗎。」

志文話：「無妳喺到真係唔知點算，辛苦曬妳。」

愉悅搖搖頭話：「唔辛苦，都習慣㗎啦。」

志文拍一拍佢膊頭話：「行啦，我有啲肚餓，去食啦。」


兩個人離開工廠，志文揸車去到附近一間餐廳，坐低好快就叫咗嘢食。

「你幾耐冇返過屋企？」愉悅問。

志文諗咗一諗話：「兩三個星期左右。」

愉悅再問：「有冇掛住老婆呀？」

志文笑笑口話：「掛住屋企張床多啲。」

「唉。。。做女人真係慘，一個人要照顧兩個細路，又要返工，個老公又成日唔喺度。」

志文一邊飲啤酒一邊講：「唔好講到我咁不負責任好唔好，我都係為咗頭家啫。」

「 家。。。有又煩冇又煩。」



「你一個人生活唔悶咩？」

愉悅耷低頭有啲失落話：「習慣囉，咁多年都係咁。」

「快啲搵個人囉。」
愉悅抬頭望住志文苦笑話：「你覺得真係咁易？」

「未試過又點知冇機會？」

愉悅明顯有啲失望，又再耷低頭話：「隨緣啦，我呢類人都注定一個人過。」

食完嘢兩個揸車返公司繼續做嘢，一做就做到深夜。
「乜咁深架啦。」志文話。



愉悅望望錶話：「係喎，原來差唔多十二點。」

「收工啦。」志文講完就起身拉愉悅一齊走。

志文揸車好快返到住所，佢同愉悅住同一樓層，當升降機去到10樓時，𨋢門打開志文向左行，愉悅向右行。

志文打開大門，轉身睇住準備開門入屋嘅愉悅。
忽然問：「想唔想過嚟飲杯嘢。」

愉悅回頭一望，見到志文做咗一個歡迎入內嘅手勢。
成年人夜媽媽，有一個男人邀請入去佢間屋。傻嘅都知道想做乜啦。

愉悅停喺門口諗咗一諗，然後話：「都係唔好喇，我有啲攰想早啲休息。」

聽到呢個答案志文面上明顯流露出一個失望嘅表情。
「咁早啲休息啦。」

未完待續