係同屋室友?定係同居密友?: (S3)47. 偽造文件

「鄭先生，你嘅分析，只係說明簽名同字跡唔係使用被告人嘅鋼筆所寫，咁請問會唔會係被告人用另一枝筆所寫呢一張承諾書同簽名呢?」
 
「法官閣下，係我收到鑑定資料之中，雖然大部份苗博士嘅文件都係英文，亦都有中文字跡文件」
 
螢光幕顯示出苗學翹嘅中文字，相對於英文，苗學翹比較少寫中文，但係明顯地同承諾書上嘅字跡係有分別
 
「你點知佢係唔係專登寫到咁呀!!!專家喎!!」肖師奶繼續叫囂
 
「法官閣下，呢到有苗博士嘅中文字跡，相對於承諾書上嘅字跡，有好明顯嘅分別。承諾書上嘅字係慢慢寫出黎，但係苗博士嘅中文字，係寫得比較快，呢個同苗博士曾經參與過公開試以及大學考試有關，考生三小時內寫滿差唔多一本答題簿，所以佢地嘅寫字速度會比較快」
 




專家證人再飲一飲水「而且承諾書上嘅筆順，有好明顯唔啱嘅地方，對於寫繁體中文嘅人黎講，寫錯筆順係會令一個字完全走樣，我相信大家小學時間都有咁嘅經歷」
 
大家都點頭稱是
 
「所以呢一封承諾書，並唔係一個由細到大接觸繁體中文嘅人所寫」
 
「另外係簽名方面，我地所有同事一致認為，呢個簽名，並唔係苗博士親手簽，而係有人假冒臨摹幾次嘅簽名，所以呢個簽名，係冒簽」
 
專家證人將兩個簽名作對比
 




「麻煩苗博士立即用你嘅鋼筆、同埋呢一枝贈品原子筆先各簽一個名」
 
苗學翹照做後，筆跡專家將四個簽名拍埋一齊，「承諾書」上嘅簽名明顯地比較冇力同埋唔順
 
「我地睇下，C呢個英文字。剛才苗博士即使係用兩枝唔同嘅筆黎簽名，但係我地可以見到，個C字嘅起筆點係呢度，微向上兜一個小橢圓形再落去字母主體，而第一個L，高度並唔係同C字並排，而係輕微低少少，到E字，係由L收尾順勢寫過去。簽名當中一個地方，係承諾書上冇嘅，我地睇睇第二個L，呢個L個半橢圓形係未完全形成時，就落筆去y到。而承諾書上最尾呢兩個字母同苗博士剛先即場簽嘅有明顯分別。原因只有一個，就係簽名者並冇根據自己習慣所簽，所以肯定並唔係苗博士所簽嘅簽名」
 
「法官閣下，呢個就係我地政府化驗所得出嘅結論」
 
「麻煩哂專家證人」
 




法官係Notes上不停寫筆記
 
「由於控方所提出嘅證據上之簽名，被擁有專業資格嘅人士所評為冒簽關係，所以該份證據本席依法評為不成立之證據」
 
肖師奶心有不忿，明明已經做得咁好，咁都呃唔到人
 
果份「承諾書」，的確係肖師奶偽造，佢係鄉下聽埋d市井之徒講，自己整一份文件屈人就得，平時佢地都係咁做
 
「唔洗怕，我仲有個女肚入邊果個，呢樣野又邊有得係假，我地贏梗」肖師奶仍然處變不驚
 
「我地未輸，仲未輸，一拎個肚出黎我地就一定贏」