係同屋室友?定係同居密友?: 58. 相擁而睡

「咩事呀家姐?」返到宿舍學翹收到家姐電話
 
「喂，上次你俾人襲擊單case，defendant唔認罪，佢搵狀同DOJ打喎」
 
「嘩，妳咁快收到料嘅?」
 
「喂，話哂你家姐我都係個EO丫，睇文件呢D野難我唔到嘅」
 
「係係係，不過妳講俾我知，有冇問題架?」
 




「所以我只係講你知少少，其他唔講，好快你收到通知要上庭架啦」
 
「邊個庭先?」
 
「九龍城呀」
 
學翹收左線後，小祺抹頭由洗手間行出黎
 
「好少可呢個時間你有電話喎」
 




「家姐打黎，話我知可能要上庭」
 
「咁大件事?」
 
「上次俾人打果單野者，被告唔認罪，押後到兩個月左右開庭」
 
「到時你又要上庭?」
 
「都係架啦，唔洗擔心喎」
 




「我冇擔心過呀，始終你先係受害者」
 
小祺吹乾頭後，同學翹一齊返入房中，依舊開著冷氣係床上睇書
 
「妳諗到星期六點著未?」
 
「唔…..平底鞋或者涼鞋加條裙囉」
 
學翹望一望小祺，其實小祺由頭到腳趾都唔差，佢只係左臉有淡淡胎記
 
「妳敷左MASK後，皮膚真係好左好多」
 
「係我以前太懶啦」
 
小祺係到試緊新電話嘅野期間，wts又彈出消息，今次同學眾會有好多人出席，所以訂左間大房，務求玩得盡興




 
「喂妳星期六唔會飲酒架?」
 
「我當然唔飲啦」
 
「係先好呀，我冇可能幫妳換衫架」
 
小祺聽到學翹咁講，塊面姐一紅
 
「當然唔飲啦!!!」
 
點解佢自己面紅?其實佢地兩個而家做左室友，學翹連小祺嘅貼身衣物都處理埋，自己period時期都俾佢知道哂，即係已經冇秘密可言
 
而且，早兩晚，佢地瞓覺轉身時，小祺仲縮左係學翹懷中，而有一次，學翹都伸手攬住左小祺，要知道小祺瞓覺時係冇戴胸圍
 




小祺唔知道點解自已可以咁放心咁同學翹孖舖，可能佢心中已經鍾意左人地，但係自己唔發覺。當學翹話星期六同學聚會去接佢時，心中有少許期待同興奮，但係又唔知點樣同其他人交代
 
「星期六…地鐵站等囉，好似平時我放學咁」
 
「唔洗妳夢中情人送妳返黎呀?」
 
「夢咩中情人丫，人地有女朋友，就算冇，排隊都唔輪到我啦」
 
「對自己咁冇信心?」
 
「唔講啦，瞓覺!」小祺拎部電話去叉電後，再爬返上床攬住鯊田友
 
另一邊嘅學翹仍然係直男一個，有點木，拎住小說睇，佢自己都唔知道早兩晚自己攬住左小祺黎瞓，佢只係覺得自己身上有小祺嘅氣味。佢又點知道，果晚佢地四隻腳掂住，上身一隻手攬住小祺
 
不過一講到有男仔可能會送小祺返黎果時，佢自己都有d唔開心，佢只希望小祺只會坐佢車返屋企




 
望住攬住鯊田友嘅小祺，學翹都鑽入被中，合上雙眼
 
但係佢碌左一陣都瞓唔著，於是，佢慢慢移動少少近小祺，一吋一吋再一吋
 
到佢覺得距離夠果時，已經瞓著嘅小祺轉身對住佢，少女氣息由小祺鼻中噴出
 
「太近啦….」學翹心中叫到
 
佢將距離拉返遠少少，合上雙眼