鏡像密語: 第七章、彼此交織的命運

命運之神原來一早靜靜地為梁洛妍同徐亦言套上左一頭一尾既命運繩索，只係兩個人一開始都係背對住對方，其實兩個人咁啱都有拎轉頭望到對方，只可惜佢地都冇對望到。

因為時機⋯⋯




洛妍同吖言係短短既日子好快變得熟絡。真係唔傾都唔知大家原來咁啱傾，大家中意既無論係動漫角色定係劇情，觀點同睇法都相同。

「真係相逢恨晚丫言哥！」





「你簡直係我既知音。」

「你早兩個星期撩我講野咪好囉，可以傾到天昏地暗⋯⋯」洛妍開始抱怨。

「咁⋯⋯我怕醜係真事嘛。」（好似有人唔好意思開口）

「咁我由舊址搬黎呢到我都怕生丫，邊似你一黎返新址，咁你一早熟晒環境嘛。點同我比喎⋯⋯」

「唔係丫，我都係早你少少過嚟新址，我本身都係舊址既人黎嫁。」





「下？但我唔見你既？」洛妍真心一問。

「哦，我諗你入職個時就係咁啱係我過黎新址既時候。」

「唉，咁又緣慳一面左。因為我平時都會跟住sing 哥走黎走去，所以我都見過公司好多同事」洛妍心諗：早啲識就好啦⋯⋯不過唔知吖言係咪都係咁諗呢？

「但依家識都未遲既⋯⋯」

「都係既！」洛妍重新笑返。




（或者個天係呢個時候安排我地認識，一定有佢既用意）

「講個秘密比你聽啦，知音」

「？」

「其實我一開始見到你⋯⋯就已經好想認識你⋯⋯」

「嘩，我完全睇唔出喎，見你一直好cool，唔撩我講野，仲以為你唔想同我講野添」

「咪話左怕醜囉師兄，又要逼人解釋多次既」

「如果我話比你知，其實我都因為想同你講野先會著鬼滅既tee，想吸引下你既注意呢？」

「唔係真事掛？少少感動！」





「真事黎。」

如是者，佢地兩個人愈傾愈啱傾咁，傾到兩個人既whatsapp由朝早到夜晚都係在線既程度，因為發覺太多野都相似，每一日都有唔同既話題，咩星座動漫已經太濕碎，講講下發現原來兩個人既喜好都一樣，一樣識跳舞、中意既顏色甚至係拍拖經歷都類同。

「你又係中意妖精尾巴咩？我都係丫！」

「估你唔到，你仲迷過我。」

「如果早啲識你就好⋯⋯你知唔知我由係新址返工開始食完飯都會趕返公司自己拎手機睇幾集⋯⋯因為身邊冇人中意睇呢套，所以只可能自己煲。」

「唉，早識既話我一早陪你睇到去完結篇啦⋯⋯」

「講講下又好想睇返。」





「不如依家即刻開DC睇返一集先？」

「下，一早開左電腦等你啦。」

「哈哈哈哈——」

「唉，本身都唔想搞咁多野嫁啦，但見你咁有誠意，我唯有勉為其難陪你睇至少一季啦今晚」

「喂⋯⋯哈哈哈哈，車輪戰咁煲，好爽」
（估唔到佢都幾幽默，同佢一齊傾計呢好輕鬆，氣氛都幾好）

「嗱，個男主角下一秒就會出現嫁啦！」

「？」





下一秒，男主角真係出現左！

「嗱，係咪丫？我背熟晒嫁」

「係喎⋯⋯（好叻丫）但⋯⋯試下唔好劇透師兄！」
（可能跟得佢多，自己都跟左佢講呢啲口頭禪）

「唔⋯⋯係⋯⋯丫⋯⋯」吖言心虛到口窒窒。

「哈哈咁都唔認？」洛妍笑到仆。

聽完，吖言自己都笑返自己。

「覺得你好搞笑，死口唔認之餘，否認嘅時候都會帶點無力感，哈哈哈哈」





「哈哈哈哈，比你發現左添」

（點解呢個男仔咁搞笑既）

「唔⋯⋯係⋯⋯丫⋯⋯」洛妍笑住扮吖言既口吻。

「你又扮得幾似嫁喎，笑死」

二個人就係咁傾到去凌晨三點。

⋯⋯

「咩話？你又係中意紫色？到底有咩係唔一樣嫁？」

「應該冇樣係唔一樣」

⋯⋯
「我好中意我個生日日期嫁，所以手機個password 都set左生日」

「你幾時生日？」

「4月20號」

「下，你認真既？」洛妍呆左。

「做咩？」

「我個staff number 係420⋯⋯」

「有冇咁啱丫？」

⋯⋯⋯

「我以前中意過同你同星座既男仔，你地性格幾似下，嘻嘻。」

「嘩，係咪有故事要分享？」

⋯⋯

（有冇咁啱得咁橋丫？造馬咋掛？）

（故事、經歷、鍾情既野樣樣都可以假，但一見如故既感覺係呃唔到人）

（唉，我真係好想繼續同你日傾夜傾）

（只可惜⋯⋯我做兩個月就走，唔知之後大家仲會唔會聯絡呢）

（定係唔好投放咁多感情落去聯絡好呢，以免我辭職個日大家唔開心）

（不過我擔心既野又好似發生左？人地女朋友會唔會介意嫁？我唔想做個種女仔丫⋯⋯）

（但人生難得一知己喎，唔傾盡對唔住自己丫，你自己都預計到嫁啦，要搵到好似吖言咁既人既機率好好好好微）

（但係⋯⋯）

（但咩係姐，只要你知自己咩position ，有分寸咪得囉）

（咁男女之間可以有純友誼？）

（冇既話你咪做左先鋒先囉，為廣大既人類界做榜樣）


短短呢幾日入面，洛妍同吖言唔知講左幾多次「如果早啲識⋯⋯」
（真係隔住個mon都感覺到個種緣慳一面既可惜）
（命運之神丫，挽少我地一陣得唔得？）


儘管洛妍知可能如果再咁落去會令人誤會，但洛妍決定跟隨左自己既心，繼續同吖言傾計。


（續）