【愛情】如地下情一樣嘅癮，係我對你嘅定義: 94.

鍾安而上車嘅時候冇留意到有兩個人望住佢，直至企喺佢隔離嘅鄭洛苡伸手拍佢

「早⋯」鍾安而望向左邊嘅時候，第一眼先見到鄭洛苡，然後再見到黎昕淇

鍾安而下意識一樣望向前一個車門，陸修然喺嗰邊嘅門邊，鍾安而又望黎昕淇一眼，今次同黎昕淇對上視線

「你今日喺呢個位上車嘅？」鄭洛苡抬起頭望向鍾安而

「落到嚟啱啱好有車，就唔行咁遠。」鍾安而嘅注意力頓時番到鄭洛苡嘅身上





黎昕淇嘅目光落喺手機，但耳仔忍唔住聽佢地嘅對話內容，忍唔住好奇佢地平時嘅相處模式

黎昕淇悄悄打量喺佢眼前嘅鄭洛苡，鄭洛苡嘅氣質同鍾安而嘅好接近，兩人嘅氣場好相近

「一睇就感覺到氣質嘅相近⋯」黎昕淇嘅目光落喺鍾安而身上，「唔知佢地會唔會一齊，喺畢業之前⋯」

望住一直向上縮嘅對話，黎昕淇望咗一眼，宋楚妍一大清早就好精神一樣，每朝早都可以咁精神都唔係一件容易嘅事

「你番到學校啦？」黎昕淇回覆問道





等咗幾秘之後對話框彈咗一張相出嚟，宋楚妍喺番去學校嘅路上，隔離好明顯仲有一個比宋楚妍高嘅人，但冇影到樣，只要一邊衫袖

「你同蘇序然一齊？」黎昕淇望咗一眼，基本上都估到八、九成

「咁你都估到？我已經冇影樣」宋楚妍喺最後加咗三個笑喊嘅emoji

「呢個身高差唔會係江清懿」黎昕淇如實回答

江清懿比蘇序然高，宋楚妍基本上除咗佢地兩人，唔會同其他男仔一齊番學，所以呢個身高差嚟講，只可能係蘇序然





而且以黎昕淇對大家嘅了解嚟講，蘇序然呢個時間番緊學校都好合理，江清懿唔會咁早，再加上蘇序然同宋楚妍好似比較熟絡

「雖然同邊個熟啲冇咩大關係⋯」黎昕淇喺心裏補充一句

⋯

早會之後，Miss Chung召集咗學生會內閣嘅成員，大概講一講嚟緊嘅活動安排

「Miss Chung呢？」張詩楠探頭望咗一眼

「好似上咗去拎嘢。」鍾樂時指一指上方示意

「咁我去個廁所都唔過份掛⋯？」張詩楠邊望向小食部入口，邊向後退

「唔過份，遲咗嘅話轉頭講番比你聽講咗咩。」鍾樂時比咗個Okay手勢





「好！我速去速回！」張詩楠轉身就跑

鍾樂時抬頭望抹緊眼鏡嘅鍾安而，然後轉頭望向喺佢隔離嘅黎昕淇同陸修然

黎昕淇嘅餘光見到鍾樂時向佢嘅方向探頭，於是轉頭望向鍾樂時

「你地今日企得咁開嘅？」鍾樂時嘅目光落喺黎昕淇同陸修然之間嘅距離示意

「唔係呀，同平時都差唔多。」黎昕淇望一眼佢同陸修然嘅距離後道

鍾樂時笑而不語，黎昕淇望住佢意味深長嘅笑容無奈笑一笑，只係一個企位都可以比佢有所聯想

黎昕淇無意咁望向陸修然，陸修然以為黎昕淇有咩要同佢講，習慣性將腰彎低少許準備聽黎昕淇講咩





「做咩？」黎昕淇反而有啲困惑咁皺一下眉頭

「你唔係要講嘢？」陸修然都有啲困惑咁反問道

「我冇嘢要講。」黎昕淇搖頭，悄然伸手輕推咗陸修然嘅手踭一下

喺一旁嘅鍾樂時一直忍唔住望佢地，陸修然嘅餘光早就察覺到鍾樂時期待又好奇嘅目光

「期待緊啲咩⋯？呢度係學校⋯」陸修然喺心裏無奈道，嘴角微微上揚笑咗一笑

「人地只可以估，但我已經知道，感覺好爽⋯！」鍾樂時喺心裏吶喊，「期待佢地公開嗰日嚟到～」

Miss Chung講完嚟緊嘅活動大概之後，大家都解散番課室，咁啱黎昕淇同陸修然因為企嘅位置嘅關係所以行喺最後

就算行喺最後，兩人都明顯咁保持距離，最近連一齊行都會覺得唔太合適，只要一齊出現就會變成引人矚目同幻想嘅狀態





附近總有人討論佢地，好輕易就會聽到其他人竊竊私語嘅討論聲，以前有時聽到都唔會太在意，反而宜家就變得唔一樣

「嗯？」陸修然見黎昕淇忽然抬起頭望住自己

「冇咩。」黎昕淇默默咁收回視線，低聲道：「放學見。」

黎昕淇講完就加快步伐先行一步，兩人之間嘅距離慢慢拉開，陸修然望住黎昕淇行喺前面，喺心裏嘆氣

冇人先開口講清楚，但覺得對方會明白所以冇刻意提起，有時都會諗到底係信任定係默契

「你地分開行？」鍾安而擰轉頭望陸修然，喺原地等埋陸修然後問道

「你又湊熱鬧？」陸修然行到鍾安而身旁，對於鍾安而嘅提問冇太大意外





「關心，唔算湊熱鬧。」鍾安而打開手扶住眼鏡嘅兩邊調整一下眼鏡位置，「點知你地會收得咁埋，唔係唔小心見到都唔會知。」

「佢唔想比人講嘛。」陸修然無奈聳肩，「都慣咗，唔係第一日保持距離。」

「一齊咗咁耐都冇咩所謂啦。」鍾安而道

「嗯，所以就順其自然。」陸修然冇刻意否認鍾安而嘅講法，佢同黎昕淇嘅關係的確已經係隱藏咗好耐嘅事




IG Link: https://www.instagram.com/nd_cotttoncandy/?hl=zh-tw