前傳——她遇見的第一個金牛座男孩: 她的視角概覽二

我望一望自己個電話，先發覺我地個聊天chat box 已經碌到沉底。而係好耐之前我地傾計個時，唔知由幾時開始你對我不論無講野態度定語氣都溫柔過一開頭識我既十萬倍。我醒起唔知大家講左啲咩你就稱我做「超級可愛的孫女」電話都係set我呢個名⋯⋯可惜我已經忘記左呢個名既由來。

諗諗下又會好容易回憶到往事，有次我突然好想食KFC，可惜我地中學附近冇，要搭的士出去先食到，結果你第二日同啲朋友出去食lunch，一返黎就拎左個外賣袋比我話係你地食剩既，咁啱拎返黎打包比我。我一打開個袋同個盒，入面有6塊炸雞，完整無缺一個餐咁，連葡撻都放左2個係到⋯⋯我開心到暈！
（但你確定係食剩？）當時我冇起疑，事後先後知後覺你對我係點。

有次我不幸地欠交左功課，因為我漏左個功課袋係屋企（我不嬲乖學生黎既，覺得比人留堂好瘀皮，想搵窿捐嫁啦）當時學校個規條係要交本手冊出去揼印通知家長貴子弟今日留左堂，咁我唔想比屋企人知但又唔知點算好之下我問你點部署，你教我話自己唔記得咗帶手冊，拎張白紙出去比佢揼印，咁我唔比屋企人簽張白紙咪ok囉。我照做，結果個老師隨口問左一句問我本手冊係邊到，我本能反應之下秒速答左話係櫃桶到，下一秒我個笑容僵硬到呢⋯⋯我即時望一望你，你個反應係忍笑再加扶額⋯⋯畫面難忘到！連老師都笑了。


我又醒起左有次我地一班人去海洋公園，當時大家都未發覺我地兩個曖昧既情況，我只係記得我地個日點樣借啲意想同對方傾計。好不容易我地兩個終於等到一個機會係坐過山車一齊坐，點知後面有一位媽媽帶住一對孖女挽，話自己冇辦法分開佢地坐，留底是但一個唔坐又唔放心，所以問我地可唔可以分開同佢對孖女坐。唔識拒絕人既你同我就係咁連唯一次同最後一次一齊挽既機會都冇埋⋯⋯最慘連相都冇影過一張，諗到呢到我真心想請問一下遺憾既盡頭會係咩？





呢種回憶殺，就算係一秒，醒起一秒你都心碎個種。

冇幾耐我發現左原來你返學等既個個女仔係同你同班既同學，慶幸既係佢唔係同我同班同級同社，如果唔係既話退學個個可能係我。因為我唔想見住你地日對夜對⋯⋯

當時咁啱有個男仔追我，咁既然係咁我咪同另一個一齊囉，感覺上我並沒有輸給你吧⋯⋯

當然啦，個男仔對我好好，可算係彌補左冇人愛我既遺憾，可能命運之神比我地相遇但想我地錯過。

後來有一年中秋節你突然凌晨主動whatsapp問我近況，我先發覺我地已經一年冇message 過對方⋯⋯你問起我搵到白馬王子未，我話已經有人對我好啦，我反問你同佢點，你先答我其實你地兩個啱啱分左手。我追問你有冇好難過，你話總係有啲傷感既，依家唔想再諗感情既事。我回應你話比多啲時間自己休息下啦⋯⋯





突然有一刻好奇心驅使下我問左個唔應該問既問題：

「你點解會同佢一齊既？」

「因為佢係我留班個時一直陪伴住我，一直安慰鼓勵我」

「⋯⋯」

「我其實⋯⋯以前中意你嫁，不過覺得配你唔起，唔敢追你」





「如果你當時有開口表白，可能我地一齊左」

（事關當時我都中意你丫嘛）

你當然見到有白馬王子既我仲點敢追我，而且我地既一切都已成往事，最後你主動提起話你記得我既夢想係開一間hello kitty既麥當勞（我好中意hello kitty同埋好中意食老麥）你話你會開一間比我，你又提起自己轉左校之後努力讀書左，我個一刻好安慰，因為我曾經覺得你唔夠上進，見到你肯努力讀書，好感動。你仲話會為左我努力，雖然我既唔係你前度，亦唔係你女朋友，但我聽到既係你對我既上心。

有時你返學校搵舊同學同社工食飯（唔知你係咪順便想見埋我啦，但你已經問定我想食咩餐）你話你買埋我個份係社工房等我，但最後我冇黎到，我話我唔記得左約左你，其實係當時我個白馬王子唔比我見你⋯⋯

我知你一直都有搵我，不論係facebook 定Instagram你都有request follow 我，但我冇理你，你個request 放左係到一年、兩年、三年？我都冇理會，甚至狠心到刪左你電話del左whatsapp同你既記錄，因為我對你只係得恨（？）因為你同我磨左咁耐，用呢種藉口話唔追我，但同佢又冇呢種藉口既？又可以咁快一齊？所以身為天蠍既我，一定會令你後悔，後悔一世。

直至有一次我聽見身邊既人提起，話覺得佢外表同感覺好似初中既我，我先醒起的而且確係，因為我初中同佢一樣戴黑框眼鏡、紥高馬尾、冬季校服條呔都係打得唔好。

（你唔係⋯⋯搵佢做我愛的替代丫嘛？）

（如果係既話⋯⋯？）





如咩果丫，都過左去啦⋯⋯

：係囉，金牛座男孩，呢個世界冇後悔藥嫁！