係同屋室友?定係同居密友?: 54. 第二次孖舖

今晚食完晚餐、沖完涼後，小祺坐係按摩椅上，俾按摩椅服侍
 
「呀……好攰呀」
 
學翹拎住d衫出黎去窗邊晾衫
 
「攰呢?知道我地平時用幾多勞力呢?」
 
「而家咪知道囉，你最盡試過做到幾點呀?」
 




學翹諗一諗「妳未黎之前，係冬天有一日得一個師傅同我返工，其他人都放假，果日師傅做哂所有液氮，我一個人做左20張單總共25枝氣再送埋化學品」
 
小祺聽到學翹嘅紀錄都嚇一嚇「咁多!?」
 
「係呀，果日我做到17:15分，返到屋企冇哂力，第二日全身都好攰」
 
「即係好似我而家咁?」
 
「攰過妳啦」學翹晾好衫後伸一伸條腰，最近佢條腰同膊頭比較攰，無他的，小祺連同之前打風日子，差唔多都住左一個月，呢一個月期間，學翹只係瞓過張床唔過10晚，其他日子都借左張床，應該係話分左張床俾小祺瞓，佢自己就瞓廳嘅梳化。如果有得揀，佢會揀瞓床。
 




不過既然佢叫得小祺黎住，點都要俾小祺瞓床，而小祺近日都發現學翹條腰同膊頭有D攰
 
「阿翹呀，你係咪瞓得唔好呀?」
 
「少少啦，做咩呀?」
 
「我見你呢兩晚條腰同膊頭好似有D攰咁，不如你瞓返房啦」
 
「點可以呀，係我叫妳黎住架嘛，呢D小事，我扭下條腰就冇咩野架啦」
 




學翹係小祺面前扭腰，然後腰部傳出啪啪聲，的確，佢最近真係幾攰下
 
晾好哂衫，當學翹去拎睡袋舖好坐上去睇書時，著住套卡通睡袍嘅小祺攬住鯊田友出黎搵學翹
 
「喂」
 
「咩事呀?鯊田友」學翹拎起愛鯊尼亞同鯊田友互動
 
「你入黎一齊瞓啦，之前我地又唔係未試過」
 
學翹俾小祺呢留說話嚇一嚇
 
「妳傻左咩，一男一女…」
 
「咁我地都住埋一齊啦，怕咩喎，你要郁手行動都唔洗等到今日啦，你唔講我唔講邊個知呢」




 
小祺將學翹個枕頭同愛鯊尼亞拎入房，將佢地放好
 
「妳唔將鯊田友同愛鯊尼亞放中間呀?妳唔怕我會…」
 
「都話唔會囉，我信得過你呢」
 
學翹拎住佢本書，行返入自己房，坐左上床上邊，小祺亦都赤腳上床舖中
 
「咁樣個廳冷氣咪可以熄左佢，慳返D電費囉」
 
「只係怕我會唔小心亂摸，摸到D唔應該摸到嘅地方」
 
小祺知道學翹講D咩，不過小祺一面輕鬆咁講「我又唔係Rachel果種導彈身材，唔怕嘅」
 




小祺拎起本書慢慢睇
 
「係喎，我俾妳d notes有冇用呀?」
 
「有呀，我搵到好多資料」
 
「module 4 派功課未?」
 
「派左啦，都係6揀4答囉」
 
「對妳黎講唔難呀?」
 
「今個module個個好似一舊雲咁，好多野係我先聽得明，今個module仲有retaker黎埋」
 
「我果陣呢個module都有retaker啦，的確好少人識我地science d野嘅，所以妳呢個module要好好發揮」




 
小祺再拎鯊田友出黎「知啦，我瞓啦，你瞓未呀?」
 
學翹今日真係有d攰，所以佢放低書，熄左燈，同小祺又一次孖舖。感覺上好奇怪，唔係情侶關係，兩個同事一男一女同住一間屋，再同舖瞓埋一張床上，而冇事發生。其實，兩個人心中已經起左少少變化而佢地自己都唔知道，呢種情感，需要日積月累先會散發出黎
 
係床另一邊嘅小祺表面上好平靜，其實自己心跳得好快。佢唔明白自己點解會叫學翹黎陪佢一齊孖舖，上一次因為打風，所以佢先想搵人黎陪自己，而上次兩人之間都隔左鯊田友同愛鯊尼亞，但係今次，純粹係唔想學翹瞓梳化而叫佢上黎孖舖，而且兩人之間冇鯊魚相隔，可能只要轉一轉身，大家雙腳就會掂到
 
所以小祺深呼吸左一下，自己靜靜放鬆後就慢慢瞓著