係同屋室友?定係同居密友?: (S3)55. 願者不上釣

正所謂柒事傳千里，肖家嘅爭產失敗已經傳遍全香港，不過因為內地會嚴格封鎖香港新聞，加上肖家親戚以免柒事傳遍鄉下關係，佢地包裝到自己主動和解一般，對於佢地一家俾人落charge，賠錢等事就絕口不提
 
係肖家嘅村附近不遠，有另一條村中，有對母女睇完肖家「贏錢」後，心中想起左個計劃。不過首先呢，佢地打算氹下苗老太先。果對母女，就係上次果一對村姑，佢地仍然對苗學翹念念不忘，應該只係對佢嘅財產念念不忘
 
首先，佢地回想返，苗老太鍾意出去飲茶，所以佢地就去酒樓到伏苗老太
 
佢地一入到酒樓，就見到苗老太同工人係到，所以村姑同村媽就飛快咁走過去
 
「苗老太，乜咁啱呀?」
 




苗老太望一望佢地「啊，係妳地呀?坐啦坐啦」
 
聽到苗老太叫佢地坐低，佢地覺得已經贏左一半
 
「因咩事妳地又黎香港呀?」
 
「哎呀苗老太，唔係咁講呀，我地阿娟對妳念念不忘，好掛住妳呀」
 
「係呀麻麻」
 




苗老太係一個非常易氹嘅老人家，無他嘅，近年佢都係同工人兩個人生活，係悶左D架啦
 
「哎呀，冇辨法啦」
 
「苗老太呀，上次呢，係我地唔啱，我地返到去都發覺彩禮開太高，所以我地傾過啦，彩禮要少D，20萬就得，不過我地都係想房產證上加阿娟名，等佢可以快D黎香港嘛」
 
苗老太聽到咁，都禮貌上覆返佢地「唔係我唔滿意，阿娟佢唔係差」
 
「哎唷，咁咪係囉，苗老太妳開句聲嘛」
 




「問題係我個孫仔自己有女朋友，佢對阿娟一D興趣都冇嘛」
 
村媽已經一早準備好點樣回答苗老太
 
「苗老太呀，妳睇果個女仔點同我地阿娟比呀?佢又瘦又矮，塊面左邊仲有胎記，我真係替妳地苗家將來擔心呀。娶個冇生養嘅女仔返黎，佢生唔生到都唔知，又就算生到又未必陀到仔喎。妳睇下我地屋企幾多仔，我地阿娟一定幫妳地屋企生到仔架」
 
苗老太聽到有男孫，個心又心郁郁，佢始終覺得小祺真係太瘦，但係小祺又係學翹自己揀
 
「但係而家個女仔又幫到我孫仔，佢地又好夾呀」
 
村媽繼續說服苗老太「哎呀~而家搵老婆當然要搵個留係屋企服侍屋企架嘛，佢搵個讀書嘅，又唔太做家務嘅返黎做咩呢?都係我地阿娟好，佢識做好多野架」
 
苗老太俾村媽講多兩講，又打算再一次同人私下傾酒席禮金之類，但當佢諗起苗學雯，佢個心都涼一涼
 
「年輕人嘅事，都係交返俾佢地決定啦，呢D野冇得勉強架，上次妳地都見到我個孫女架啦，而家屋企所有事都係佢話哂事架啦」




 
「哎呀~苗老太，佢一個外嫁女邊有資格講咁多事，管三管四呀?佢應該留係屋企服侍老公架嘛，咁樣唔合禮節，我地阿娟唔同呢，佢唔會管住娘家D野架」
 
苗老太非常同意村媽嘅講法，不過由於佢極度害怕苗學雯呢個長孫女，所以有點點心動嘅佢都係選擇拒絕
 
「都係唔好啦，由得D後生仔女自己決定啦。我地都係得閒飲下茶算啦」
 
村媽見狀，未能說服苗老太，佢地一返到福田就行下一步。
 
幾日後，有一班電視台人員進入村姑嘅屋企