係同屋室友?定係同居密友?: 22. 順風車

梁小祺今日同平日一樣，朝早上左校巴後就合上雙眼補眠。校巴隆隆駛過隧道，本應行嘅路線，因為今日有交通意外關係，司機行左另一條路線
 
殊不知校巴開到一個彎位時，一聲聲響由校巴車底傳出。校巴車速立即減慢，而根據牛頓嘅慣性定律之下，校巴內嘅乘客均向前衝，包括熟睡中嘅梁小祺
 
呢一下衝擊令到梁小祺個人立即清醒，佢望一望窗外，知道今日似乎要遲到了。不過佢而家可以做嘅，就係等校巴公司安排第二部車黎接佢地。
 
今日天熱有點熱及焗促，所以有部份乘客選擇落車等待，以及呼吸新鮮空氣
 
同時間，苗學翹渣住車，慢慢駛向學校
 




當經過校巴壞車嘅地方，佢見到一個矮小嘅女孩身影，企係路邊嘅梁小祺
 
學翹發出死火燈號，然後減速，再慢慢將車駛到小祺身邊停低
 
「Suki!!!」苗學翹降低車窗，由駕駛座叫小祺
 
正係路邊企係到等待嘅梁小祺聽到有人由車中叫自己，就抬頭一望
 
「上車啦」車內嘅學翹叫小祺上車，所以梁小祺好快就打開車門上車，坐係車頭，扣好安全帶後，學翹就開車繼續向大學進發
 




「唔該哂你呀」
 
「小事者，唔通要妳企係路邊等咩?」
 
小祺望一望學翹嘅額頭輕聲問到「你…冇事嘛?」
 
「哦，小事黎者。不過按SOP，醫院要留我72小時觀察，有少少小題大做」
 
「咁醫生都係保險一d者」
 




「我唔係到呢兩個星期，氣氛如何?」
 
呢兩星期俾到小祺嘅感覺係，混亂
 
「暫時我每日都係下晝落去，不過眼見都有少少混亂」
 
學翹苦笑一下「咁即係好混亂，等我估下先…係唔係上晝做唔哂野，又堆落下晝，之後又堆去第二日，突然間又話趕又乜?」
 
聽到學翹講哂個情況出黎，小祺都好佩服，冇返工兩星期，但係又知道哂部門情況
 
「呢d野，好易估到」
 
「咁都冇辦法，人手唔夠。你又放緊假，另外果個就….已經俾學校炒左」
 
「呵，大老闆終於搵到機會郁手，快刀斬亂麻，打鐵趁熱」




 
「我都好佩服你地，可以容忍到咁耐」
 
「呢d叫受過長期訓練」
 
返到學校，小祺先行落車返到總部，而學翹就泊好車後行返Office
 
返到去，學翹已經同事追問身體如何，佢望一望個位，果位同事已經唔係到
 
「第二日就俾學校鋸左啦」
 
「咁咪好囉，耳根清靜，又唔洗怕煩到佢瞓晏覺」
 
……………..
「嘩，佢車埋妳返工添呀?好浪漫呀」Rachel邊睇paper邊講




 
「有咩浪費呀?坐係馬路邊食塵呀」
 
「咁點解妳唔留係車上邊呀?」
 
「會焗架嘛」
 
「定係妳根本就係想伏人地部車呢?」
 
「我都係今日先知佢有渣車，點伏?」
 
「咁佢果部係咩車黎架?」
 
小祺用腦回想「類似吉普車，黑色，車呔都算大條」
 




Rachel跟住Suki講嘅特徵上網搵苗學翹部車
 
「喂妳好得閒?唔洗睇paper咩?」
 
「有d八掛部車，呢部?」圖中出現Jeep仔
 
「唔係」
 
「呢部?」大G
 
「唔係」
 
「呢部?」悍馬
 
「邊有咁大部呀?」




 
「細部呀?咁呢部呢?」圖中出現左Suzuki Jimny越野車
 
梁小祺留心一睇「係呢部啦」
 
Rachel眼神非常奸咁望住小祺「部車係Suzuki添喎，同妳幾襯」
 
「襯乜鬼野者，妳點知人地女朋友鍾唔鍾意呀!」
 
「妳又知佢有女朋友」
 
「唔….估囉」
 
「呵呵~Suki姐妳情竇初開啦」
 
「唔係呀!!」