係同屋室友?定係同居密友?: 14. 過Probation

小祺望住學翹係ROY間房到出黎，大家互相點一點頭打招呼。自從小祺帶來賓去分部到之後，佢地兩個講過嘅說話，唔過10句，而且全部係公事，大家仍然保持同事之間嘅距離
 
學翹經過小祺個位時，所見到嘅係一個非常整齊嘅位，而且冇咩雜物
 
「Suki，妳入一入黎丫」大約5分鐘後，到小祺去見老闆
 
「OK，咁妳而家過左probation啦，我都要同妳做個review嘅，so far工作上有冇咩大問題?例如system上有冇阻滯?」
 
「工作上冇咩問題，呢到好多人都幫到我」小祺又冇講錯，係總部果到，好多人都會主動幫佢，所以佢做得好開心
 




「咁樓下呢?」
 
「樓下嘛…」一提到樓下，小祺就面有難色，因為除左上次同同事有少許不快之外，佢都覺得樓下D人係好難合作，因為佢地係慣左一個方法去做野，永遠唔會update SOP，所以顯得比較落後。而且果個OFFICE仲係冇窗戶，所以成個小部門顯得陰沉同冇朝氣
 
Suki佢照實講出黎，ROY都解釋左俾佢聽，因為分部門係要跟實危險倉，管理化學品進出，所以佢地office一定會係d偏僻位置。但係一講到關於某幾位同事嘅處事作風，ROY都暗暗點頭認同
 
「即係有個TO比較麻煩」
 
「係，有時佢突然間放假，令到安排工作上變得混亂。而且仲增加左其他同事工作量」
 




ROY不停jot低重點後，繼續追問小祺
 
「咁其他TO呢?有冇問題?」
 
小祺諗一諗「另外果兩位同事佢地工作態度係180度相反，好積極咁去幫手做野，所以我見一有問題，文員會立即嗌佢地幫手。如果佢地唔係office，都會立即嗌walkie去通知。」
 
「ok，咁綜合黎講，妳會打算留係分部，定係留係呢到?」呢一個小朋友先會做選擇嘅問題，邊會有人鍾意留係個咁多問題嘅部門丫，所以小祺都好斬鐵截鐵咁答，想留返係總部到多d。而老闆都承諾，當同事退休、個新system開始run順後，就會將小祺調返上去總部，呢個兩邊走嘅生涯最多做一年左右
 
既然老闆咁講到，Suki就打算留係分部最多一年，不過佢自己又諗，會唔會未到一年就已經俾同事激到死左，而呢個可能性嘅機會率係絕對唔細
 




苗學翹返到佢暫居嘅公寓式酒店單位，再打電話俾家姐學雯，同家姐解釋自己將會搬入學校宿舍住嘅原因，家姐同姐夫都同意學翹嘅做法，所以佢一收線之後，就Send e-mail俾老闆，話佢知會接受邀請住入宿舍
 
另一方面，肖氏一家都準備哂樓契加名嘅所需文件，仲託同鄉搵埋律師，務求一簽名就將層樓弄到手。而佢地仲四圍同人講，自己就快搬出去九龍，等人羡慕下自己。另外同鄉下親戚傾好，佢地一落到香港，就立即住入佢地而家間屋
 
未正式加到名，佢地一家已經掌握好屋嘅呎吋，已經訂好傢私，肖氏一家知道學翹裝修緊間屋時就更開心興奮，佢地等嘅，就係加名果一刻。係法律上，一加左名之後，佢地就成為業主之一
 
學翹曾經同姐夫討論過呢個問題，姐夫話問題唔大，只要家姐唔簽名，冇人奈到佢地何，姐夫仲介紹左佢做事務律師嘅同學俾學翹，由老朋友幫佢舅仔處理所有事務。好難得，唔洗錢就有相熟嘅律師同大狀，所以，學翹非常感謝大伯一家
 
要黎嘅始終要黎，工作上嘅衝突，話到就到