一覺睡醒，發現阿爸變成女人: Ch.19

下車後，我未有直接走向住所，而是於附近走好幾圈、買他們喜歡餐點，以此作藉口，理由尚算充份合理吧？ 

「叮噹——叮——噹——」 

我拿着兩袋外賣，心臟緊張得撲通亂跳，明明從小見到大，感情竟未因時間增長，而是越見越尷尬。

 不知從何開始，「親戚」成為「陌生人」代名詞，比路人更為生疏。 

「承宗？你唔洗翻工咩？做咩咁早過嚟嘅？」婆婆表情既驚訝又疑惑，似乎不解我突然出現原因。





 未等我開口，她隨即提起我手上外賣，轉身走進屋內。 

「我自己拎就得，婆婆你坐低休息下。」我試圖取回外賣，她竟避過且越走越快：「唉呀洗乜買咁多嘢食，我煮比你咪得。」 

「阿爸無嚟到？我以為佢過咗嚟。」從大門脫鞋位置可見，阿爸確實不在。 

如果未有前往婆婆家，那他一大早出門去哪裏？ 

「你老豆今日無嚟喎，佢尋日唔係整雞飯比你食咩？」婆婆反問道。這次換我一頭霧水，驚訝她居然會知道。 





「點解你會知？」難道媽咪早就回來，且借用阿爸身體探望婆婆？ 

「得你唔知咋嘛。」她偷笑，「咁佢整得好唔好食？」

 他們都知道？ 

「好食，係細個食嘅味。」我心不在焉回答，繼續追問：「阿爸話你知？」 

「佢特登揾我學煮飯。」我詫異呆着，她接着說：「佢覺得外賣唔健康，想學煮飯比你食，我問佢想煮咩，佢即刻話要整雞飯，因為你以前最鍾意食。」 





「⋯⋯」我震驚得無法反應過來，那雞飯，不是由媽咪親自下廚嗎？

 「淨係切雞都學咗一星期，只係識用死力，以為大力就得，係咁用力劈，差啲斬埋自己對手。睇到我係咁嗌停佢，要佢慢慢嚟、唔可以心急。點知學好，又話煮得唔好，都係唔煮。」她沒好氣憶述。 

「最後點解會煮？」 

「唉，佢根本就係唔敢煮比你，怕你嫌難食，我都未見過一個男人咁麻煩，六十幾歲人都咁婆媽。 我嗰排為咗教佢，教到刀都鈍埋，點可以話唔煮就唔煮！我叫佢一定要煮，你唔食就我食！」婆婆越說越火大，中氣十足説道：「點知佢話要等，我都唔知等咩，你同你老豆好少講嘢咩？」 

面對突如其來提問，我先是怔一怔，不自覺嚥口水回應：「翻工忙，所以少咗講嘢。」

 「好多嘢做咩？」她緊皺眉頭，「都唔算……」我尷尬一笑。

 「咁咪係，得閒就同佢講多幾句啦，連煮飯比你食都驚驚青青咁。」婆婆邊說邊吃外賣，順帶夾餸給我。 

「唔該婆婆。所以佢尋日就煮比我？」 





「係啊，仲話買咗豬頸肉，話難食都唔怕喎。」 

「佢仲有冇講啲奇怪嘢？又或者把聲變曬咁？」我多番追問，想確定那人是阿爸還是媽咪。 

婆婆微微側頭，思索道：「無喎，都係平時咁講嘢。」

 難道一直以來，「媽咪」都是阿爸假扮？ 

沒可能，那種神態動作，就算由一流演員扮演，都沒辦法模仿得到。 

到底是怎麼一回事？