情人節那天，我在衣櫃中找到我生命中的天使: 第十八章：怕失敗就不如做宅男啦

 
  發生咩事呀？點解阿敬無啦啦會話唔去既？！
 
  「唔同我地一齊去？你點解咁講呀？你係唔係有邊到覺得唔舒服呀？」
 
  「唔…唔係……」
 
  雖然把口講就話唔係，之不過阿敬佢講既時候面色好似唔係太好睇，見佢同我對答既時候對眼一直望住地下，睇怕佢並唔係佢口中講既咁。
 
  「唔係？照我睇你而家唔係一啲事都冇，而係好有問題喎，係咪你頭先食得太多搞到個肚唔舒服呀？」




 
  講完之後，阿敬佢既神情明顯變得更加差。
 
  「你講出嚟啦，到底發生咗啲乜野事呀？」
 
  就喺我連番追問之後，阿敬佢終於都開口講野。
 
  「其實我都真係幾羨慕你架，阿傑……」
 
  羨慕？！你而家到底係攞景定係贈慶呀？我比羨婷佢踩到隻腳頂唔順既時候你居然同我講羨慕我？我明啦，雖然你表面上睇落係一個正常人，但係實際上原來你係一個M嚟，仲要係好重口咪嗰隻添，識你咁耐都睇唔出喎！




 
  「我真係好羨慕你可以掂到小櫻佢隻手呀……」
 
  原來佢唔係一個M嚟，一切都係我諗多咗啫……咪住先，你點會羨慕埋啲咁既野架？你會唔會諗多咗呀？
 
  「唔…唔係呀，你千祈唔好亂諗野呀！其實係我見小櫻佢如果要格硬捉住個扶手既話會好辛苦，所以我先至比捉住我隻手架喳，我冇其他意思架！」
 
  你唔係諗住我會諗住溝你女神下話？我只係對羨婷佢有興趣，其他人係點我一啲都冇理到囉！
 
  「識你咁耐，我梗係知你只係出於好心啦。」




 
  好彩阿敬了解我啫，比著係第二個既話一定會煩鬼住曬。
 
  「只不過我真係好羨慕你……其實我都幾高，點解小櫻佢搵你唔搵我幫手呀……唉……」
 
  「咁…我都唔知架……可能佢都冇諗到咁多，只係見我喺旁邊就搵我幫手掛……」
 
  「唉……其實我開始喺到諗到底小櫻佢其實係咪唔中意我呢……」
 
  唔係掛，今日搞咗咁多野，你而家先喺到諗呢件事？！
 
  「唉，唔通真係我一直以嚟都係我喺到自作多情？」
 
  「你唔好呢個時候先諗啲咁既野啦，呀，不過話時話其實你係由幾時開始中意小櫻架？」
 




  「其實我由中學嗰陣時已經中意佢架啦，我仲好記得第一次見佢就已經比佢個樣吸引住，不過嗰陣時我冇膽去同佢傾計，所以就算我地讀同一班都唔係話好熟。」
 
  「冇膽？你份人出咗名大膽架喎，點會冇膽呀？」
 
  「唉，平時既我就大膽，但係你都見我一喺小櫻面前就會變到成個傻仔咁講句野都1999啦。每次我一見到佢，成個人就會亂曬架啦，你叫我仲點開口同佢講野喎……」
 
  「但係我成日喺大學到見到你地兩個喺埋一齊，你地既關係應該好好至係架喎……」
 
  「咁係因為中學嗰時有一次我地一齊做Project，先至慢慢咁同佢有機會講野喳。」
 
  「咁咪幾好囉……」
 
  「嗰陣時佢對我都不知幾熱情，做完個Project之後我地既關係就變得愈嚟愈好，而我亦都唔再單單係比佢既樣吸引住，連佢既性格我都中意埋。」
 
  「原來係咁……」




 
  「之不過經過頭先咁多事之後我就開始喺到諗，到底小櫻佢係對我先咁熱情，定係佢本身就對身邊所有人都係咁呢？其實我識佢咁耐都係第一次見到佢蹺住其他人隻手同埋挨落其他人既身到，而我就一次都…………」
 
  「唔…唔好誤會呀，呢啲事我真係唔係特登架……」
 
  「都話我知道啦，我知道你唔係特登咁做，之不過……我開始喺到諗，其實小櫻佢會唔會由此至終都冇中意我呢？話唔定佢到而家都只不過當我係一個好普通既朋友……唉，只要我愈係諗呢個問題，我就愈覺得我今晚就會表白失敗……」
 
  阿敬佢耷低頭，諗住轉身搭地鐵返屋企，就喺呢個時候我直覺伸手捉住佢既膊頭唔比佢行。
 
  「失敗咁又點呀？」
 
  我點解會咁做其實連我自己都唔係好明白，可能係因為不知不覺間連我自己都好希望阿敬佢可以成功追到小櫻，咁所以一聽到佢話要放棄就無名火起掛。
 
  「既然一開始就知道要失敗既話咁不如唔好去表白啦！」
 




  阿敬抬起頭，講既時候仲有少少眼泛淚光。
 
  呢個時候我好衝動咁捉住阿敬既衫領，將佢拉埋嚟我既身邊。
 
  「你以為我好想幫你架咩？倒數呢啲日子成條街咁多人我留返喺屋企訓覺唔好？我咁難得出嚟幫你，但係你而家一句話『怕失敗』就要走，你低B都有個譜好唔好呀？」
 
  「但係如果失敗既話……」
 
  「失敗咪失敗囉！係人都會失敗架啦，唔通你咁耐以嚟都未失敗過咩？」
 
  阿敬聽完之後合埋眼，諗咗一諗之後再次打開眼，不過佢今次打開眼之後唔係望地下，而係望住我。
 
  「係……」
 
  吓？！真係未失敗過？！你有冇咁串嘴呀，我好難先可以講到啲咁有型既說話架，唔好搞到我咁難落台啦……




 
  「係，阿傑你講得好啱，其實我真係唔應該怕失敗，我都真係幾傻呀，我洗乜理咁多呀，總之就係因為我中意小櫻所以先想向佢表白，一切就咁係簡單。」
 
  「咁咪得囉。」
 
  「好多謝你呀阿傑，我而家有返自信啦，不過呢……」
 
  「不過……？」
 
  「不過呢你可唔可以放開我個衫領呀，你睇旁邊啲人都開始望過嚟呢到啦。」
 
  「呀……Sorry……」
 
  我慢慢放開阿敬既衫領。
 
  「係啦，就喺我地頭先喺到講野既時候羨婷佢地已經走到好遠啦，我地快啲追返佢地啦。」
 
  「OK，呀，話時話你唔洗追返羨婷咩？」
 
  「追返佢？我頭先咪話要追返佢地囉。」
 
  「唉，呢隻『追』唔係嗰隻『追』呀，咁你都唔明呀？」
 
  你可唔可以講白啲呀？扮到神神秘秘咁都唔知你想點……
 
  「總之你而家就去同羨婷佢講對唔住啦，知唔知呀。」
 
  「點……」
 
  「唔好問點解啦，信我啦……」
 
  到底呢個阿敬想講乜呀……不過我都唔係好得閒諗點解，都係快啲跑去搵返小櫻同羨婷佢地兩個先。