𣎴能愛上的星級女神（完）: 憑實力單身

酒醒的時候已經早上八點半左右，我發現自己脫去了上衣躺在自己的床上，手臂、臉和胸前也很痛。我留意到手臂有個螺旋形包紮，胸前有些瘀傷，臉頰和額角也貼了沙布。我頂著宿醉的頭痛走出客廳，看見若嵐躺在我沙發上，還有一件西裝外套在她身上披着。茶几和地上很整齊，壽司和酒也不見了，但我手機屏幕貼爆了，電視櫃上的花瓶也不見了。我坐在沙發旁地下試圖回想昨晚的事，便致電了Terris。

電話通了，接聽的不是Terris是Candice。
「你醒拿？」她的語氣不是關心，是嫌棄。
「Terris呢？」我控制著內心的不開心問。
「俾你哋搞咗成晚，人哋唔使瞓㗎？」她在冷冷地埋怨我。
「咁我一陣間再打俾佢…」
「唔使啦。你都係想知尋晚發生咩事啫，我代佢話你知。」Candice 一口氣告訴我：「我哋聽到爆樽聲所以去咗你屋企，係萬若嵐喊住開門俾我哋，入到嚟已經見到過酒樽爆到成地都係，仲有你部電話同電視隔離個花樽都爛咗，啲玻璃碎成地都係。佢隻手、你手臂同塊面都比玻璃碎刮傷，係Terris幫你地包紮、我幫你執嘢。如果唔係Terris，你手臂啲血流多一陣就要入急症。向瑾瑜，唔係個個都好似Terris咁好人，幫你溝女仲要幫你執手尾，我唔該你，以後唔好再搞我地！你有嘢問，我都唔會再答你，係咁啦。」若嵐醒了，我淚水在眼角自動流下，她看見我流淚，主動坐在我身邊擁抱我，陪我流淚。

我和若嵐收拾好心情亦整理好自己，下午回去開工。今日有一場我和Candice的吻戲，Candice把Terris帶了過來。我在飲品機買了罐裝咖啡，開工前親自把Terris拉到廠外走廊道歉。





「Terris，尋晚搞到你，好對唔住。本來係我自己嘅事，影響到你，仲麻煩咗你成晚。我以後都唔會再搞到你…同Candice。」我已經失去了靈魂，更重要的是，面對眼前這個男人，這個對住情敵也能風度翩翩的男人，我認輸了。在他面前我什麼都不是。他點點頭，接過咖啡，對我說：「你知你尋日打俾我嘅時候，Candice喺我隔離聽到架可？」我沒有什麼好回應：「Terris你係個好男人，我尋晚冇心冒犯你…」
「你唔係冒犯我，你係冒犯朱小姐。你明知朱小姐唔係啲咁隨便嘅女人，點解你要咁講呢？」他反問。
「對唔住啊Terris，我以後唔會搞到你同佢。」我補充：「今日我地場戲好少事架炸，Candice帶得你監場就更加好啦。我會叫程心同May姐同導演講，睇吓可唔可以盡量少啲親熱戲或者就下位，你放心，我向你保證，我唔會再對Candice有諗法。」Terris忽然拉住我手臂，在我傷口上用力抓。
「哇… 你做咩啊Terris哥？好痛…」我痛得大叫。他用力推走我手，警告着我：「你都知痛㗎？咁你而家知Candice有幾痛未？」他企圖再來一次，我嚇得連連後退：「我咪話咗以後都唔會再搞到你哋，Terris哥，你仲想我點啊？」

他那個表情簡直像是被我氣得火冒三丈，還要冷靜自己保持風度：「你真心覺得Candice鍾意果個係我咩？瑜哥，我初頭都唔明點解阿Mark咁執意一定要搵我幫手，而家終於知點解佢－定要我幫手。而且佢話你係憑實力單身我之前都唔信，而家我信啦！你真係…」他氣得幾乎說不出話，左右焦燥地踱步，歎了口氣，連咖啡罐也捏到變形。但說到這裏，我開始滿頭問號。他正想補充時，程心匆匆來找我：「瑾瑜，埋位。」Terris坐下歎了口氣，用眼神示意我先去。