本來諗住對付班電話cold call, 點知攪到自己爭d無命: 6

依家整個香港瀰漫一種極詭異氣氛，七百幾萬人好似被一d不明勢力嚴密操控，事實上近排發生咗好幾單不明原因命案，重要係死無全屍個種得人驚死法。

因為唔想兩老同條女擔心，我都無辦法唔妥協，借咗少少。之後d電話明顯少咗，d留言都有番d禮貌客氣。但過無幾耐又故態復萌，我成家都借過錢，就輪到d保險，美容，旅遊會籍等接力。我唔蘇佢哋，佢哋又玩番威迫個招。

再係咁唔撚掂喎，個個電話都要幫襯，我咪遲早成副身家無晒？

七百萬人嘅力量都反抗唔到？不過，依家無七百萬啦，好多都走晒，唔知係咪同呢單嘢有關。我曾經研究過香港以外地方有無發生類似事情，但就無相關報導。而其他地方d國際新聞，又無報導過香港呢年發生嘅怪事。

其他國家係真唔知定唔報，我就真係唔曉得。依家行出街都係見到d唔停接電話嘅喪屍，睇個樣重好似好沉迷咁唔捨得收線。





不過，總會有d漏網之魚。

我平時夜晚放工會喺屋企附近踩吓車，不過唔係單車，係滑板車，但唔係電動個款，話晒重未合法，我又無電單車牌，一有野被警察拉咗，起碼四條罪，為咗貪快付出咁大代價唔值得，話晒我都係會計界，點都會計算吓成本。

況且攞嚟做運動都唔錯，摺埋好慳位，上巴士都好方便。

講番夜晚黑成日有班靚仔一路踩住車一路用個鬼死咁大嘅喇叭fung歌，有一個重有條女企係佢後面。佢哋似乎無受呢單嘢影響到咁，依舊咁精靈生猛，又唔見佢哋成日要接電話。今晚星期五我如常出車，諗住踩去浩和街，即係近年唔少電視劇電影取景個打卡位，當踩到蝴蝶灣公園又撞到佢哋。佢哋手車好辣，通常一踩就爬晒我頭，但今晚有d奇怪唔過我頭，只係跟住我後面。

因為都見慣見熟，都無太為意，我慢慢一路踩，過咗珠江船務，個個平時孭開條女個個矇豬眼綠毛突然上前同我並排，之後重擰頭同我講：





「我哋有嘢要搵你幫手」

我打咗個突，講真咁耐以嚟都無同佢哋交流過，佢哋個樣又似似哋行古惑，好似無乜必要同佢哋講嘢。

「想搵你幫手個樣嘢，係同最近香港發生嘅事情有關」……….