本來諗住對付班電話cold call, 點知攪到自己爭d無命: 8

我打咗個喊露，之後發覺置身咗喺個陌生地方，周圍都係花花草草，一望無際大草原，個感覺似發緊夢，但又好似好真實。我想搵番個幾條靚仔靚妹，但已經唔見晒。

好彩過多唔夠兩分鐘佢哋返返嚟，但一見到佢哋d衣著，我忍唔住笑咗出嚟。

佢哋d裝束就同個d日本拍咗幾十年個d乜乜戰隊乜乜超人一樣，個個帶晒頭盔，著咗唔同顏色，我諗應該係戰衣既東西，條女就著粉紅色短裙，再加埋肥仔，真係啱啱好五個人，四男一女，重係並排咁行過嚟，真係唔知佢哋幾時變咗身。

我記得好細過曾經睇過一套叫神勇飛鷹俠嘅卡通片，佢哋簡直係真人版，個機師又係肥既，唔知架鳳凰號停係邊度呢？

「我都話佢實笑鳩我哋啦！」條女突然間開口。





「唔係唔係，只不過你哋d衫令我諗起d日本真人超人片咋！」

「講吓笑咋，想同你熟絡d」條女望住我，重笑得好甜。

佢著咗套戰衣真係睇得吓，對腳又夠長，少女十八無醜婦絕對無講錯。

肥仔攞咗件好似雨褸嘅黃色東西俾我，叫我著起佢。我問呢件係未戰衣，佢話唔係，但可以保護到自己。佢哋話我重未有戰鬥力，一定要著起佢保護自己。

我起初以為虛擬世界可以飛天盾地，但原來係唔得嘅！轉頭真係有架飛機飛過來，佢哋話要載我去受訓喎！





「咪住先！我要返工噃！要玩幾耐㗎？重有我老豆老母唔知我去咗邊，會發晒癲喎！」

「你放心，依家只不過係先俾你體驗一下，同埋我哋都要做評估，睇下你係未真正有能力上戰場。」綠毛仔咁講。

「同埋我哋同你雙親做咗臨時時空凍結，佢哋暫時會無咗時間意識！」

「即係點呀？唔明」

「簡單d講係佢哋暫時會有認知障礙，但到你返到屋企就會回復正常㗎喇！」





乜咁撚恐怖㗎？萬一唔好番咁點算吖！

「仆街，有五架敵機飛緊來。」

「第五小隊第五小隊過來幫拖呀！」

成個駕駛艙氣氛變得好緊張。

白痴都知發生乜嘢事，但問題係，依家係個虛擬世界，我係咪死一百次都得㗎？

但靚女即刻話俾我知係唔得既，係呢度死咗，你永遠返唔到現實世界。

說時遲那時快，個五架佢哋所講既敵機，已經飛到好近距離……….