捉伊因Z(實體書《3,2,1…捉伊因》已經出版): 陷阱
陷阱
「P、I、A、N、O，鋼琴piano。」樂哥興奮的說，他和阿雲已經對着這十個字母超過十分鐘，總算找到一個像樣點的字。
「咁E、T、F、R、O呢？」阿雲問，剛才還很興奮的樂哥立即靜了，繼續苦思。
「應該係fortepiano，古鋼琴。」一把年青的聲音從門口傳來，回頭一看原來是阿月。
「唔該哂，原來係咁。」樂哥連忙道謝，但同時也提高警覺，試探性的問︰「你哋啱啱綁走咗野仔，而家上嚟想同我哋講數？」
阿月連忙否認，表現親切的一面說︰「我叫阿月，你哋千祈唔好誤會，我哋無惡意。之前發生嘅事幽幽已經講咗畀我知，我都好認同你哋嘅諗法，所以我先特登帶埋佢上嚟同你哋道歉。而野仔喺一樓好安全，佢同我哋另外兩個隊友一齊揾緊錦囊，希望可以快啲結束呢場遊戲。」
樂哥不虞有詐，而的確，阿月的樣子和態度也真的十分誠懇，加上多一個朋友總比多一個敵人好，於是爽快的接受了他倆的道歉。
「快啲將野仔帶返嚟！」阿雲似乎未完全接受他倆，幽幽更被他的激動嚇壞了，立即躲到阿月身後，樂哥連忙作出調停。
「冷靜啲，最少野仔無事先，佢喺下面幫手揾錦囊，證明佢都覺得呢班人信得過，咁我哋更加無懷疑佢哋嘅理由，一齊去揾逃走方法事半功倍。」樂哥勸說，不知何故，只要樂哥出聲，阿雲都會接受。
「鬼大哥，見你咁着緊野仔，我哋快啲解決埋呢個機關攞錦囊先，之後再帶你去揾佢。」阿月提議道，阿雲經樂哥勸說後也點頭。
他們雖然已經知道字母排序，但還未知應該安放在哪才能發動機關，此時幽幽發言︰「啱啱我同Maria媽媽喺度揾過一輪，但都揾唔到啲咩機關，會唔會其實唔係喺呢度？」
阿月卻打對台說︰「我有預感會喺度，我哋再揾吓。」阿月身先士卒四處尋找，不出意外的，又是他找到了機關。
「我揾到喇！我都話會喺度㗎喇。」阿月把貝西斯坦路易十五稍稍推向牆，地板便升起了九個放樂器的支架。
雖然有點好奇，但樂哥還是稱讚道︰「勁勁勁，咁你都揾到，真係勁揪。」然後四人便把樂器按字母排序放好，另一面牆的地板便打開了，他們朝思暮想的錦囊安靜的躺在裏面。
「係藍色錦囊，唔知入面有啲咩。」幽幽好奇的問。
樂哥打開錦囊，內裏有一張紙條寫着「Six feet under」。
「即係點？」大家看到後也猜不到它的意思，字面意思當然很容易理解，六呎之下，亦即暗指死去，但背後的意思真的是這樣嗎？
大家都想弄個明白，但始終未有任何想法，而此時，阿雲亦躁動起來︰「喂，唔好理呢句嘢先，快啲帶我去揾野仔！」
阿月顯得不太願意，因為他想弄明白當中意思，但礙於阿雲苦苦哀求、咄咄逼人，他也只好先以大局為重，一切按他的「計劃」行事。
「好，咁我哋帶佢落去揾返野仔先，你喺度繼續揾，一陣我哋全部人喺度集合。」阿月說畢，便與幽幽帶着阿雲落一樓，阿雲異常興奮，一馬當先跑下去，這一切完全按阿月的「計劃」進行着。
「鬼大哥，唔好行咁快，會嚇親佢哋㗎。」阿月緊跟其後說，阿雲聽到後也放慢了腳步，好讓他們能跟上。
幽幽吃力的跟在他倆身後，勉強能跟上，但已經上氣不接下氣。而事情的發生，就是在二樓到一樓的梯間，剛剛只有阿月、幽幽和阿雲三人，並無其他目擊者。
「啊！」突然，整間大宅都迴響着阿月悲痛的哀號︰「你……你點可以咁樣？果然係信唔過？唔好呀！救命呀！」
在大宅各處專心尋找錦囊的眾人聽到悲鳴後都放下手頭上的事，走到走廊去查看發生了甚麼事。
梯間傳來兩種不同的急促腳步聲，一個比較輕盈，一個比較沉重。腳步聲由梯間傳到二樓，由二樓傳到三樓，傳眼間，樓梯口便出現了阿月慌張的身影，他邊跑邊說︰「隻鬼露出真面目喇！佢捉咗幽幽，然後幽幽就死咗，快啲匿埋呀！」
「咩話？無可能㗎……」樂哥聽到後半信半疑。
KT和福伯則從悲哀的氛圍中回到現實，立即鎖門並躲起來，KT小聲對福伯說︰「我一路都覺得隻鬼信唔過，果然無錯，係陷阱。」福伯不置可否，因為他始終覺得事情必定有內幕。
阿月跑到樂哥旁捉起他的手，一起跑進演奏室並鎖上門，把身後的阿雲隔絕在門外。
「發生咩事？」樂哥問︰「係咪有咩誤會？等我問清楚阿雲究竟係咩事……」語畢他便打算開門，但立即遭到阿月阻止。
「千祈唔好，啱啱同佢落去嘅時候，本身我哋都有講有笑，但唔知點解去到二樓落一樓嘅樓梯嗰時，佢突然發狂，轉身一嘢啪落嚟，好彩我閃得快，但幽幽就避唔切，畀佢捉咗……」阿月聲淚俱下的憶述。
「點會咁㗎？無可能！阿雲唔係咁嘅人嚟。」樂哥還是不願相信。
「樂哥，我都係為你好先話你知，我覺得佢一直都係扮同你哋合作，最後趁你哋放低戒心再捉哂你哋，啱啱喺條樓梯得返我哋三個人嘅時候就即刻原形畢露，你唔見佢啱啱幾搏命咁追我咩？佢想殺我滅口從而滅聲，然後再作故仔屈我哋。」阿月連珠砲發，七情上面，令樂哥一時之間都糊塗了。
「樂哥！」、「樂哥！」、「樂哥！」
阿月不停的說，樂哥被他說得煩躁起來，思緒也完全被他擾亂了，一時間不能運作，失去了往常的冷靜，沒有了判斷力，甚麼也想不到。
「得喇，我知喇，但我哋而家係呢間房入面就好似籠中鳥咁，遲早都會畀佢捉。」樂哥也着急起來。
「呢層你可以放心交畀我，跟我嚟。」阿月說完便走到窗邊，打開了天花板，然後爬了上去，樂哥看到這一幕，心內對阿月的好奇又再多添一筆。
他們爬了上去後，本想直接爬到樓梯前才下來，但樂哥突然說︰「仲有KT同福伯，我哋要救埋佢哋。」阿月欣然接受，便先爬往旁邊的玩偶房。
而在玩偶房內的KT和福伯，雖然用處不大，但還是把房內大大小小所有的玩偶都堆在房門前，盡量增加阿雲的開門難度，不過由於房間不像演奏房般隔音，所以持續聽到阿雲瘋狂的拍門聲，以及發了瘋的嘶叫聲︰「你個仆街同我出嚟！我唔會放過你！你哋小心啲呀！」
每一下的大力拍門聲，都彷彿拍在他倆的心門上，把他們的心也拍出來；每一次的瘋狂嘶叫聲，就好像猛獸對決前的叫陣，把他倆嚇得直直發抖。
他們瑟縮一角，等待奇蹟降臨。
此時，天花板傳來「沙沙」的聲響，接着一聲「嘭」！窗邊的天花板打開了，傳來了熟悉的聲音︰「喂，你哋快啲上嚟，我哋一齊逃走。」
「樂哥！」KT和福伯異口同聲，難掩喜悅的心情。
「一個一個慢慢嚟。」阿月伸出手，福伯抓住了他，然後阿月和KT一拉一推，把福伯安全送上天花板，然後樂哥再拉KT上來。
「你哋點知個天花板有得行？明明點睇都唔似係假天花。」福伯好奇的問。
樂哥並不打算邀功，指着阿月說︰「係阿月嘅功勞。」
阿月靦腆的笑說︰「唔係啦，通常睇戲都係咁，所以我試吓啫。唔好講咁多住，我哋快啲走先，留喺度越耐越危險，我哋快啲落返一樓通知埋其他人。既然遊戲已經重啟，咁大家就一定要有好嘅計劃先可以贏。」
「咁大家跟住阿月，輕力啲、靜靜哋咁爬過去，唔好畀阿雲發現。」樂哥輕聲道，KT和福伯都點頭示意。
就這樣，他們在阿雲的頭頂爬過，而此時的阿雲已經冷靜下來，走到玩偶房前，禮貌的敲門說︰「KT、福伯，我係阿雲，我有嘢想同你哋傾吓，可唔可以開一開門？」
可是沒有回應，阿雲再敲門說︰「我無殺人，我可以解釋，你哋開一開門先。」
敲了兩次門後，阿雲明顯開始急躁起來，再次大力拍門和大聲叫嚷。可是無論他怎樣努力試圖解釋都是徒勞，裏面始終沒有回應，無他，因為房間內早已空無一人。
「你哋出句聲應吓我，定你哋已經中咗佢招？我數三聲，再唔應我就爆門啦！」阿雲作最後通牒，但始終得不到回應，三聲過後，他闖了空門，發現房間內早已人去樓空、空空如也，只得窗邊的天花板開了一個洞。
「可惡！點解你哋硬係唔信我……」阿雲怒氣值不斷上升，正好此時，樓梯處傳來重物跌的聲音，他回頭一看，看見樂哥等人在天花板跳下來，往二樓走去，走最後的阿月還特地回頭定睛看着他，挑釁性的做了一個開槍手勢，然後跟着跑走。
看到這一幕，阿雲的怒氣直達沸點，再也不能容忍了，他決定要把阿月捉到手。他閉目，深深吸了一口氣，再整理了面具，再次張開眼時，雙眼充滿了殺意。
「唯獨阿月呢個人，絕對唔可以放過！」阿雲跟自己立誓，然後故意用力的踏每一步，使得整棟大宅都迴盪着他的腳步聲，他要用腳步聲跟大家宣布︰「捉伊因而家正式開始！」
+×+×+×+×+×+×+×+×+×+×+
「喂，你哋聽唔聽到，樓梯嗰面好嘈，係咪發生咗啲咩事？」野仔問。
老鬼和Maria媽媽都放低了手頭的工作，躲起來以防萬一，但始終等不到有人走下來，反而隱約聽到有人求救︰「唔好呀！救命呀！」
老鬼立即認得出這把聲，心裏暗自歡喜，但口還是故作擔心說︰「係阿月，佢係咪發生咩事？唔通上面班人捉咗佢？」
「唔係啩？咁就麻煩喇，幽幽點算？會唔會畀佢哋先姦後殺？一個大好女子，咁樣畀人沾污完再無埋條命，真係命苦。」Maria媽媽的想像力非常豐富，越想越怕，最後展露她充滿母性的一面︰「唔係喇，幽幽唔駛驚，Maria媽媽而家就嚟救你！我講過會保護你，而家就嚟喇，等我！」語畢，她拿起長笛便往樓梯方向跑去。
「等埋我！」野仔亦跟了過去。
老鬼想阻止他們前去幫忙，但礙於斷了一條腿的關係，縱然使出全力依然是追不上兩人。
「嘖，唯有希望佢哋同嗰個仆街一齊畀隻鬼捉哂，減少競爭對手。」老鬼心想，可是下一秒，樓梯便傳來Maria媽媽的慘叫。
老鬼聽到後第一時間便找一個最近的藏身之處，並暗自竊喜︰「又捉多件，正！」
「點解……點解……你又話佢唔會再捉人？果然無人係信得過！」樓梯處再度傳來Maria媽媽的責罵聲，中間夾雜着哭聲。
「唔好唔開心，人死不能復生，當中一定有蹊蹺，阿雲唔會咁做……可能係佢心急得滯叉錯腳跌落樓梯，阿雲想保護佢下意識捉實佢呢……」野仔雖然口裏還是為阿雲辯護，但都知道是百詞莫辯，心裏亦開始產生懷疑。
「頂！搞錯，乜咁都無事㗎。」老鬼大失所望，於是辛苦的拖着瘸腿走到樓梯前，哭喪着臉的說︰「可惡呀！阿月點做嘢㗎？唔係應該會保護幽幽㗎咩？點解佢會死咗㗎？一個咁好嘅女仔點解要死？真係罪無可恕，我一定會幫你報仇，你好好安息。」
說完之後，他又走到Maria媽媽身邊安慰道︰「雖然識咗你哋好短時間，但都睇得出你哋情同母女，我衷心感到難過，我哋好好咁安葬佢啦。」
他們合力把幽幽的屍體搬到開始之房旁的房間內，這間房放滿冷凍食品，是一個冷藏庫，用來擺放屍體正好適合。
「呼……凍到震，入一入去都差啲頂唔鬼順，畀人困喺入面實凍到結冰。」老鬼往凍得無血色的雙手呼氣，同時臉部有零點一秒的抽搐。
「幽幽，你好好休息，Maria媽媽會幫你報仇。」Maria媽媽雙手合十、閉上眼默念着。
野仔定睛看着幽幽的屍體問︰「點解佢好似少咗啲嘢？」
聽到這句話，Maria媽媽立即睜大眼睛查看，然後說︰「細路，你唔好亂講，邊有嘢少到？」
「唔係喎，等陣先，睇睇吓，又真係好似有啲嘢少咗。」老鬼正好逮到中傷阿月的機會，他扮作認真查看屍體，然後說︰「佢條電子手環唔見咗！」
聽此一說，Maria媽媽立即查看幽幽雙手，甚至搜她的身，但真的發現不到電子手環的蹤跡。老鬼立即引導眾人︰「可能係阿月偷咗，然後推佢落樓梯，最後扮受害者喺度大叫想屈隻鬼。」
「都有可能喎，我始終相信阿雲唔會亂捉人。」難得有人支持，野仔立即替阿雲辯護。
「嘩！講嗰個唔笑，聽嗰個都笑啦，咁嘅故仔你都作得出？你唔好去做大台編劇？好明顯幽幽就係畀隻鬼捉，個手環肯定係隻鬼攞埋。Maria媽媽信阿月係好人，因為幽幽都信佢。」Maria媽媽堅持己見，沒有動搖，甚至還訓斥道︰「老鬼，個細路入世未深畀人呃都算，做乜連你咁大個人、經歷過咁多嘢，都仲係不分青紅皂白？Maria媽媽對你好失望，我哋理念唔同，唔可以再一齊行動。」
雖然她作用不大，但多一個人多一分力，為了報復阿月，多一個人也是很多，老鬼立即七情上面，向她坦白︰「你老闆！你估我隻腳係自己仆街仆斷？好人好者點會無啦啦斷，你有無諗過？係條仆街拗斷我㗎！我為咗揭發佢而畀佢滅口，但好彩我識做人，先勉強保得住條命。佢肯同我組隊都係睇在個錦囊份上，唔係你哋咁啱落到嚟，個錦囊佢已經據為己有。我估計到而家所有嘅事都係佢已經計算好，我哋全部都係佢嘅棋子，佢份人唔簡單㗎。」
Maria媽媽聽到後反應很大，但卻不是朝老鬼所想發展。
「居心叵測！」Maria媽媽拋下四個大字便拿着長笛走了，留下老鬼和野仔在原地。他倆四目交投、面面相覷，尷尬的氣氛維持了數十秒，野仔率先開口︰「可唔可以講多啲你話揭發佢係點解？」
「我懷疑佢唔係第一次玩，又或者佢係媒，背後有人幫。」老鬼調整聲線，故意營造出懸疑氣。
野仔聽到後有點驚訝，不禁追問︰「咁爆？佢做過啲乜令你懷疑？」
「佢條仆街好似特別容易揾到啲錦囊，完全知道哂放喺邊鬼度咁。無親眼見過你係唔會信，連嗰啲喺暗格暗到你唔會想像到，亦都完全無提示嘅地方，佢都可以一下子就揾到出嚟，你話有無可能？一定係本身知道收喺邊先會揾到。」老鬼激動的說。
「如果真係咁……」野仔思考了一下說︰「咁樂哥佢哋就好危險，阿雲會再次被孤立，場遊戲就會再次開始，咁就會再有人犧牲，唔可以畀呢件事發生。」
「我哋一齊去阻止佢！」野仔望向老鬼，同時伸出右手。
老鬼猶疑的問︰「我哋？憑咩？一個跛佬同一個細路，盞送死。」
野仔自信的道︰「我自然有辦法。」