那年夏天，親妹的眼睛鮮紅色: #Scene 21

#Scene 21
Day 5
 
後庭裡，還是那三座建築物。浴場、廚房、雜物房。
地牢位處雜物房的地底，地板和牆壁皆為石製，只有牆壁最上方貼著天花的位置裝了四個各半呎高的通風口。通風口上還有鐵枝，讓人無法進出。
也許，這地牢真的是佛滅鄉裡最安全的地方。
跟一個監倉不遑多讓。
 
玎公公拉著我從雜物房揭起的地板走進來，熟悉地走下石樓梯點起牆上的油燈，轉頭再把食物和水瓶丟在一張破木桌上，陰沉無比地說︰
「迅少爺，請你安心留係度……」




安心？自從阿妹失蹤之後，呢個詞對我嚟講，已經變得非常陌生；而見到阿葵……之後，我甚至連個心係邊度都搵唔返。
 
眼睛適應了昏暗之後，周遭的環境還是自然而然地進入我視界。
這地牢大小跟一個課室差不多，也不知多久沒使用過，有一股潮濕不透氣的臭味。
室內毫無佈置可言，只有一套殘陋的木桌椅，和角落一些雜物。
最盡頭處有一個無比簡陋的蹲廁，傳來乾涸坑渠的味道……
 
茫然地看著四周之際，背後突然傳來砰的一聲巨響。
回過身去，玎公公早已無影無蹤。
再抬頭看看石樓梯之上，木揭板已經關得嚴嚴密密。




我走上樓梯，試著推了推，上面似乎壓了重物，絲毫動彈不得。
如此推了一會，我才突然發現，原來綁在我手上的布條，早已在不知不覺間鬆脫了。
是玎公公幫我解的？還是我自己弄掉的？我毫無主意。
 
我乾脆坐下來，頹然趴在木桌上。
合上眼睛，想起的就是阿葵最後的臉，還有在她腦後流淌的紅色液體。
腦中出現的，是無數個「假如」。
每一個假如，都是一次拯救她的機會。每一次機會，我都錯過了。
「仆街……仆街……仆街……」
話罵出口，卻不知道自己在罵誰。也許，我只是在罵我自己。




罵著罵著，我的意識漸漸遠離。
 
醒來之前，一陣寒意沿著我的脊椎直達腦髓。
我睜開眼睛，只見自己果然還在地牢裡，全身肌肉發痛。
夢裡見過什麼，我已經忘了。但醒來之後，那感覺還殘留著。
現在還不是自暴自棄的時候！
我當初不是想，要跟妹妹一起回香港去嗎？
妹妹，她是我最後的希望！
 
我抬頭看看，只見通風口之外，天色早已轉暗。沒有手錶，沒有電話，不知道是幾點。
我檢查過木桌，確定它尚算安全之後，便把它拖動到牆邊，再爬上木桌調查通風口。
還好這地牢樓底不算太高，我的手指剛好能夠到通風口。
通風口約有半尺高，外邊就是地面，如果沒有鐵枝的話，我就能從通風口爬出去。
只可惜，通風口內每相隔兩吋就安裝了一條玄鐵色鐵枝，直徑差不多有1cm粗。
我試著拉扯了一下。紋風不動。




我又花了大半小時，試著把四個通風口上每根鐵枝都轉了一下。
結果，當然一枝都拿不下來。
我放棄通風口爬回地牢裡，一邊喘息著一邊整理現在情況。
 
桃姨話，佢要保護我，所以將我困係度。
但係，有用咩？假如連串死亡事件真係佢地所講嘅業報，就算身處密室都照樣會死。
除非，死亡事件其實係人為。
人為？
咁又好奇怪。如果係人為，點解桃姨係咁講過咗聽日就會無事？
唔通，佢地聽日就可以殺咗個兇手？
 
想到這裡，我心裡突然閃過一絲奇怪的靈感，但那想法一閃即逝，我沒能把它抓住。
村民，兇手，傳說，業報，母親的葬體……
這些事情之間，一定有什麼關連。
到底，是什麼呢？




 
思維一片混亂，無法理出頭緒。
雖然沒有胃口，但為了隨時保持戰鬥格，我還是拿起玎公公丟在木桌上的米餅一邊咬著，一邊觀察這個地牢。
由於已經到了晚上，地牢比我當初進來時更加昏暗。
然而，借著油燈搖晃的光線，我還是看到了對面牆上那東西。
我以為自己看錯了，然而，集中精神盯了一會，結果卻還是一樣。
那個吊在對面牆上，全體呈深黑色，以一條鐵鏈和兩個鐵環組成的東西，令人充滿幻想。
 
果個形狀，咁似睇電視劇見過，古代用嚟吊起人雙手嚟拷問嘅……
手扣？
唔撚係呀！？
 
我丟下米餅，走到那面牆下面，認真地察看著。
仆街，居然無睇錯……
的確是手銬，最少有5CM粗，呈玄鐵色，用鐵鏈固定在牆上。




而且，最重要的是，不止一雙。
在差不多有十米長的這一面牆上，整齊地掛著一大排手銬，粗略一看差不多有二十副……
痴線……搞咩撚嘢呀……
就算係監倉都好，都唔使一次鎖咁多人架？
呢度莫非係……拷問室？
假如，佢地困我係度唔係為咗要保護我，而係要消磨我嘅體力再進行其他陰謀嘅話……
 
我伸手拉了拉高度在我眼睛附近的手扣，確定它們都是真貨無法取下來之後，馬上意識到事態嚴重，並開始仔細地在地牢中找逃生之路。
首先，是除了通風口外唯一可以通到外界的地方——蹲廁。
角落的蹲廁，沒有門。
兩側只有幾塊磚頭疊起來，剛好能擋住蹲下來拉撒的屁股。
大概因為下面直通化糞池的關係，一股噁心的沼氣味道。
我捂著鼻子蹲下來，仔細觀察蹲廁內部。
很乾，應該很久沒人用過了，然而，白色的廁盤裡卻沾著各種深色的污積。由於火光太暗，我無法分辨出具體顏色來。
 




在蹲廁裡找不到端倪，我便轉向另一個角落的雜物。
那裡都是些麻布袋，差不多有八、九個，每袋約一呎見方，很飽滿。
我拿了一下，挺重；再揪一下，軟的；打開一看，像是沙泥，毫無收獲。
我想能找到一件硬物防身也好，便把那些沙袋一個一個搬開。
沒想到，搬了三、四個之後，地面上突然傳來淡淡的藍綠色微光！
 
在昏暗的環境中，我忍不住凝視著那微光。
等到眼睛適應了光線，我才看清楚那東西的真相——
白骨。
跟我手臂骨差不多粗細的，斷開了的白骨。
FUCK！
久違的心跳聲，在我胸膛內猛地響起。
 
我扔下手上的麻布袋，一口氣衝上石樓梯狂拍那木揭板。
推了兩、三分鐘，我滿身大汗，那木揭板卻還是動也不動。
正想著拿個什麼東西助力，我突然聽到幽幽的女聲在身後響起︰
「……阿迅……」
 
我只覺後頸一涼，回頭看去，地牢裡果然空無一人。
一股來歷不明的寒意在我後背竄過，如像蚯蚓正沿著我的尾龍骨跑到頸椎那樣，使我後背的汗毛全部倒豎。
 
桃姨佢地一直話村入面嘅死亡事件係「業報」，當然我唔會信，但係……
呢個鬼地方，會唔會真係有鬼？
講真，死咗咁多人，呢度應該好多鬼魂先岩！
甚至……會唔會係阿葵返咗嚟？
 
「……阿葵……係咪你……？」
我回身對著空蕩蕩的地牢，小聲地問。
等了沒幾秒，那聲音又再來︰
「阿迅仔，我係呢度——」
這次聽得仔細，聲音倒不似是阿葵，反而像是……巽榣？
 
我心念一動，向通風口那邊看去，竟然真的見到一個人影正趴在通風口外！
那人影發現我在看她，連忙興奮地向我擺手。
雖然外邊天色已轉暗，無法看清她的五官，但憑這動作，我已知道外邊肯定是巽榣。
確定了是她之後，我不由得鬆了口氣。
 
我跑下石樓梯，再次把木桌推到牆邊，爬上去對著通風口說︰
「阿榣！你點知我係度架！」
「我行過聽到你係度叫啦——」
我有點奇怪︰
「行過？你點解會入咗嚟天等房嘅？」
她皺著眉，焦急地叫︰
「當然係為咗你啦——阿迅仔，你而家嘅情況好危險架！」
「吓？我？」
「而家不得閒同你解釋住啦——！你話俾我知，地牢個入口係邊？我嚟帶你走！」
我把位置交待完之後，巽榣便叫我安心等著，然後離開通風口。
 
直至看不到她的身影，我才突然覺得不對勁。
我被玎公公帶走時，阿榣因為救我被村民抓住。以瑚阿婆的素行，哪會如此輕易放過她？放過她，不就等於是再次給她救我的機會？瑚阿婆可是矢志不渝地想殺死我呢！
那麼，就只有兩個可能︰
一，阿榣以寡敵眾，單人匹馬地衝破了眾村民的防守線。
二，阿榣已經叛變，成為了其他村民的一份子。現在她說要來救我，不過是個陷阱……
冷靜點考慮的話，第二個可能性的機率實在高太多了！
 
越想越不安時，石樓梯上方傳來戛戛響聲，揭板上的重物正被移走。
仆街！佢咁快手嘅！
唔怕一萬，最怕萬一，笠定架撐先！
我在地牢裡咗看右看，硬是看不到任何可以用作防衛的武器。
我咬一咬牙，強忍著噁心拿起那條斷出一邊尖角的白骨，屏息以待——
係嘅，擺咗咁耐，條骨可能係脆咗D嘅……但起碼，萬一阿榣拿嘢劈我，用呢條嘢擋點都好過用自己隻手擋呀！
 
嘰呀——
 
木板向上翻開，外邊的灰黃光線與巽榣的聲音同時傳進地牢裡︰
「阿迅仔——」
蹬……蹬……蹬……
她的腳步一步一步地深入地牢當中。
我全神貫注地看著，那一點點地出現的小腿、大腿、腰、胸……
她身上，竟然穿著全副武裝！
這幾天來，她一直身穿佛滅鄉民族服裝，現在卻竟然換上了當初我在遠田村邂逅她時穿的貼身T-SHIRT和超短熱褲！
而且，彷彿為了暗算我似地，亞麻色的長髮還跟低領下露出的心口肉一起有節奏地搖動！
 
就是那一下分了神，令不習慣拿武器的我放鬆了原本握得比命還緊的白骨。
偏偏就在同一剎那，身穿短褲的巽榣無比敏捷地向我衝過來。
FUCK！
我下意識地舉起雙手擋在臉前——
等了一會，預想中的攻擊還沒來到；反而，什麼東西纏上了我的手。
溫暖的、細膩的觸感。
女孩子雙手柔軟的觸感。
 
我定一定神，只見巽榣不光緊握住我雙手，還使勁地拉我走︰
「阿迅仔，快D走啦——！」
「……走？你叫我走？」
她急得直冒汗︰
「你仲咁悠閒……哎哎哎呀！總、總之，不想歿嘅話，即刻跟我走啦——！佢地捉咗你嚟呢度，只係等到時殺咗你架咋！」
 
剛才的可能性，再次在我腦海裡出現。
一，阿榣以寡敵眾，單人匹馬地衝破了眾村民的防守線。
二，阿榣已經叛變，成為了其他村民的一份子。現在她說要來救我，不過是個陷阱。
二者，只可能選其一。
我看著阿榣的臉，她的眼神裡，寫滿對我的關心。
雖然氣氛完全不對，但不知怎的，我就是想起了當天她在荔枝樹上為我吹奏快樂頌的情景。
她的眼神，依然跟那時一模一樣，那麼清澈，那麼純粹。
 
我心裡一熱，幾乎不經思考就抓起阿榣的手，一起跑出了地牢。
我想直跑去天等房大門，阿榣突然拉住我，叫我先找個地方躲起來。
四下望了望，我馬上拉開浴場的門，跟阿榣兩人跑了進去。
浴場裡不光沒有人，連燈火都沒有。我們挑了浴池邊一塊大石頭，躲起來之後一直觀察著浴場出入口。
周圍寧靜得只有蟬叫，偌大的佛滅鄉裡，彷彿沒有人住。
 
我心神稍定，便問巽榣︰
「阿榣，你點樣走出嚟架？瑚阿婆又會放你走嘅？」
阿榣哈哈笑了，說︰
「阿迅仔，你不記得啦——？我係煮飯架！」
「係呀，你負責煮飯，咁所以？」
「瑚阿婆教訓咗我一輪之後，都要食飯架嘛！於是，我咪認錯然後去煮飯，之後係佢地D飯菜度加咗少少瀉藥……」
她天真地眨眨眼，彷彿做了惡作劇的小學生。
 
「你……真係估你唔到喎……」
她小惡魔似地笑而不語，我又說︰
「點解你唔毒死埋佢地算數？咁我地咪唔使煩囉。」
她連忙動作誇張地用力耍手︰
「不得不得不得啦——！點可以咁樣做架？」
「哈哈，我都係講下啫。不過，你話佢地……想殺我？呢件事，係真架？」
她神奇凝重地點頭︰
「真架！我聽到佢地商量緊計劃，話天一光就要殺咗你，所以先至出此下策嚟救你啦——」
 
「到底係咩事？點解要殺咗我？因為覺得我剋死咁多人？定係因為我對眼唔係紅色？」
「係……不係……係……哎呀！總之，聽朝一天光，你就會無命架啦！」
看她急得口齒不清，我只能拍拍她的肩讓她冷靜下來︰
「而家個天仲咁黑，有排都未天光啦！你慢慢講，我想搞清楚成件事……聽朝係我母親嘅葬禮儀式，呢樣嘢係咪真嘅？」
「嗯嗯嗯！真架！」
 
我的腦子高速運轉起來，突然出現了瘋狂的聯想︰
「聽日就係母親嘅葬禮……佢地一直話到咗聽日就會無事……你話佢地天一光就會殺我……呢三件事，係咪有咩關係？……莫非，只要殺咗我佢地就會無事？」
巽榣皺著眉︰
「只係佢地嘅迷信啦——」
「咁即係係啦！佢地覺得我係不祥人，帶嚟災難，害死咁撚多人，所以要我同母親一齊合葬，係咪咁呀！？」
 
我越說越激動，說到最後竟忘我地怒吼起來。
巽榣連忙抓住我雙肩讓我鎮定，卻意外地弄痛我的傷口，結果又忙著安撫我……如此折騰一番之後，我們兩個才終於平靜下來。
然後，巽榣開始從頭解釋整件事︰
 
「不係因為你嚟到，害死人啦——而係，佢地覺得，你嘅出生本身，本身就係一個錯誤嘅犯禁。」
我突然想起了在母親房裡看過的日記︰
「係啦……我出生果時，佢地已經想殺我……因為天等房一定要生個女……」
她點頭︰
「天等房生咗個仔，即係代表母親犯咗禁，所以，佢地覺得必須殺咗個犯禁嘅孽種，重新進行儀式……」
「呢件事我知道，所以母親先至走咗落山，送咗我俾人。」
說到這裡，我突然想到一個問題︰
「等陣！我記得阿葵個家姐……好似叫阿艾？佢係咪犯咗禁，轉頭就俾人殺咗？咁後嚟母親返番入村，點解又無事？點解佢地唔殺埋我母親？」
 
阿榣低著頭，臉上蒙上一層陰影，黯然地說︰
「小艾件事……點講好啦——總之，如果天等無聖物嘅話，佢應該一早就歿咗。」
「咁即係話，佢地唔殺母親都係因為驚無咗聖物會有業報？」
看阿榣點頭，我又問︰
「聽桃姨講，母親懷孕果時身上已經出現咗聖物……但係，母親仲有兩個妹妹呀。殺咗母親，等桃姨做天等，咪皆大歡喜囉。係咪佢地擔心聖物傳唔到去妹妹度？」
「當然啦——一嚟，佛滅鄉有史以嚟，聖物都係只會傳俾下一代架！二嚟，我地佛滅鄉嘅天等以前都係獨生，無姐妹！後嚟小茹出世，件事已經過咗好耐，加上犯禁嘅人又係天等，所以都無特別追究。」
我想了想，忍不住搖頭︰
「唉，真係唔明……咁嘅變態鄉規之下，生一個就算啦！唔好生咁多個女，就唔會咁混亂，又唔會搞到個個都俾人輪啦……」
 
阿榣猶豫了一會，才嘆口氣說︰
「無辦法啦——因為珍姨——即係天等佢地個媽媽，佢係雙生兒……」
「係雙生兒，咁又點？」
「聽聞……當時我真係未出生，只係聽返嚟架咋——！聽聞，珍姨好想做天等，但佢又有個雙生姐姐，佢好擔心聖物不會落係自己身上。不知點解啦，最後佢就覺得多辦幾次儀式，多生幾個女，可以增加自己機會……」
我不禁錯愕︰
「咁唔係唔守鄉規咩？其他村民又會由得佢嘅？」
「因為珍姨好好口才，而且對梵天又極度虔誠……我都不知點解啦！總之，最後佢說服咗班村民——」
「聽你咁講，我唔知點解就係會諗起桃姨……」
 
阿榣連連點頭︰
「無錯啦——！桃姐簡直盡得珍姨真傳，所以先至又生咗三個！」
說起桃姨的三個子女，我不由得又想起阿葵，胸口馬上壓了一塊大石︰
「何必呢……咁第日D女又要俾人輪，輪完仲要生，生完又要爭……根本就係一個無止境嘅悲劇……」
「的確——呢度發生嘅一切，都只係無止境嘅悲劇……所有嘢都係……」
看阿榣黯然的樣子，我不忍心再批評下去，只好歎口氣說︰
「講番我果筆先。好啦，既然都放過咗我咁多年，你地都相安無事，咁咪算囉……點解又要叫我返嚟呀？叫咗我返嚟，又搞到引嚟D咩業報死咁多人，何必呢？」
她瞪大雙眼，誇張地擺手︰
「錯、錯錯錯！阿迅仔你錯啦——！我估、只係我估咋！佢地由一開始叫你返嚟，就係為咗殺咗你啦——！」
 
我呆了整整十秒，才壓低聲音反問︰
「吓？叫我返嚟……就係為咗殺我？」
「只係我估啦——！啊！不過，一開始我係不知道啦——！如果我知道，我肯定不會帶你入嚟架！」
「我信你……但我想知道，點解你會咁估？」
她的眼珠子轉了轉︰
「果日我地爬荔枝樹，阿迅仔你話，佢地個個都係你身上搵某樣嘢，又問我聖物係咩嘢……當時我就估，天等房嘅人咁搵法，即係代表聖物無出現啦——！」
 
我奇道︰
「聽我講你先知個聖物無出現？」
「係架，天等房嘅事，外邊嘅村民無資格過問啦——！除咗天等房之外，可能就只有瑚阿婆呢D長老會知。」
我點頭表示了解，又聽巽榣繼續說︰
「歷來天等歿咗之後，聖物都會即時出現係下一輩身上。我估，聖物無出現，佢地一定好驚架！點解聖物會不出現呢……？」
「……點解呢？」
巽榣攤攤手︰
「不知道架！不過我估啦——歷來從無天等生嘅仔能夠存活，更何況呢個仔仲要不係紅眼嘅……所以，佢地好可能會覺得，係因為呢個棕眼仔，而令到聖物不係下一代嘅女身上出現……」
 
我不禁動容，又拉開衣領看看胸前︰
「佢地以為個印嚟咗我度？咪玩啦！我真係無！」
她惡作劇地笑了︰
「可能因為你係男仔，所以聖物不出現係胸前啦——！你有無睇過屁股上面有無？」
「吓？唔係呀……」
「屁股你自己又睇不見，可能出現咗你都不知道架！」
 
我忽發奇想，有意脫下褲子讓巽榣幫我檢查一下。不過，現在並不是玩鬧的時候︰
「唔係呀……我岩岩嚟果日，細姨同小莜已經借D易檢查過，我真係無哩……」
她收歛起笑容︰
「無嘅話，咁更加麻煩啦——！聖物去咗邊？個個都無，點解？係咪梵天想要佛滅鄉毀滅？係咪因為天等生咗個血統唔純嘅仔令到梵天不高興，所以收起聖物，帶嚟業報，懲罰佛滅鄉嘅人？……」
「停停停停停！就係因為咁……只係呢D咁無根據嘅推測，所以……所以就要殺咗我！？」
她歎了一口氣，重重地點頭︰
「佢地做得出架！為咗自己能夠生存，哪怕1%機會，都要去試啦——！更何況，而家咁多人歿咗，更加加深咗佢地對業報嘅恐懼，所以咩方法都要試下……」
 
我心中悲涼至極，卻反而苦笑起來︰
「原來係咁……咁即係話叫我嚟奔喪只係借口，由一開始桃姨就係想殺咗我，變番個聖物出嚟……我只係一隻用嚟還神嘅畜生……」
阿榣拉起我雙手，強擠出一個微笑︰
「阿迅仔，仲有機會架！而家佢地不會出手住。佢地應該係計劃好係聽朝天等葬禮嘅同時，舉行祭祀儀式殺咗你！所以，只要你今晚走咗，咁就無事架啦——！」
 
我滿腦子只想著自己的安危，完全顧不上其他的事。
原本，我還在懷疑阿榣是否已經變節。不過，聽完這些話之後，我發現阿榣始終是最可靠的！
除了阿榣說的這個解釋之外，還有什麼理由可以說明一直以來不讓我走、又把我困在地牢等種種事？
果然，這個佛滅鄉裡只有在外生活多年的阿榣還能算是個正常人！
我不相信她，又能相信誰？
我凝望著她的眼睛，胸中湧起一鼓熱血︰
「我明白喇！不過，走之前，我仲有件事要做！」
她聽我決定要走，明顯鬆了一口氣。轉頭才問︰
「係咩嘢啦——？」
「阿妹失蹤件事，我一直覺得玎公公好可疑……係走之前，我要去搵返阿妹先！」
 
#21完