前傳——她遇見的第一個金牛座男孩: 中六畢業典禮

我同你足足三年冇再聯絡過，我以為我同你既交集同結局會係咁收尾。

但係我中六畢業個時，我竟然係學校畢業典禮重遇你⋯⋯

我仲記得當下係扮見你唔到，心諗點解你會係到，明明⋯⋯你都退左學好多年。

就係我轉身向後走個時，你叫住左我。

仲係呢把咁熟悉既聲線⋯⋯好耐冇聽到啦我⋯⋯





你好似冇叫過我個名，冇叫停我，但我知你係想叫我，你係想叫住我，我如是者真係轉身望住佢，等佢開口。

「畢業啦你！」

「嗯⋯⋯你⋯⋯⋯點解會係到既？」

「冇丫，我返黎睇下你地姐⋯⋯」

「哦⋯⋯」





「頭先睇住你上台攞獎添。」

「下，原來你連典禮都睇埋，一早就黎左？」

「係丫，恭喜你，恭喜你拎全校最佳舞蹈員獎」

「多謝⋯⋯」

可惜你唔係個個場場都睇住我表演比賽既個個人，你只係個個唔知係咪咁啱出席左畢業典禮既個個人。





「喂，過去影張相先啦！」我既好朋友叫走左我。

「哦⋯⋯我⋯⋯」

「你影啦你影啦⋯⋯」你揮手。

「好啦」

就係咁，你目送我走左，我地就真係畫上左句號。

傻仔，一場黎到都唔敢叫我同你影張相！無膽匪類！

一諗返起你以前都係差唔多一個學期先夠膽打電話比我既你，真係想笑出聲。你好似以前仲大膽啲仲勇敢啲，依家反而⋯⋯

我回過神來既時候，已經唔知你去左邊，只係見到程程企左係我身旁。





程程係我地既common friend ，成日都搞惡作劇，想撩我玩，我都唔知點解成日都會落佢搭，哈哈。就係佢一開始撩我地放學去冒險樂園玩，間接幫我嬴個餐具盒返黎。（梗係啦，因為係佢打本比我地玩，笑死）

「喂，funny，同我影相！」

「好丫，interesting 」

佢同我熟左之後話覺得我好搞笑，話想索性叫我funny做我英文名，我唔介意仲話咁如果我係funny咁你咪係interesting?佢笑住話啱丫。

就係我地影相個下，閃光燈閃左個下，回憶殺又黎偷襲我⋯⋯

有次程程同你鬧交，實質因咩事原諒我冇印象，因為實在太耐⋯⋯我見到你地兩個嘈交，我唔知你冇左佢呢個朋友，因為我知你暗地裏都得罪過好多人（至於點樣得罪人法呢，就係走去未得人同意之下「代人表白」，你話你係咪衰呢，報應話黎就黎⋯⋯）

所以我唔想你人際關係咁差，我竟然心急勸交既時候係程程面前喊左出黎，程程身為一個男仔又唔識點安慰我，只好係我面前大笑，結果我同你誤以為佢取笑我係喊包，你就更加嬲佢。





我仲好記得你當晚whatsapp錄音同我講咩⋯⋯
「有冇搞錯，我見到你喊，佢竟然係到笑，個一刻我想拎刀斬佢！」

結果我又比你逗笑了。

至於我點回應你呢我都忘記得一乾二淨，但我永遠記得呢句係因為我聽得出你既在乎⋯⋯

事隔咁多年，你同程程一早好返，但我同你就⋯⋯

係咪所有人同事，只要加左半滴愛情藥水既成份，就一定會咁樣close file?

如果我唔想咁樣close file既話我只要唔加愛情藥水就得啦？

你估咁容易咩師傅？愛情藥水最興自己自動施放同倒瀉，邊有得你控制到，控制到就唔會有咁多人咁痛苦啦。





我既愛情藥水樽都空瓶左啦，仲好意思話人？