【愛情】如地下情一樣嘅癮，係我對你嘅定義: 121
江清懿佩服鍾樂時嘅勇敢，但係正因為佢係江清懿，佢唔可以接受佢呢份勇敢，佢唔敢去承擔後果
廚房內回歸平靜，鍾樂時仍然拉住江清懿嘅衫角將佢囚禁喺廚櫃嘅轉角位，江清懿雙手㩒住喺廚櫃嘅邊緣，唔敢回應
望住江清懿氣定神閒嘅表情，鍾樂時有挫敗感，但佢冇放棄嘅想法
一不做二不休，鍾樂時拉住江清懿嘅衫角，微微踮起腳尖湊近江清懿，冰涼嘅感覺從唇上傳嚟
「你地兩個—」
突然傳嚟第三個人嘅聲音，將兩個人都嚇咗一跳，鍾樂時頓時鬆手同江清懿分開，企喺廚房門口嘅係江阿姨
兩個人都好似做錯事嘅小朋友一樣怯怯咁望住江阿姨，但又唔敢對視太耐
⋯
翌日，食早餐時嘅低氣壓令大家都渾身唔自在，鍾安而完全唔知發生咩事，望一望江阿姨嘅表情又瞄咗江清懿同鍾樂時一眼
「快啲食完快啲起身走⋯」鍾安而喺心中默默盤算
直到中午，鍾爸爸出咗門口工作之後，真正嘅低氣壓迎面襲嚟，屋內嘅氣溫都好似跌咗兩度咁
鍾安而放低筷子，三人將枱上嘅碗筷都執好放喺廚房
「安而，啲嘢唔洗洗住，陣間我洗啦。」江阿姨行到伸手準備拎起百潔布嘅鍾安而身邊
「哦⋯」鍾安而隱隱約約察覺到唔妥，但又唔知發生咩事，只好乖乖聽話
「江清懿，跟我出嚟。」江阿姨經過江清懿身邊行出廚房，低聲講咗一句
江清懿跟喺後面行出去，鍾安而連忙拉住鍾樂時，細聲問道：「發生咩事？」
鍾樂時轉頭望向鍾安而，擔憂兩個字都寫到臉上，有口難言嘅模樣令鍾安而更加困惑
鍾樂時顧唔上咁多就小跑跟上去，鍾安而行出廚房，只見江阿姨一臉嚴肅咁挺直腰桿坐喺梳化上
鍾樂時朝江清懿望一眼，腦波中只有琴晚最後江清懿同佢講嘅說話
「我媽問起嘅話，你當咩都唔知就得。」
「所以，你乖乖地企埋一邊就可以，我會承擔一切問題。」
鍾樂時企喺江阿姨隔離，江阿姨伸手輕輕拉住鍾樂時，就好似怕佢會驚一樣安慰住佢
「江清懿，跪低。」江阿姨開口之際，鍾樂時連呼吸都放輕咗
鍾樂時嘅視線只係落喺跪喺江阿姨面前嘅江清懿身上
「江清懿，我係唔係有話過比你聽，叫你唔好亂嚟？」江阿姨一改平日嘅慈愛，嚴肅咁問
「有。」江清懿冇否認任何事，只係默默咁跪喺度
「咁你仲做！」江阿姨即刻火冒三丈，用力咁拍一下喺梳化前嘅矮桌
鍾樂時嚇咗一跳，握咗江阿姨嘅手一下，江阿姨即刻望向鍾樂時，輕輕拍一拍佢嘅手背：「樂時唔洗驚。」
鍾樂時望住江清懿，江清懿面無表情咁望住前方，鍾樂時擰轉頭望向哥哥鍾安而，鍾安而本來就咩都唔知，所以完全冇打算講啲咩
鍾樂時心入面有啲焦急，伸手去拉鍾安而嘅手，用眼神懇求鍾安而解圍
「江清懿，樂時係妹妹，你地係兄妹，咁樣唔啱㗎！你知唔知錯！」江阿姨氣憤咁問
江阿姨都唔忍心要鬧江清懿，但係佢唔開口嘅話，比人地生母知道佢個仔中意咗人地個女，人地生母點諗佢？
佢講過，佢對江清懿、鍾家兄妹唔會有任何偏頗，做人後母就係咁樣，所以就算唔係佢所出嘅鍾安而、鍾樂時，佢都會對佢地好
正因為佢講話要唔偏頗咁對待三人，所以佢更加要維護鍾樂時，唔想鍾樂時受委屈，更加唔想比人對佢呢個後母指指點點
「知錯。」江清懿低聲講道
「你知錯？一啲知錯嘅態度都冇！仲話知錯？」江阿姨望住面無表情咁講知錯嘅江清懿就更嬲
「我同細妹本來就唔係親兄妹，就算真係有啲咩，我地又冇血緣關係。」江清懿唔識死咁解釋
企喺一旁嘅鍾安而忍唔住瞪大眼，一方面係懷疑佢係唔係真係對鍾樂時有咩想法，另一方面係驚訝佢居然敢喺江阿姨咁嬲嘅時候火上加油
但諗深一層，鍾安而其實都唔覺得江清懿會做啲咁過火嘅行為，佢平時對鍾樂時完全唔似有非分之想，就係當佢妹妹一樣
「你、你⋯！江清懿！」江阿姨瞪大眼，一下子就企起身，大步行入廚房
「到底咩事？」「琴晚—」
鍾安而未搞清楚、鍾樂時未講到出口，江阿姨已經喺再行出嚟，手上拎住個衣架
「江清懿！我今日唔打你就唔係你阿媽！」江阿姨甩咗手上嘅衣架一下，風聲「嗖」一聲喺耳邊擦過
鍾樂時都要嚇死，用力咁捉住鍾安而嘅衫角，江阿姨嘅憤怒值上到最高點，拎起衣架就打落去，江清懿跪喺原地唔閃避，默默咁捱打
「你係唔係要激死我！」江阿姨真係用力打落去，揮衣架嘅時候什至可以聽到同空氣碰撞嘅聲音，「係唔係！連樂時你都夠膽中意！你係唔係想激死我！係咪想我比人喺背後話我呢個人點做後母！」
鍾樂時又急又驚，都就嚟要嚇到喊出嚟，佢就唔應該聽江清懿講，企喺一邊唔好出聲，將錯推比江清懿，宜家連累佢捱打
「阿姨⋯！」鍾樂時鼓起勇氣衝出去擋喺江清懿面前，拉住江阿姨嘅手，「阿姨，唔好打啦⋯！」
「樂時，阿姨會幫你，你唔洗怕⋯」江阿姨拍一拍鍾樂時嘅手，「安而，拉開細妹！」
鍾安而乖乖聽話，上前拉開鍾樂時，佢怕陣間江阿姨衣架一揮真係打到佢妹妹
「唔、唔係⋯阿姨，唔關江清懿事㗎⋯！」鍾樂時一時情急，從鍾安而嘅手心掙脫，直接跪喺江阿姨面前，「江清懿怕我會捱鬧，所以，所以先將錯攬上身，但唔係佢嘅錯⋯！」
鍾安而喺一邊都呆咗，望住跪喺地上嘅鍾樂時，原來鍾樂時中意嘅人，真係江清懿
「亂講啲咩呀？行埋一邊。」江清懿皺起眉頭，連忙阻止佢繼續解釋
鍾樂時係女仔，平時連家務都唔洗做嘅佢皮膚嫩，佢太了解佢阿媽嘅火氣，陣間自己阿媽打埋佢點算？唔可以⋯！
江清懿望咗鍾安而一眼，鍾安而知佢咩意思，即刻大步上前想拉起鍾樂時，但鍾樂時用盡全身嘅力反抗，死都要跪喺地上面
「阿姨！係我嘅錯！係我中意在先！江清懿咩都唔知㗎，一直以嚟都係我主動！」鍾樂時拉住江阿姨嘅手，「你要打，打我就係，唔好打佢⋯！」
IG Link: https://www.instagram.com/nd_cotttoncandy/?hl=zh-tw