情人節那天，我在衣櫃中找到我生命中的天使: 第三章：遇到怪魔就會變大個，但絕對唔會係痛快得多

  「咁…咁我幫你手囉。」
 
  「真係架？多謝你地呀，我既終身幸福就靠你啦。」
 
   「不過講就係咁講啫，到底點做先好呢……」
 
  就喺我好煩惱點樣做先至好既時候，爆咗seed既羨婷又開始嚟料。
 
  「要追女神首先就當然係約佢出嚟啦，如果你連女神都見唔到既話又點同佢表白呀？估唔到你地連呢少少野都諗唔到，仲話係男仔喎，唉。」
 




  「對…對唔住。」
 
  我同阿敬兩個不約而同咁坐直咗個人，好大聲咁喺到道歉，大聲到一個地步我諗全間茶餐廳既人都望住我地，不過我地都唔敢四處望，因為咁做好有可能會比羨婷佢鬧得更重。
 
  我望住眼前既羨婷，我開始喺到諗到底呢個人係唔係我認識既羨婷嚟架？平時既羨婷係一個講野好客氣，而且從來都唔會發火既人；但係點都估唔到只要佢一講到啲愛情既事嗰陣就會成個人都唔同曬，簡直同第二個人冇分別。
 
  「點約佢好呢……？你地兩個有咩意見呀？唔好淨係識坐喺到啦！」
 
  「呀，有啦！一於就話阿敬你想搵佢出街倒數，咁咪約到出嚟囉。」
 




  「阿傑你係唔係有問題呀，咁樣做一定唔會成功啦。」
 
  咩喎，我呢個方法簡直就係perfect池啦，仲有乜野問題呀？你連一個方法都諗唔到呀，有咩資格話我呀！
 
  「一個男仔邊有可能單獨約一個女仔去倒數呀？傻既都諗到個男仔想做咩啦。唉，一於我地都一齊去，咁既話嗰個女仔就唔會覺得奇怪啦。」
 
  「吓，要出街……」
 
  「你講咩話！」
 




  「冇…冇。」
 
  救命呀，而家坐我前面既簡直就係一隻惡魔，我仲可以點呀？唉，算鬼數，唔洗驚，就當自己已經豁，豁出去，總之咩都唔反對。
 
  「犀利呀羨婷，估唔到你對約會啲野咁有計喎。等我一陣就同女神咁講先。」
 
  講完之後，阿敬就行開去打比佢女神約佢出嚟。
 
  「但係咁喎，就算我地約到佢出嚟，咁都唔代表我地幫到阿敬追到佢女神架喎。唔通我地去代佢表白咩？」
 
  「乜阿傑你咁遲鈍架，呢個只係借口嚟，之後我地就會搵個理由行開比佢地單獨相處，咁到時阿敬咪可以表白囉。」
 
  「又係喎。」
 
  「唉，咁都要我話你知……」




 
  唉，雖然我的確係好佩服羨婷佢條橋，但係我真係好頂唔順而家既佢囉，有冇人可以還返之前嗰個羨婷比我呀，我要以前好可愛嗰個羨婷呀。
 
  就喺冇幾耐之後，阿敬佢打完電話返嚟。
 
  「真…真係得呀，我女神話佢聽日可以出嚟喎。咁約到佢出嚟之後我要做啲咩呀？」
 
  「之後我地就當然會去做啲好似係睇電影既例牌野啦。」
 
  「但係，咁做會唔會太普通呀？我諗既然係表白呢啲咁重要既日子，做返啲特別啲既野好似好啲喎。」
 
  「你識啲咩呀？呢啲叫做橋唔怕舊，最緊要受。去做乜野根本唔重要，最重要係個過程入面要做咩啫。」
 
  雖然我唔係好中意爆咗seed既羨婷，之不過聽佢講既野就會好自然覺得佢成個愛情專家咁，而我地要做既事就係不斷咁聽佢講野同埋認同佢既說話。咁當然，喺爆咗seed羨婷面前我地係冇反對呢一個選項，因為咁同自殺其實冇咩分別。
 




  就係咁，羨婷佢就係咁講到底阿敬到時要做啲咩，一講就講咗成幾個鐘。
 
  「真係唔該曬你地呀，咁聽日就靠你地啦，拜拜。」
 
  「咪…咪走住呀？」
 
  「咩事呀？」
 
  「其實呢你女神係邊個呀？我地識唔識架？」
 
  「嘻…嘻…咪小…小櫻囉，你地唔知咩？」
 
  「居然係佢？你地唔係一早已經喺埋一齊啦咩？」
 
  講完之後，羨婷同阿敬個樣都變得好驚訝……





---------------------------------------------------------------------------------------------------------------
話咁快就嚟到第三章, 亦都係2015年第一篇既更新，祝大家新年快樂
不過估唔到新既一年咁快就有個壞消息，就係保全叔佢過咗身:(
好多謝佢既作品曾經為我地帶嚟咁多快樂