捉伊因Z(實體書《3,2,1…捉伊因》已經出版): 組隊
組隊
「估唔到會發展成咁，interesting。」Sigmund Freud顯得十分興奮，並且用紙筆記錄下事態的發展。
一旁的Erik Erikson則顯得有點不滿，視線離開平面圖，故意對着幹︰「咁真係好咩？我哋籌備咗咁耐嘅實驗會泡湯，我哋嘥咗心機之餘，班金主都唔會滿意。計我話，我哋干涉吓令個實驗繼續向正常方向發展仲好。」
Sigmund Freud聽罷笑了，也轉身面向Erik Erikson問︰「What is the right direction？我覺得順住佢哋自由意志去進行，就係正確方向，任何額外干涉先係唔正確，你覺得呢？」
箇中道理Erik Erikson當然清楚，只是他不想這個花了兩人上半生時間籌備的實驗最終失敗收場，所以才着急。
「我只係想將個結果導向我哋嘅hypothesis。」他低着頭說。
「而家個實驗都未完，你又點知最後唔會係我哋想要嘅結果？再講，你一直認為事態發展唔按我哋預期咁進行，咁你認為喺邊一part出錯，導致個實驗變到咁？」Sigmund Freud神態自若的問。
Erik Erikson不假思索立即回答︰「我覺得由選人開始已經錯，嗰個選人準則導致有而家呢個結果。」
「不過呢個選人方法係你同我都agree，認為係可以揾到最符合實驗需要人選嘅最佳方法，點解因為實驗中期嘅走向不似預期而推翻自己嘅決定呢？」Sigmund Freud繼續問。
Erik Erikson語窒了，他想反駁但又不想承認自己的錯誤，但更加不忍心破壞與Sigmund Freud多年的夢想，決定給他最後一次機會，於是別過臉，冷冷的說︰「啱啱班金主打畀我，佢哋對而家咁好唔滿意，想我哋做啲嘢。」
「由得佢哋唔滿意，我係唔會干預個實驗，呢條係我嘅bottom line。」Sigmund Freud斬釘截鐵的說。
「咁無辦法，機會我都畀哂你。」Erik Erikson心想，之後回答︰「咁好喇，繼續跟住你嘅計劃去行。」
對話完結之後，他回到自己的座位，盯着監視器上的某人唸唸有詞，之後那人看了一眼攝錄鏡頭，造了一個不文手勢之後便離開了。
+×+×+×+×+×+×+×+×+×+×+
「啦啦啦啦啦甚麼信物，平貴都，無謂理……我記得喇、我記得喇，係《給愛麗絲》！」幽幽突然大叫，難掩興奮的心情，不過下一秒便打回原形，一臉疑惑︰「首歌關咩事呢？」
聽到幽幽的答案，Maria媽媽亦有所啟發︰「你咁講，Maria媽媽都記得，呢首係貝多芬嘅《致愛麗絲》，從來無公開發表過，不過咁又代表啲咩呢？同錦囊有咩關係？我都搞唔清楚。」
對着這首樂曲，她倆都一籌莫展，沉入了思想的死胡同。
「份譜咁完整，點睇都唔似係撕爛，我懷疑根本就係得咁多，線索就係喺呢份譜入面。」Maria媽媽說。
「會唔會係同啲豆豉嘅分佈有關？」幽幽嘗試提出意見，但很快便自我否決︰「點睇都唔似係啲咩有意思嘅嘢。」
這段對話後，她倆又再次墮入思海的深處。
良久，幽幽打破悶局，率先發言︰「我哋喺度花得太多時間，咁計落唔划算，我哋skip咗佢先，可能其他人會解到呢個謎，我哋而家去揾第二個錦囊先好啲。」
Maria媽媽點頭表示同意，之後她倆便離開演奏房走到大廳，與樂哥一行人撞個正着。
「小心啊！」幽幽對着他們大喊，之後她迅速逃跑，Maria媽媽看到他們身後的人也同樣一溜煙跑走。
「等陣……」樂哥雖然立即叫停她們，但她們依然頭也不回的逃回演奏房。
「或者等我去同佢哋解釋清楚，」野仔自告奮勇︰「你哋繼續揾錦囊。」
大伙都同意後，他便獨自走到演奏房前，敲門道︰「隻鬼而家同我哋同一陣線㗎，唔駛驚，我慢慢講畀你哋聽發生咩事，你哋開門畀我入嚟先。」
可是任憑野仔如何敲門，她們始終不願開門，因為演奏房的隔音實在是太好，她們根本不知道有人敲門。
「隻鬼睇住我哋入嚟，捉哂佢哋之後，好自然就會嚟捉我哋，我哋實輸㗎喎，我要贏要錢，唔可以咁就輸。」幽幽擔心的說。
「唔駛驚，Maria媽媽喺大廳。我知有條秘道，其實我啱啱都係由嗰度上嚟，不過隻鬼喺度嘅話，條秘道只係用得一次，以後就會作廢，所以未到最後，我都唔會想用到佢。」Maria媽媽認真凝重的說。
「咁我哋仲等啲咩？行喇！」幽幽拉着Maria媽媽就跑，Maria媽媽立即制止她道︰「冷靜啲，我哋都要首先確定吓係咪安全先得㗎，萬一隻鬼喺出面等我哋，咁咪一出即輸？」
「你又有道理，」幽幽停下來，回頭問︰「咁點確認？」
這一問，把Maria媽媽也難倒了，因為她壓根沒有想到好辦法，只是不想貿然衝出去被抓到。
門外的野仔已經敲了不下百次的門，喊「喂」也已經喊了快上千次，已經有氣無力了，但房內的兩人依然沒有任何動靜。他已經有點不耐煩，開始由敲門變成拍門、拍門變成捶打門，差點把門也打爛。
「或者我哋一人拎件樂器當武器，隻鬼嚟嘅時候就打佢，希望爭取到逃走時間。」Maria媽媽想了良久才想到一個好像有點用的辦法，幽幽也只好同意，畢竟總比沒有辦法來得好。
「一、二、三！」手執小提琴的幽幽打開門，Maria媽媽拿着長笛閉上眼衝出去亂打一通，幽幽也緊接着用小提琴胡亂揮舞，站在門口的野仔慘成樂器下的亡魂。
「哎呀！痛！等陣！停！」野仔連喊數聲，她們才睜開雙眼恢復理智，野仔邊揉着被打的頭邊說︰「你哋冷靜啲，而家情況唔同哂，我哋已經決定停止場遊戲，一齊合作專心揾錦囊，然後一齊離開呢度，唔會再有人犧牲。」
「吓？」這是幽幽的第一個反應，她接着問︰「場game可以你哋話停就停？未完點離開？同埋咩犧牲？」
「鬼唔捉我哋就自然停咗；揾到錦囊就會有教我哋離開嘅方法，呢個係由Sigmund Freud口中推斷出嚟﹔至於犧牲……」野仔在此處頓了一頓，偷偷吸了一口氣然後微笑着說︰「咪就係字面意思，總之而家我哋全部人係同一陣線。」
Maria媽媽覺得事有蹊蹺，立即反駁︰「你唔畀隻鬼係扮好人，group埋哂我哋之後一次過捉哂我哋？咁樣最慳水慳力，唔駛行咁多去揾，獵物自己送上門。總之Maria媽媽我就點都唔會信佢。」
野仔感到為難了，他無法釋除她的這個疑慮，始終這個假設的確很合理，而且在各方面來說也很合乎邏輯，可是鬼剛才的痛苦表現絕對不像演戲，看得出完全是發自內心，加上自己本身對他有種莫名的熟悉感，因此偏向相信他。
「我唔知應該點同你解釋，但我覺得佢係真心唔想殺人，唔係做戲嘅。」野仔堅定的說，可是這話一出，頓時令到她倆嘩然。
「殺人？你話隻鬼殺咗人？你黐咗線呀？咁仲叫我哋同個殺人兇手一齊行動？你有咩陰謀？係咪想殺埋我哋？」幽幽瞪大雙眼，不管是出於吃驚還是憤怒，她都已經用手上的小提琴抵着野仔的頸項，推他離開。
「等陣！」Maria媽媽阻止了幽幽︰「唔好推佢走。」
幽幽十分驚訝的看着Maria媽媽說︰「點解？你唔係信佢亂噏啩？」
Maria媽媽搖搖頭，走上前用長笛架着野仔的頸，然後對幽幽說︰「佢同隻鬼係一伙，隻鬼唔會傷害佢，所以我哋要利用佢做擋箭牌，幫我哋安全離開呢層。」
「Good idea！果然係有啲計。」幽幽再次罕有的稱讚道。
她們脅持着野仔，由演奏房慢慢移動到大廳，再走經四間睡房，但就在第三間睡房前，正好跟樂哥和阿雲打個照面。
「你哋想做咩？」阿雲衝上前怒吼道，樂哥立即阻止。
「你咁會嚇親佢哋，等我嚟。」他走上前對幽幽和Maria媽媽說︰「係咪有啲咩誤會？到底發生咗咩事？」
幽幽和Maria媽媽看到阿雲剛才的怒吼已經嚇得魂不附體，緊抓着她們的救命稻草野仔不放，令野仔更感不適。
Maria媽媽躲在野仔身後戰戰兢兢的答︰「你哋同隻鬼同流合污想捉我哋，我哋係唔會中計！你哋唔好行埋嚟，否則我對佢唔客氣！」
樂哥維持一貫的温暖笑容，和藹可親的說︰「你哋真係誤會咗喇，隻鬼真係同我哋聯手，一齊完咗個遊戲，唔會再捉人，唔係fake你哋㗎，我哋有事慢慢講，放咗野仔先。」
「我哋有人質喺手你梗係咁講，到我哋放咗佢之後，你就翻轉豬肚，你估我哋唔知你籠嘢？」幽幽大聲反駁，KT和福伯也忍不住過來湊熱鬧。
「嘩！你哋而家諗住圍我哋？我哋先唔驚。Maria媽媽我嚇大嘅！」Maria媽媽故意加大聲量壯膽。
「阿嬸，慳啲啦，要圍你你一早畀佢捉咗喇，仲駛乜喺度同你咁多嗲？」KT看不過眼，態度惡劣的說。
「喂，唔好咁講，大家坐埋同一條船，你咁只會嚇走佢哋。」福伯立即喝止KT，KT連忙道歉。
「我哋真係無惡意，只係想盡快安全咁完咗個遊戲走人，你哋唔係都想咁咩？所以我哋先合作去揾錦囊同share。」樂哥繼續遊說她們。
「你哋唔駛狡辯，總之我哋係唔會信，你哋唔好行埋嚟，如果唔係我都唔知會點做啲咩出嚟！」幽幽也非常強勢的要脅道，接着她們便慢慢退到樓梯，帶着野仔消失在二樓樓梯的盡頭。
「就咁由得佢哋帶走野仔？」KT難以置信的問。
「梗係唔會，不過佢暫時都安全，所以我哋繼續依計劃行事先，一陣先再救返佢，而且我相信佢有能力令嗰兩個女人信佢。」樂哥決定依計劃行事，大家都同意，除了阿雲。
「唔得，我要去救佢！」阿雲異常激動，現場無人敢用語言以外的行動制止他，因為只要被他的手觸碰到便算被捉，會即時斃命。
「你可以去，我唔會阻止你，我自己都好想去，」樂哥沉重的說︰「但你去咗對件事有咩幫助？係會好咗定壞咗？你自己諗清楚而家最緊要做嘅嘢係啲咩先？你咁衝落去真係救到人？定拿拿臨結束咗場遊戲先會救到佢？」
阿雲聽完樂哥的一番話總算冷靜下來，權衡過利弊後決定還是以大局為重，盡快結束遊戲才是真正救到野仔的方法，於是他們再次投入到尋找錦囊當中。
+×+×+×+×+×+×+×+×+×+×+
阿月到達一樓，頭也不回的走到大廳，一樓大廳佈置了兩張四座位沙發和一個長方形茶几，在角落處還有數盆樹裝飾點綴，為一樓增添生氣。
阿月走到較遠的沙發前，蹲下摸了數下，便在沙發底下找到了另一個藍色錦囊。這個錦囊並沒有任何機關，打開後只有一張紙條，寫着「填滿再填滿，讓我肉身重現人間」。
「今次呢張咁中二，搞乜？」阿月吐槽道。
而此時，老鬼也一拐一拐的上到一樓，看到阿月又再不費吹灰之力便找到另一個錦囊，可疑程度比鄭子誠有過之而無不及。
「唔理佢係有地圖定有人提，我都一定要搶過嚟！」老鬼暗自發誓，但始終未有實際行動，畢竟前不久才被阿月修理完，他心裏清楚要合多人之力才能制伏他，現階段只能繼續觀察，伺機而動。
為了能觀察到阿月的一舉一動，老鬼選擇了最接近廳的尾房躲藏。他小心翼翼的打開門，但還是發出了一聲清脆的「la」，不過他見阿月無反應，也就沒有深究這聲音的來源。這間房是一間普通的套房，並沒有甚麼特別，配備與一般酒店房無異，床、衣櫃、書桌、椅子、電視，並沒有甚麼特別機關和隱藏的暗格，最少他是這麼認為。
阿月拿到錦囊後，又走到欄杆旁邊，轉動了其中兩條欄杆後，便有一個暗格在天花板打開，他推來茶几站上去再跳起，還是差一點點才能拉下暗格。
「麻鬼煩，整個咁難先拎到嘅錦囊，要借欄杆起跳先夠，實在太危險，有無其他工具幫到手？」阿月環顧四周，目光落在欄杆上，他決定拆下其中一枝，他心想︰「既然轉得郁，咁證明佢唔係實淨，可以拆到嘅。」
他出盡九牛二虎之力，始終拆不下一枝欄杆，正當打算放棄之際，他摸到口袋內的小鐵球，於是心生一計，利用小鐵球的重量，將錦囊作為手臂的延伸，一舉把暗格拉下來。
「嘭！」暗格終於跌了下來，裏面裝了一個綠色的錦囊。
「綠色？」他再次獲得不同顏色的錦囊，打開後一看，內裏的紙條寫着「上捉上，下捉下﹔有隔牆，無穿針」。
這句口訣喚起了他兒時的記憶，他心想︰「呢啲係規則？但另有玄機？」雖然一時之間未弄明白，但他還是決定先跑去第二個地方尋找錦囊。
「可惡，唔知佢啱啱嗰個錦囊係啲乜。」老鬼有點煩躁，但也無計可施，只能繼續尾隨阿月，他輕力打開房門，避免再次發出聲響，可是不論他如何小心，那聲清脆的「la」還是響了。
「妖！又響！好彩條契弟聽唔到無回頭啫。」老鬼在心內咒罵那道房門，然後三步併作兩步，一拐一拐的追上前，怎料阿月就站在轉角處的盲點位等待他。
「你呢隻跛腳老鼠仲跟住嚟？你唔會天真到以為我聽唔到啊？係咪要打斷埋你另一隻腳先安樂？」阿月露出狂妄的樣子，雙手伸向老鬼。
老鬼心底想反抗，但想到剛才還健全時已經不是他的對手，何況現在有傷在身呢？正所謂好漢不吃眼前虧，作為社會人又曾經在監獄裏渡過一段時間，能屈能伸是他賴以生存的唯一技能，所以他跪了，還雙手奉上剛才在桌子底下意外得到的透明盒子，說︰「我想同你合作，呢個盒裝住錦囊，我將佢畀你，代表咗我嘅誠意，請笑納。」
「哈哈哈哈！」阿月大笑，趁機嘲諷︰「不愧係一個死監躉，果然好識見高拜見低踩，毫無尊嚴可言，你呢啲咁嘅垃圾，唔死都無用！」
阿月一手搶過透明盒子，另一手伸向老鬼的頸，老鬼眼見方法行不通，打算臨死放手一搏，全力反抗，但，一切都發生得太突然，阿月的手由「叉頸」的姿勢變成「握手」的姿勢，並笑說︰「你唔會以為我係咁諗啊？你腳又被我打跛咗，但都仲咁有心跟埋嚟，而家連錦囊都畀埋我，咁有誠意想同我組隊，我又點會拒絕呢？我哋一於聯手去贏隻game。」
老鬼對阿月態度的轉變之快顯得非常有戒心，但現在能保住性命，還能近距離觀察他的秘密，這也算賺了，其他的只好見機行事，待適當的時候才背叛吧！
於是，老鬼也伸出手，握實阿月的手，簡短的答︰「好，合作愉快。」