係同屋室友?定係同居密友?: (S3)05. 準備行程

收拾細軟後，兩個女仔各自去沖涼，學翹就一如以往洗碗做家務。
 
今日學嬛留左係職員宿舍到溫書，所以學翹就讓間書房俾自己個妹溫習
 
未來兩日，個妹都會係宿舍閉關修練，不過夜晚學嬛瞓邊度，佢地兩兄妹就有意見
 
「妳當然瞓房啦，妳溫習好攰架喎」
 
「咁我咪阻住你同姐姐囉，唔得!而且我仲會溫到好夜，出入間房會影響你地喎」
 




「咁唔通要妳瞓梳化床咩?」  「我又冇問題喎」
 
兩兄妹你一言我一語，大家都為對方著想，坐埋一邊嘅小祺都唔好意思開口
 
不過，學翹永遠都敵唔過佢妹妹
 
「妳瞓梳化床冇問題，但都唔可以溫到太夜」
 
「得啦得啦，你放心喎」
 




當小祺同學嬛一齊敷mask果陣，小祺先問學嬛
 
「點解妳阿哥咁聽妳話嘅?」「點解呀?唔….可能佢一直都想要細妹掛」
 
「所以佢就咁錫妳?」
 
「係呀，我地第一次見面果時，佢已經抱實我唔放」
 
「佢算唔算係妹控呀?」「絕對係!!不過而家佢一定覺得妳重要過我」
 




「點…點會呢…」小祺面紅紅咁講，怕羞時個心又有點高興
 
「唔洗怕羞喎，妳地都住埋一齊囉」
 
當佢地敷好mask後，學嬛就入左書房繼續去搏鬥，學翹同小祺就一齊返入房
 
「你好錫個妹喎，想讓張床出黎俾佢瞓，你自己就瞓廳」
 
「咁佢考試嘛，等佢休息得好d」
 
小祺挨個頭去學翹膊頭「你總係咁識得照顧其他人」
 
「我仲識照顧妳添呀」
 
佢地拎出自己嘅notebook同macbook，打開行程表、列車時間表再對




 
因為佢地兩個請左假、聖誕節去旅行。連同補假，佢地差唔多係去兩星期左右，要唱錢都差唔多要100萬円
 
今次小祺非常強硬，點都要出返d錢，的確，自己唔出d錢，點可以買多d野?
 
佢地Plan定第一站就係東京先，然後搵一日去滑雪，然後今次唔落大阪，反而去小祺鍾意睇嘅自然風景，所以學翹就揀去宮島、忠海兔仔島同埋落四國一帶，果邊d地方完全適合小祺
 
你地估佢地只係去一次旅行?非也，佢地應該5月會再去多次，因為佢地d假實在太多，而且仲經常OT，所以佢地嘅time off同補假都特別多
 
「妳係第一次搭飛機?」  「咩喎，有咩問題呀?咁我細個都冇人帶我去旅行」
 
「妳會唔會好驚架?」  「到時咪知囉」
 
之後兩晚，學嬛依舊係宿舍到溫書，到左星期五，佢終於都考哂試
 




果一刻，佢好似大解放咁樣，即晚，佢捉住學翹同小祺一齊出去食飯
 
學嬛考完試，亦代表佢有8星期sem break
 
佢地食完飯後，學嬛返香港仔，而小祺佢地就返屋企執行李
 
由於去兩星期關係，小祺準備嘅野都唔少，相反，學翹就執左好少衫
 
見到學翹執咁少，小祺忍唔住問佢
 
「你帶咁少衫夠架啦?」  「夠啦，而家走難咩」
 
「兩星期喎」  「咁又點呢?」
 
「你唔洗搵衫替換架?」 




 
呢一刻，學翹feel到小祺個腦諗咩
 
「酒店會有自助洗衣機架，仲要好乾淨，洗完，焗埋，即晚乾」
 
「真係?」「係呀，不過胸圍底褲就自己洗再晾好d」
 
聽到學翹咁講後，小祺又一次倒哂d野出黎，再執過