情人節那天，我在衣櫃中找到我生命中的天使: 第二章：貓仔同獵豹都係貓科，但係佢地好大分別

 
  「@#$(%*&#%？？？」
 
  講完之後，阿敬用一個好疑惑既表情嚟望住我，似乎唔係好明白我講咩。我呆咗咁望住阿敬，而阿敬又呆咗咁望住我，我地兩個咩都冇講，合力完美咁演繹出乜野叫做dead air。
 
  就喺我地都唔知點樣去拆解呢個dead air既時候，旁邊既羨婷做出一個冷笑既表情望住我。
 
  「唉，主……阿…阿傑你真係邋遢架，好應該吞咗啖飯之後先講野呀嘛，真係冇你收。」
 
  有冇搞錯呀！我至唔想比一個會將啲飯塞到自己成隻倉鼠咁既人去話我邋遢囉。早知原來你係啲咁既人，我頭先就大大聲笑出嚟，仲要笑到成間茶餐廳既人都聽到呀。




 
  「乜野邋遢呀，你頭先#$^%@&#$#……」
 
  就喺我吞咗啖飯，然後諗住反駁佢既時候，佢好似有預知能力咁拎咗一張紙巾出嚟幫我抹嘴，搞到我冇辦法去講野。見到眼前既羨婷咁細心幫我抹嘴，唔好話我嘴邊既污糟野，就連我心入面既怒火都比佢抹走埋。
 
  不過呢，當我股怒火熄滅既同時，我既身旁有股怒火唔少心比佢點著咗……
 
  「你老味！我嚟係搵你幫手追我女神，唔係嚟睇你地放閃架！每次你地喺埋一齊就會係咁架啦，好似上星期呀，明明你呢………」
 
  大獲！我完全唔記旁邊有阿敬呢個人存在添？！死啦，佢又開始爆我啲秘密出嚟啦，點…點…點算呀？




 
  「唔係，呀…呀…呀……不如講返你嗰邊先啦，點解你無啦啦要搵我地幫手追你女神呀？」
 
  無辦法啦，雖然咁樣轉話題係就係唐突啲，不過我除咗咁做都唔知點好。
 
  「既然你問到，咁冇辦法啦，等我話你知。係咁既……」
 
  唔係掛？！真係有效？阿敬你心底入面到底有幾想話比我知你要追女仔呀？
 
  「係咁既，你都知聽日就係除夕架啦，我睇電視話如果除夕倒數既時候攬住女神，然後答正十二點嗰時同佢表白既話，我地下一年就可以好似糖似豆咁喎。咁好既機會嚟到，我又點可以放過佢呀。」




 
  「唔係掛，個牛河博士講野你都好信既。」
 
  「呢啲野寧可信其有，不可信其冇呀。」
 
  「你冇病吓話，係唔係dry得太耐dry到傻咗呀？要信都信啲唔知咩星座書啦，點會信個牛河博士架？」
 
  「dry……我…我先唔似得你呀，日日同羨婷喺到放閃，你知唔知我好葡萄呀！你地上個月呀……」
 
  我的媽呀，呢個阿敬真係好煩呀，好似成個地雷陣咁，講錯少少野都會引到佢爆曬我全部秘密出嚟。
 
  「得…得啦，咁你想我點幫你呀？」
 
  「我想你教我點樣追我女神。」
 




  「你咪自己追囉。」
 
  「……」
 
  阿敬佢一臉茫然咁望住我，大獲？！唔係又踩中地雷下話。
 
  「唔…‥唔係，我既意思係…係…呢啲野我好難介入架嘛，我又唔知你女神份人係點，而且我追女仔方面又唔係話好叻。」
 
  「唔好咁啦，喺我識既人入面得你係有女朋友喳。」
 
  阿敬講完之後，我將隻手放喺佢個膀頭到。
 
  「阿敬，追女呢家野最緊要既係就係要有勇氣，如果下下都要靠人既話，就算比你追到都唔會覺得開心啦。」
 
  「之不過……」




 
  「雖然我幫唔到你啲乜，但係我都為你加油啦。」
 
  「咁……咁好啦。」
 
  嘩，真係估唔到我可以chok到句咁有型既對白出嚟做借口，我覺得自己轉數方面真係拍得上「名偵探阿南」呀。雖然頭先嗰句說話係有啲肉麻，但係而家我唔洗幫你追女簡直係一身輕呀。
 
  不過正當我以為件事會告一段落既時候，點都估唔到坐喺我面前既天使終於出招。
 
  「不如我地幫下阿敬啦，好唔好呀，阿傑？」
 
  羨婷用返頭先扮可愛既眼神望住我，似乎真係好想我幫一幫阿敬。不過正如我之前咁講，呢招其實對我一啲用都冇。
 
  「唔好啦，咁麻fu……」
 




  就喺我連個「煩」字都未講完既時候，羨婷既表情由本來成隻貓仔咁變成一隻獵豹咁，好狠咁瞪眼望住我，佢明明一句野都未講，我就已經成個人僵硬咗，完全唔敢開口講野，只係成個傻仔坐咗喺到。
 
  咪…咪住先，你到底係唔係羨婷嚟架，我識既羨婷唔係應該好可愛架咩，點解你個樣可以咁恐怖架？估唔到一講到愛情呢啲野既時候可以令一個天使爆seed。唉，今次真係食得屎啦……
 
  「我話幫下阿敬呀，好 - 唔 - 好？」
 
  「好…好……當…當然好啦。」
 
  我的媽呀，比你咁樣睥住，我仲點敢話唔好呀，咁做即係迫我架啫。

------------------------------------------------------------------------------------------------------------------
估唔到冇寫一排個腦好似實曬咁，不過我都會努力寫落去既
btw, 我喺高登到開咗個新post啦，大家不妨去支持下, 不過一切都以紙言呢到既更新作準
今日係12月31號，喺到預祝大家happy new year :)