綠帽日記(粵語): 7:出軌

「唉屌，要10個jagerbomb打打底先，再嚟10個long island tea」梓欣好似唔洗錢咁狂叫酒飲。

「嘩，你想我死喺到？」我無奈地說。

「咩啊？驚啊？驚咪叫橙汁飲囉，驚咪返屋企瞓覺囉小妺妹」梓欣好囂張咁下戰書俾我。

可能受到語言刺激，我都不甘示弱應戰。

「好啊，睇下邊個死先，我係驚你講完自己回力鏢食返咋」我就算知道自己唔飲得，但都要輸人唔輸陣，個氣勢唔可以輸！



咕嚕咕嚕….我直接8秒飲晒一杯long island tea。

「嘩～兒姐有料～」旁邊啲人歡呼。

死火…唔知係咪我唔飲得…定係我飲得太快，個頭唔夠幾秒，即刻暈暈地，酒精上晒腦。

再過多幾秒，又頭暈又頭痛，全身發熱，呢次真係死火，我頭先仲講嘢大大聲，即刻自打嘴巴。

「我……我要唞一唞…真係暈…唔講得笑」我已經唔理坐喺隔離嘅係邊個，而家嘅我淨係想瞓覺。



我直接挨埋隔離位，當係一個枕頭俾我瞓。

瞓下瞓下已經唔知瞓咗幾耐，突然自己醒咗，當初我以為已經俾梓欣幫手打電話叫阿樂接走我，原來一直都瞓喺阿軒懷裏，阿軒仲細細力撥下我頭髮，我無縮開，反而好乖咁繼續瞓，可能因為仲有酒精影響仲係暈暈地，所以費事郁。

「你真係好靚…簡直係全場最靚女嗰個」阿軒一邊撥我頭髮一邊好溫柔咁講。

我心入面其實真係好開心，聽到阿軒咁講個心當堂都溶晒，真係好識哄女仔開心。

阿樂就幾乎冇對我講過呢啲說話，比較直男，有時反應有啲遲鈍。



係呢…唔知阿軒有無女朋友呢？

（故事仍在繼續。。。）