一覺睡醒，發現阿爸變成女人: Ch.27

「喂？」他率先開口。

 「喂？你去咗邊？」我單刀直入問。 

「呃，我坐緊車翻嚟，你唔係去翻工？」他緊張吞吐着，就像有所隱瞞。 

「我今日請假，有事問你。」 

「你問。」





 我望向婆婆一眼，若在她面前說出昨天的事，她定找住我不放，要我解釋來龍去脈，單是想像已覺麻煩困身，還是待阿爸回到家中，才問個究竟。 

「一陣再講，我去咗婆婆屋企。」 

「吓？哦⋯⋯咁我過埋嚟？」他語氣帶點驚訝，但又像意料之中，隨即平伏下來。

 「唔洗，我都準備翻屋企。」  

「好。」 掛線後，我隨即收拾物品，與婆婆簡單交代幾句，便道別回家。臨別之際，她卻把我叫住。





 「承宗。」 我下意識回首。 

「有時閒多啲上嚟，我煲湯比你哋飲。」

 如同「得閒飲茶」般，飲茶從來並非重點，只不過是編個理由、找個聚腳點，好讓大家能見面聚舊，能暢所欲言，閒聊生活瑣碎事。套用飲湯說法，道理如是。 

「O⋯⋯好啊。」換是以前，我大概會敷衍回應，不當成一回事，逃避出席家庭聚會，害怕與親戚見面，被她們質問一番。

說實話，現時面對婆婆，內心仍有一絲怯懦及恐懼。每次對話，總不懂招架應對，總焦急想離開。 





「你飲唔飲粟米紅蘿蔔湯？」她笑說。

 「無所謂，我咩都飲。」 

但自己隨年紀漸長，隨他們身體漸老，他們話題從日常生活，轉到揾食艱難、再苦笑驗身報告，恍惚能預視到，聚會人數將逐一減少，也許最後，只會剩下自己，同為全枱最年老的人。 

趁婆婆現時身壯力健，抽空前來陪伴，其實沒甚麼大不了，好比他日於病床前哭訴，後悔時間太少，話講不完。 

時間，說是永無止境，卻又少得可憐。 

各取所需、滿足彼此，何樂而不為？ 

說到底，還不過是令自己好過點，不再留有任何遺憾。 

所謂遺憾，就是曾經可以。