【真人真事】冤冤相愛何時曉？: 13.

 「話說呢，你contact set我咩名。」或許是她不想繼續上一個話題，因此便隨便轉了個話題。

「吓...無呀，咪周楉童咁囉。」

「吓唔得囉，我唔鍾意你set呢個名囉，一！啲！都！唔！特！別！」

「咪又係名...咁你想我set你做咩吖？」

「咁我又諗唔到喎，你自己諗掂佢啦下，總之我唔要你set做周楉童！」





「哦！我諗到喇！」我邪笑著說。

「肯定唔方係好嘢嚟囉，你諗嚟諗去咪又係set返咩港女呀嗰啲。」

「吓？吓吓吓？點解你會估到嘅！？」我一臉驚訝地問。

「呵，都話本小姐聰明㗎啦~唔得唔得，我都應該改返你個名，既然你叫我做港女，我都要set你contact做賤人。」

「屌我根本就唔賤囉好無？」我不忿氣地說。





「哼！咁我夠唔係港女啦！」

「唔理點都好，你個contact名已經set咗做港女。」說時遲那時快，我已經把她的contact改了。

「唓，得你識改咩而家，我夠改咗咯。」

自此之後，我跟她便再沒有用彼此的真名稱呼過對方，我只會喚她作港女，而她呢，則只會叫我做賤人。

之後的日子嘛，還是如常的過，跟唐狗打機，跟周楉童傾電話，偶爾就幾個人一起出去玩，有空就取笑一下周楉童跟賢仔的關係。





後來有一天，賢仔在whatsapp上做了個類似表白的行為，結果就被周楉童毫不留情的Block了，而我們這個四人組亦正式隨之要結束。

事因這不是故事的重點，所以嘛，還是輕輕帶過就好了。

那既然這不是故事的重點，那為何我要提起呢，因為我想大家記得一句至理明言，就是人類總是會犯同樣的錯誤，歷史總是會不停重演的。

賢仔表白後被人block了的後一晚，我跟周楉童就跟平常一樣聊天。

「喂喂喂，不如我地玩個遊戲，輸咗嗰邊呢就要講個秘密俾對方知，好唔好。」周楉童語帶興奮的問。

「唔要。」而我則是冷冷的拒絕，因為我深知不會有甚麼好事情會發生。

「唔得！一定要玩！我要玩！你唔玩我以後都唔打俾你！」此刻的她就像個扭計要父母買玩具給自己的小孩子，死都要我跟她玩這個遊戲。

「唉玩囉，玩咩吖？」





「我地玩，聽朝五點準時打俾對方，如果邊個無係五點打俾對方呢，邊個就輸！」

聽罷我呆了一呆，因為我認為遊戲最重要的元素就是要有趣味性，而我完全不理解這個遊戲到底有甚麼趣味可言。

「喂？好唔好呀？玩唔玩呀？」她叫我久久不回應，於是便又再追問。

「都唔公平嘅，你平時成朝早六點先瞓，我夜晚十一點就瞓，你實贏㗎喎...」

「你俾啲誠意啦，你真係想玩嘅話咪較鬧鐘起身囉！係咁，約好咗㗎喇，邊個無打俾對方邊個就要講個秘密俾對方知！Good night~」未待我拒絕，她便已經掛了電話，而我呢，思考了一會到底應否五點起身跟她玩這個遊戲後，便果斷決定，繼續睡覺。

因為媽媽說睡多點覺才能長高，暫時中三身高只有一米五的我必須要努力睡覺。







得閒咪fol下我ig囉：maanyin05