係同屋室友?定係同居密友?: (S3)45. 筆跡專家

「反對!!反對辯方律師妄下定論!!!」
 
「法官閣下，係monitor中所謂承諾書嘅簽名，同苗博士用黎簽普通文件貌似相同，但係只要留心睇嘅話就知道兩者分別」
 
「法官閣下，單憑呢一點，唔可以證明控方所有嘅承諾書係偽造!!」
 
兩位大狀疆持不下，身為法官，佢都要作出決定
 
「反對有效，辯方大狀請等待筆跡鑑定專家到場檢驗簽名真偽」
 




今次呢一堂火藥味都好重，外人或者肖氏一家睇嘅話，係一場辯方嘅防守戰。但係識法律嘅人黎講，呢一場係對控方完全不利嘅防守戰，只要有一絲出錯，就會俾麥大狀呢d一流大狀有位入再打散份證據
 
如今肖家只剩低呢份承諾書同肖翠君肚中嘅胎兒
 
法庭書記收到職員通知後，法官宣佈休庭到下午再審理，等筆跡專家有時間去研究承諾書上筆跡真偽
 
控方大狀休息室內，林大狀心中已經打定輸數，而家唯一係輸少當贏，要求肖家撤控，不過佢亦知道肖氏一家貪念太大，而且佢地自以為贏梗，要佢地主動撤控係冇可能，今次林大狀正宗上錯賊船
 
「丫!個死仔包仲咁口響，個官仲唔判層樓要佢賠錢架!心急死人咩」肖師奶不斷地催
 




「肖太，而家等埋所有證據後，我地就可以話贏架啦，等一等啦」
 
「快d啦!心急死我囉」
 
林大狀一邊搖頭一邊嘆氣，阿鼎果然係冇料到
 
辯方大狀嘅休息室內，麥大狀準備好其他文件作為武器使用
 
「成件事依足我地計劃進行，好順利」
 




「都好難唔順利掛，而家睇下之後點打落去」
 
佢地食過午餐之後，再一次進入法庭
 
法庭書記起身「下午繼續審訊，將由政府化驗所嘅筆跡專家鄭偉成先生為本庭作專家證人。鄭先生係香港政府化驗所之筆跡專家，多次協助警察商業罪案調查科鑑定簽名真偽，是次鄭先生均得到本案控辯雙方同意下，為本案文件作出真偽鑑定」
 
「控辯雙方有否提問」
 
率先由控方提問
 
「鄭先生，我想知道一個用慣鋼筆嘅人，簽名果時係唔係會一定會用返同一枝鋼筆?」
 
「呢個要視乎該名人士嘅習慣同喜好，有D人會覺得鋼筆筆尖出墨量唔夠粗，簽名會冇氣勢而改用原子筆」
 
「即係我可以歸納出，用慣鋼筆嘅人，未必一定會用鋼筆黎簽名，相反可能只係佢喜好而使用鋼筆?」




 
「亦有咁嘅可能」
 
「唔該哂鄭先生，法官閣下，我再冇問題」
 
聽到專家證人咁答嘅肖師奶，自信心又高左，佢嘅興奮已經放哂係佢塊面上
 
麥大狀行去筆跡專家面前，準備提問
 
「仲問乜野丫!都輸梗囉」肖師奶又係到喃喃自語
 
「鄭先生，請問你係咪已經睇哂被告人嘅LOG BOOK同其他文件?」
 
「已經睇哂」
 




「咁請問你可唔可以從呢堆證物之中，推糾出我當事人，即係本案被告，苗學翹博士平常嘅寫字習慣同特別喜好?」
 
「可以，呢樣係我嘅專業」