綠帽日記(粵語): 6:新鮮感

「叮～～」我嘅iphone訊息響咗聲。

『今晚出唔出嚟drink，有好多仔～』我嘅好姊妹發嘅訊息內容。

『好啊，唔靚仔嘅我會直接走無面俾㗎』我突然有啲興奮咁回應返好姊妹嘅訊息。

『包你滿意～』既然佢講到咁，咁應該無乜好擔心。

「BB～我今晚同朋友食飯啊，你今晚自己搞掂啦～」我喺房叫出面。



「哦～好啊」阿樂喺到玩緊啲足球game，佢好投入，已經唔得閒應我。

咁我都唔理佢喇，反正佢自己一個喺屋企都無問題，可以放心。

我好快手化咗濃少少嘅妝，再配上埋我一年都唔知有無著5次嘅「戰衣」，Perfect～。

撘地鐵去相約地點，中環。

中環夜晚係做咩，咪飲酒囉，我嘅好姊妹就係約咗我嚟飲酒。



「喂！死婆，全部人等你一個啊仆街」一把熟悉嘅聲音。

佢叫梓欣，係中學同學嚟，佢係中三轉校入嚟，聽聞佢原本係讀國際學校，但唔知咩事轉咗校，更有人傳言話佢老豆破產。

「嘩！你洗唔洗化到咁行啊，想勾佬啊？」梓欣講嘢係比較直接，我都慣咗。

「少少啫，唔好講咁多廢話，gogogo」我諗住輕輕帶過快啲入主題。

臨入bar之前望到，咦…真係有仔喎，計埋我同梓欣總共有4個女仔，仔嘅數量都係4個，仲要顏值都唔錯，真係小鮮肉嚟，即係平均一人一件…哈哈，果然梓欣始終都係信得過，等等…. 有個面孔好熟面口。



「嗯？呢個咪阿軒？hello～你係咪我男朋友嘅朋友啊？」我想清楚確認一下，費事認錯人咁柒。

「你係？….」個靚仔回應

「我啊…阿樂嘅女朋友啊，之前阿樂向我介紹過你，俾過你張相我睇」

「下！原來你就係佢女朋友啊？嘩～個死仔包咁都溝到件靚女，真係羨慕」阿軒個樣好似真係好認真咁講。

咁樣俾阿軒讚一讚，搞到我面都紅晒雙眼唔敢望住佢。

「喂屌！入咗去先慢慢傾啦」梓欣份人無乜耐性，急急腳就推住我哋兩個入去。

我發現今日著藍色衫竟然同阿軒撞色，好似變咗情侶裝咁。

入到去當然係同阿軒坐啦，因為其他仔我都唔識，入面啲人望到我哋仲以為係小情侶嚟。



（故事仍在繼續。。。）