【真人真事】冤冤相愛何時曉？: 前言

「如果你寫低我地嘅故事，然後當你個故出街，我地就嚟見一面。」 

「吓？你認真嘅？」 

「好唔好先？最多我著埋黑絲出嚟。」 

「嗱！你話㗎！唔準反口㗎！」 

「勾手指尾。」 





「勾手指尾。」 

就係咁，棄筆多年嘅我突然又有返動力寫嘢，寫低屬於我同呢個女仔嘅故事。


有人話，初戀總係美好的，因為初嘗愛情，對愛情嘅美好憧憬總會投射到這段感情之中。 

有人話，初戀總係震撼，令人印象深刻的，因為好多嘅第一次，都係同對方一齊試一齊去經歷。 

有人話，初戀係充滿住遺憾的，因為第一次拍拖，尤其年少無知入世未世，談嘅就只係一場懵懵懂懂嘅戀愛，好多事唔識點去處理，到真正識得愛，但已經無法挽留。 





你問我，點解會決定寫自己嘅故事，可能係因為唔捨得呢段回憶所以想好好回味一下，可能係因為我想寫返嘢，又可能係，我單純想將我嘅青春好好咁紀錄低，當然，主要係因為想睇佢著黑絲（歪頭燦笑）。 

呢個故呢，基本上都係我嘅真人故事，可能有啲位會悶，可能及唔上其他愛情故事個種戲劇化嘅劇情(雖然我個人覺得其實我個故事都夠晒戲劇化yay)，可能穿插咗啲唔關愛情，純粹係我校園生活嘅嘢入去，又或者有啲位好九唔搭八好唔make sense，皆因現實就係發生咗啲咁嘅事我都解釋唔到，畢竟我又無上帝視角，咁呀鍾意睇咪睇埋落去囉，覺得悶嘅你嚟搵我，我有好多好故推介俾你，或者你搵返啲故俾我睇都好，我搵故睇搵得好辛苦sad。

鍾意一個人好易，但係愛一個人好難。 

利申女主角個名係佢特別要求用周楉童，同我鄰居故嘅主角係一啲關係都無純粹撞名only唔好搞亂。 

再利申寫咗六千字左右先發現，原來寫故好難，寫自己嘅故事原來仲難過寫作嘅故仔on9，寫到散捜捜咁，希望寫到後面有返條主線會好啲，我自己都覺得寫得好差，好多位其實好拖但係又唔可以唔講，然後自己睇返都覺得有啲悶，唉不過算，反正個故都唔係求好睇而寫，完！





得閒咪fol下我ig囉：maanyin05