【真人真事】冤冤相愛何時曉？: 12．

「咪住先！你又話你已經鍾意咗周楉童，咁點解你係長洲嘅時候唔把握機會教佢踩單車呀或者製造下啲私人空間同佢有多啲交流嘅？」淇姐舉手發問。

「係嘅，嗰時我已經鍾意咗佢，之但係一嚟我又唔係好敢俾佢知我鍾意佢，所以咪無刻意製造啲私人空間囉。至於點解唔教佢踩單車而係直接踩走呢...我諗嗰時嘅我覺得咁樣可以激嬲佢然後吸引到佢注意力掛...？唉我都唔記得啦隔咗咁耐...」我認真思索片刻後回答。

「搞錯呀個腦裝咩㗎你...咁就算好似你咁講都好，但係你都無理由俾機會賢仔㗎嘛？你間接俾咗咁多空間賢仔同佢獨處。」

「本身呢，我都有啲驚嘅，或者應該話我覺得周楉童係鍾意賢仔嘅，畢竟一開頭見佢咁關心賢仔，又諗晒方法開解佢咁。」我喝了一口酒後繼續說：「之但係去完長洲之後個日呢，我就如常同佢傾電話啦，越傾我就越覺得其實佢並唔係好似我諗咁鍾意賢仔。」然後我便繼續回顧往事...

去完長洲的第二天，正當我在跟唐狗打機時，電話鈴聲響起，所謂魚與熊掌不可兼得，於是我在電光火石間做出了選擇，就是繼續打機。





過了一分鐘後，電話又再次響起，無奈的我只好拿起電話。

「你所打嘅電話暫時未能接通，請等我打完機之後再打過嚟吖。」我說。

「妖！死賤人！我唔制！我要你而家就同我傾電話！」

「唉傾囉傾囉，唔打機囉。」魚與熊掌的確不可兼得，所以最終我在唐狗跟周楉童之間還是選擇了美人。

「我想講呢，賢仔呢個人最近好weird囉。」周楉童直入主題說。





「係，點weird~法呢？」我刻意模仿她說weird時的語氣。

「啫係自從佢同我講佢要留級之後呢，成日都會msg我呀，或者打俾我，又成日問我打唔打機，跟住琴日仲不停捉住我同我傾偈，一日最衰都係你個賤人，明明勾好手指尾㗎嘛，又無啦啦同個唐狗兩個走咗去，嗰個唐狗都無改錯名，真係狗嚟！不如你都改名叫雲狗算啦你咁賤。」她連珠炮發地說，明明上一刻還在說賢仔，下一刻就在攻擊我。

「嗱嗱嗱，咁又唔好狗狗聲咁難聽，講返賢仔先啦...可能佢一時間留級唔開心想搵人傾下偈啫，你咪陪下佢囉。」而我心中當然還有另一個答案，那便是賢仔跟我喜歡上了同一個女生，不過此時此刻我又不好意思明言。

「妖，陪乜鬼啫，好得閒咩。」

「嗱不如咁啦，由今日開始你唔好再打俾我，你改做打俾佢，咁咪有時間囉。」我開玩笑的說。





「哦，你而家係咪好唔想同我講嘢先？」

「咁又唔係～俾啲機會你同賢仔發展嘛。」

「你食屎啦，撚得閒同佢發展呀。」

「喂認真，如果而家佢同你表白，你會唔會應承？」

「哎呀雲思哲你真係好撚煩呀！都話唔鍾意佢咯！」她在電話的另一頭怒吼著說。

聽到這句，我的心瞬間安定了下來，因為起碼我清楚知道周楉童不喜歡賢仔，那就證明我少了個對手。



得閒咪fol下我ig囉：maanyin05