【愛情】如地下情一樣嘅癮，係我對你嘅定義: 122

「細妹，你唔好亂講⋯」江阿姨皺起眉頭，「我知你地感情好，但係錯就要認！樂時唔可以講大話去維護佢！」

「我冇呀⋯！我冇講大話呀⋯！」鍾樂時直接喺鍾安而嘅面前喊咗出嚟，「我中意佢，唔係佢嘅錯嚟⋯！」

係嘛，邊個中意邊個都冇錯，本來「喜歡」就唔係一件錯事，但點解喺佢身上就會變成一種過錯？

呀⋯因為佢地係兄妹，冇血緣關係，但家庭上嚟講已經係嘅兄妹⋯

「阿姨！」鍾樂時跪喺江阿姨面前，「你知我唔講大話㗎⋯！所以真係唔關江清懿嘅事！」





江阿姨聽住鍾樂時嘅自白一時之間反應唔嚟，拎住衣架嘅手緩緩垂低

鍾樂時都唔太記得最後係點樣結束，當回過神嘅時候發現自己早早就坐咗喺房， 臉上有乾咗嘅淚痕，小腿上有一道紅痕

原來自己捱咗一下衣架都唔知，當時情況太急，佢唔想佢捱打，諗都冇諗就揀咗擋喺佢前面

鍾樂時小心翼翼咁打開門，盡量唔發出半分聲音，探頭望出走廊都可以感覺到屋入面嘅冷清

鍾樂時輕手輕腳行出房，行到鍾安而嘅房門前怯怯咁叫咗一聲：「哥哥⋯」





等鍾安而回頭望佢嘅時候先從門縫入去

「坐啦。」鍾安而輕嘆一口氣，佢望到鍾樂時手上拎住嘅藥膏，「係唔係要轉交過去隔離房？」

「嗯⋯」鍾樂時點點頭，企喺鍾安而嘅隔離，「你係唔係都嬲我？」

「我做咩要嬲你？」鍾安而將鍾樂時手上嘅藥膏拎起放到枱上，「因為你中意江清懿？」

「你係唔係都覺得我做錯事啦⋯？」鍾樂時眼眶一紅，嘴一撅，眼淚又要滴落嚟





「冇嬲。」鍾安而抽咗張紙巾遞比鍾樂時，「只係有啲意外，學校嘅傳聞原來係真。」

「原來，已經傳到去你度啦⋯？」鍾樂時輕輕一笑，下一秒就收起笑容露出自責嘅神情，「哥哥對唔住⋯」

「唔洗對唔住。」鍾安而輕嘆一口氣

「哥哥，你覺得呢⋯？」鍾樂時低聲問，「係唔係我做錯事啦⋯？」

對鍾樂時嚟講，鍾安而先係佢最大嘅依靠，就算呢個屋企所有人都錫佢，佢都仍然覺得只有同鍾安而最親近，所以佢最在意嘅都係鍾安而嘅想法

「唔⋯」鍾安而猶疑咗一陣，但都係決定開口同佢講，「其實我覺得，啱啱江清懿講嘅嘢，都錯唔晒⋯你同佢本來就唔係親兄妹，所以我冇覺得係你嘅錯。」

中意一個人，太需要勇氣⋯

「唔知道，佢痛唔痛⋯比阿姨狠狠咁打咗咁多下⋯」鍾樂時垂低頭，雙手不知所措咁扣埋一齊





「佢痛唔痛我唔太在意，我在意你痛唔痛。」鍾安而嘅說話令鍾樂時嘅心都溫暖起嚟

「我唔痛。」鍾樂時露出笑容，「都係哥哥最錫我⋯」

「大家都錫你，只係用嘅方式唔一樣。」鍾安而露出淺淺嘅笑容，手將放喺枱上嘅藥膏拎起放到鍾樂時嘅手裏，「都係你自己去啦。」

鍾樂時喺叩門前深呼吸一口，等自己嘅心平靜落嚟嘅時候先緩緩提手：「叩叩—」

「係你呀⋯」江清懿起身去開門，鍾樂時就企喺佢嘅房門前

江清懿轉身行番入房，喺書枱前坐低，電腦嘅螢幕上係YouTube嘅頁面

「嗱。」鍾樂時看似瀟灑咁將藥膏遞出去，實際上佢連江清懿嘅眼都唔敢望，「比你⋯」





「多謝。」江清懿伸手接過藥膏，「不過你留比自己好似會更好⋯」

「我唔洗，我唔痛。」鍾樂時堅強咁搖頭，明明宜家都會覺得有啲刺痛，「我唔後悔。」

江清懿一時之間唔知要講咩好，佢到讚鍾樂時嘅堅毅精神定係要笑佢傻？

「累你比人打對唔住⋯」鍾樂時乖巧咁低頭道歉

「唔洗，我細個都比我媽打慣。」江清懿唔太在乎咁講道，「所以話，唔可以就係唔可以。」

鍾樂時聽出佢嘅意思，垂眸思考，問自己嘅內心係唔係要放棄

忽然諗起佢地學生會嘅會長同文書，雙向奔赴係一件幾美好嘅事，大概佢呢個單箭頭嘅人唔會感受到

每一個假裝唔在意嘅眼神都收起咗最真摯嘅感情，每一次望向對方嘅雙眼都可以感受到同頻嘅心意





「但係，我仍然只係想中意你。」鍾樂時帶住淡淡嘅笑容講咗一句

江清懿望到佢眼底嘅認真，就算咁艱辛都唔願意放棄，係因為喺愛包圍下長大而變得勇敢無懼？

唔係所有人都會有愛人嘅勇氣，亦唔係所有人都可以喺注定失敗嘅結果前堅守到最後⋯

⋯

過咗兩日假期嘅上學日，一朝早喺番學嘅路上就見到宋楚妍嘅身影

「你唔上前搵佢？」陸修然望到黎昕淇嘅眼中望到佢嘅忐忑

「佢仲嬲緊⋯」黎昕淇苦惱咁抬頭望向陸修然





「佢嬲緊你就唔搵佢啦？」陸修然不禁笑出聲，「真係為咗拍拖連朋友都唔要啦？」

「最衰就係你⋯」黎昕淇輕哼一聲，試圖將問題嘅70%都推比陸修然

「又關我事？」陸修然更無奈

黎昕淇因為宋楚妍嘅小脾氣而悶悶不樂，見到陸修然都冇心情都算，宜家仲要承擔一部分責任？

「唔關你事咩？」黎昕淇瞪咗陸修然一眼，下一秒嘅眼神同脾氣又軟落去

「你快啲上去追番你個朋友，陣間人地以為我唆擺你⋯」陸修然輕輕推咗黎昕淇一下

黎昕淇向前行咗兩步，回頭望一望陸修然先再加快腳步追上去

「楚妍早晨！」黎昕淇行到宋楚妍旁邊

「哦，早晨。」宋楚妍嘅反應都係有啲冷淡，雖然已經冇當下咁大反應，但都係覺得卡住唔舒服

「你仲嬲緊呀⋯？」黎昕淇小心翼翼咁問同時一直觀察住宋楚妍嘅微表情，「對唔住嘛，我真係唔係特登唔同你講㗎⋯」

「哦。」宋楚妍嘅反應冷淡，好似已經完全不敢興趣一樣

「楚妍呀，唔好嬲啦～」黎昕淇伸手捉住宋楚妍嘅手踭搖兩搖

宋楚妍當咩都聽唔到、睇唔到，但黎昕淇罕有咁拉住佢撒嬌求原諒，宋楚妍又唔爭氣咁嘴角上揚




IG Link: https://www.instagram.com/nd_cotttoncandy/?hl=zh-tw