係同屋室友?定係同居密友?: (S3)20. 拉麵車

晚上佢地係街頭嘅拉麵車前，滋味咁食住叉燒拉麵
 
不過佢地談話嘅字裡行間，就帶出左小祺係滑雪時嘅笑話
 
「你呀!!!又唔拉住我!!!」  「咁滑緊果時點拉呢?」
 
「你搞到我成程由山上碌落黎呀」
 
「唔係呀，妳係sir住咁落」
 




學翹用電話播返小祺係滑雪場嘅「英姿」出黎
 
片中嘅小祺完全係企又企唔起身，不停咁跌低，甚至大字形咁攤係到
 
而佢旁邊嘅小學生，就非常輕鬆咁滑過
 
「連小學生都叻過妳喎」
 
「咁我第一次滑雪之嘛!!邊似你成日都黎日本玩」
 




「呢d野，好講天份嘅」
 
兩個人係街頭嘅拉麵店車到食住熱騰騰嘅拉麵，別有一番風味，而且會令人食慾大增
 
食左拉麵後，佢地慢慢行返酒店，東京氣溫唔高，但相比起長野落雪嘅天氣來得比較暖
 
兩人一齊行到新宿歌舞妓町，東京紅燈區五光十色景象盡入小祺眼中
 
「呢到係紅燈區呀?」
 




「係呀，有女仔係到派傳單，上去飲野傾計」
 
「純粹傾計?10000円喎」
 
「有冇下文就睇下雙方傾唔傾得掂」學翹係小祺耳邊講
 
小祺抬頭望實學翹「你有冇幫襯過?老老實實」
 
「當然冇啦，呢到…..呢到好多都係大陸人扮日本妹，我地講野要細聲d，d龜婆聽等明廣東話」
 
「龜婆會識聽架咩?」
 
「佢地都係大陸人黎架嘛，少少廣東話都會識」
 
行到去大久保公園時，又有一大堆少女企係到周圍望




 
「呢d呢?」  「呢d係神侍少女」
 
「即係咩呀?」  「企街，免費企街」
 
「免費?!」
 
「係呀，佢地呢d通常冇屋企又冇學歷冇錢，所以就企係到等男人請佢地食飯，夜晚俾個地方佢地瞓，合眼緣就長住，唔合夾就當one night stand咁囉」
 
「佢地真係一蚊都冇呀?」
 
「連住網吧嘅錢都冇」「網吧會住到人架咩?」
 
「日本網吧有免費飲品，有d有免費食物提供，當然係好普通啦。加錢就可以有咖哩飯呀，啤酒之類，而且仲係一人一個獨立房仔，所以係有好多人將網巳當做屋企，好過住賓館或者瞓街」
 




返到去哥斯拉酒店，小祺拎埋d衫入浴室，幾分鐘後，學翹都行埋入去
 
基本上佢地兩個每晚都一齊沖涼，學翹都幫小祺捽好背脊
 
小祺包住頭，拎起風筒不停吹，而學翹就拎衫落樓下洗同焗，返到上房後，小祺睇緊聽朝嘅資料
 
「我地係咪倒搭咁早起身呀?」
 
「係呀，去漁市場睇買賣」
 
「真係咁好睇?」 「一條魚由買手買左，到送去舖頭，再立即上碟，成個過程妳都睇到，仲睇到d魚有幾新鮮」
 
「所以要早d起身?」  「冇錯」
 
小祺立即攤返上床「咁早d瞓啦」




 
「妳今日滑雪咁攰，應該早d瞓啦」
 
好快一張被就蓋過佢地兩個人，然後兩個都好快瞓著
 
果然滑雪真係令人好攰，兩個人唔洗五分鐘，就已經聽到睡眠嘅聲音
 
而學翹，依然係攬實小祺咁瞓