情人節那天，我在衣櫃中找到我生命中的天使: 第十七章：地下鐵碰著她，仲要係身體既碰著她

 
  就喺小櫻佢因為意外而挨咗落我到既時候，我望到阿敬個樣sad到好似GPA過唔到1咁，搞到我覺得自己好似好衰咁添……不過我都唔想既，係地鐵唔好之嘛，你唔好怪我呀……
 
  之不過小櫻佢好快就企返好。
 
  「哎呀，唔好意思呀阿傑，一日都係我唔好啦，企唔穩搞到撞到你。」
 
  「唔緊要，係架地鐵差啫……」
 
  其實頭先小櫻佢挨落我到既時候，佢個心口係好直接咁貼咗落我既手臂上面，嗰個觸感真係呢……估唔到原來小櫻佢收收埋埋，原來係咁有料架，真係搞到我而家好成個人同埋下面嗰到都好興奮呀。




 
  不過話時話，我記得同羨婷佢初初相遇既時候都好似發生過類似既事，唔知羨婷佢有冇印象呢？
 
  當我望向羨婷既時候，佢一句聲都冇出，睇落就同平時一樣。
 
  不過古語有云，暴風雨既前夕就好平靜，唉，呢句野真係一啲都冇錯。雖然羨婷佢外表睇落同之前一樣，之不過佢捉住我隻手既力度明顯再加強咗好多，我感覺到自己隻手都就嚟斷咁濟，真係幾乎可以換過隻機械凱做鋼之鍊金壽司。
 
  有冇咩人可以救下我呀？以前我遇到咩特別既問題就話有羨婷嚟幫我解決啫，之不過今次羨婷就係我遇到既問題，搞到我想要人幫手都唔得……
 
  「下一站，中環……Next Station，Central……」




 
  好彩由銅鑼灣去中環都係幾個站啫，如果情況繼續落去既話我就真係有幾多條命都唔夠死呀。而家諗返起都真係幾諷刺……我平時都話地鐵呢樣唔好嗰樣唔好，但係到頭來救我一命既居然就係地鐵。
 
  「係…係啦，我地都到站啦，不如我地快啲落車啦。」
 
  小櫻同羨婷佢地係到點頭，之不過一句聲都冇出；而阿敬佢就連頭都冇郁過，好似定咗形咁企喺到，唔知喺到思考緊人生入面講唔出既乜野大道理。
 
  就喺到站既時候，羨婷同小櫻佢地都終於都鬆開手，而我既小命都得以保存。
 
  出咗閘之後，我地按住羨婷之前講既計劃咁一齊行去坐摩天輪，因為佢話乜野坐住摩天輪就容易啲有個氣氛出嚟喎，不過我就唔係好識呢啲野啦。




 
  雖然我地頭先搭既地鐵就唔係話好多人，但係我地一路行出地鐵站既時候就發現愈嚟愈多人，聽佢地講既說話我諗大部分都大陸嚟既遊客，可能好多人都係比呢個新出既摩天輪吸引住掛……
 
  眼見中環呢到有咁多人，我開始喺到諗到底我地有冇可能搭到摩天輪呢。
 
  我拍一拍羨婷既膀頭。
 
  「羨婷，呢到咁多人，我地會唔會坐唔到摩天輪架？咁如果真係坐唔到既話你有冇準備到第二個計劃呀？」
 
  「……」
 
  羨婷佢唔好話答我，佢就連望都冇望一下我。睇嚟呢次真係好大件事，原來佢仲為頭先嗰件事嬲緊，而且佢嬲既程度似乎比我想像之中嚴重好多……雖然我仲未知佢嬲乜。
 
  「羨婷，你唔好唔理我啦，頭先小櫻佢唔係有心挨落我到架，係架地鐵chok咗一chok先至咁啫。」
 




  可惜羨婷佢依然理都唔理我。
 
  「唔好嬲啦，我都唔想架喎。」
 
  羨婷佢聽完之後企咗喺到冇再行。
 
  估唔到羨婷佢終於肯理我啦，仲以為佢會一直keep住唔理我添，以前劉備去搵孔明就話要搵三次啫，真係估唔到我而家要同羨婷佢講野都要講三次先得，不過點都好，總之佢最後肯理返我就得啦！
 
  可惜，羨婷佢沒有一天成為孔明，而我都沒有一天成為劉備，睇嚟講三次野真係對孔明先至有效，對羨婷既話只會反效。
 
  羨婷企咗喺到之後慢慢提起右腳，然後用力一腳踩落我隻腳到。
 
  我的媽呀，呢下真係痛到飛起，同頭先捉住我隻手既力度真係可以話係大文豪同陳E神既分別……即係點？差太遠，無得比呀！
 
  「呀！！！」




 
  頭先羨婷捉住我隻手既痛楚我都算忍得住，但係今次真係痛到我忍唔住要「呀」一聲咁叫出嚟。
 
  叫完之後小櫻同阿敬佢地都望住我，問我有咩事。
 
  就喺呢個時候，羨婷佢行去小櫻既旁邊，蹺住佢隻手。
 
  「冇事既，唔洗理佢既，佢唔小心踢到粒石仔啫，我地快啲去坐摩天輪啦，呢到咁多人，我地再唔行快啲就會有排等架啦。」
 
  「地鐵站入面都有石仔？！」
 
  「哎呀，我話有就有啦，小櫻你唔好理佢啦，我地行啦。」
 
  就係咁羨婷佢就蹺住小櫻佢行開咗。
 




  呢個羨婷到底喺到諗乜野呀……？要知道羨婷佢緊啲乜野真係難過睇透杯入面黃色既啤酒呀。
 
  睇住羨婷同小櫻佢地愈行愈遠，我都要快啲追返佢地先得，不過頭先比羨婷佢踩嗰隻腳到而家踮到地都仲有啲痛，唯有跳下跳咁追返佢地啦，但係點知今次反而到咗阿敬佢企咗喺到。
 
  「阿敬你做乜野仲唔行呀？」
 
  「其實呢……我唔同你地一齊去啦。」
 
  發生咩事呀？點解無啦啦會話唔去既？！

--------------------------------------------------------------------------------------------------
呢個月之內就會完外傳, 大家記住多多支持啦
得既話記住喺紙言個網到「追稿」同like Facebook Page 啦