【愛情】如地下情一樣嘅癮，係我對你嘅定義: 93.
「唔好扮啦，知道晒啦～」江清懿輕嘆一口氣，「你為咗佢都唔要朋友啦？」
「我邊有。」黎昕淇嘅臉上寫住無話可說四個大字一樣，沒好氣咁問江清懿
「你冇同宋楚妍講呀？」江清懿冇繼續啱啱嘅話題，「我知、鍾安而知、鍾樂時都知，但宋楚妍唔知？你唔同佢講唔怕佢嬲？」
「唔係唔講，係未有機會同佢講。」黎昕淇無奈道，「搵到啱嘅時機會同佢講⋯」
「拍拖咁大件事都唔同我地講呀～仲以為你真係冇興趣添～」江清懿笑道
「冇呀⋯」黎昕淇嘅回答冇確實嘅指向性，佢都唔知自己係答緊邊一個問題
放學嘅時候，黎昕淇同宋楚妍兩個人一齊行去搭車，黎昕淇一直支支吾吾，欲言又止
「楚妍—」「呀⋯好煩呀蘇序然⋯！」
黎昕淇啱啱開口嘅時候，望住手機嘅宋楚妍忽然抱怨起嚟，黎昕淇頓時愣一愣
「今次佢搵你做咩？」黎昕淇順住宋楚妍嘅說話問道
「叫我番去做咗數簿影比佢，佢懶得做⋯」宋楚妍反咗個白眼，「你啱啱想講咩？」
「唔⋯唔記得想講咩⋯」黎昕淇遲疑咁搖搖頭，心入面總覺得一直隱瞞落去令佢更不安，「我記得再同你講⋯」
「好呀～」宋楚妍冇太在意咁笑一笑
「你覺得會長⋯點呀⋯？」黎昕淇微微一笑後以小心翼翼嘅語氣問道
「你居然會問我覺得會長點？係唔係緋聞多咗，開始覺得會長真係幾好啦～」宋楚妍即刻瞇起眼揶揄黎昕淇
「你答咗我先啦⋯」黎昕淇無奈反咗個白眼
「我覺得⋯肯定嘅係會長好完美，拍一次拖就算冇行到最後都夠我開心一世嗰種；會長就係名好聽、人好睇、性格冇得彈，即係完美。」宋楚妍對陸修然嘅評價高到黎昕淇懷疑佢係唔係比人收賣咗，「明唔明？做一日男友都會開心到瞓覺都識笑嗰種完美。」
「係咩⋯」黎昕淇嘅笑容都有啲勉強，心入面反咗個大大嘅白眼表達佢嘅無奈，忽然間覺得膊頭有啲痛，「人總有唔完美嘅地方嘅，可能佢⋯佔有慾好強之類呢～」
「我覺得佔有慾都係一種愛嘅表現呀～」宋楚妍稍微認真咁思考一下，「但要係喺想要完全佔有嘅同時，都會尊重你嘅想法嗰種，先算係愛嘅表現呀～」
黎昕淇沉默不語，心入面認同宋楚妍嘅講法，有時宋楚妍講嘅嘢的確有道
「不過會長點睇都係完美，佢唔會將唔完美嘅一面比我地睇，始終都有形象喺度嘛～」宋楚妍又道，「除非喺佢好親近嘅人啦，知道對方唔會因為佢嘅唔完美而走，如果唔係都應該睇唔到佢嘅唔完美。」
「呢個好正常呀⋯」黎昕淇微微點頭
黎昕淇番到屋企樓下，推門入到大堂見到陸修然就係轉彎嘅地方等佢
兩人行入𨋢，陸修然冇咗平時喺學校嘅狀態，有啲頹咁靠住後面嘅牆企，黎昕淇將佢打量一下、輕笑一聲
「你完全冇咗平時作為會長嘅完美⋯」黎昕淇望住鏡面嘅𨋢門道
「所以呢，你洗唔洗迴避下先？」陸修然將頭側向黎昕淇，「免得你見到唔完美嘅我。」
「我又冇所謂，你完唔完美我都習慣。」黎昕淇平淡咁講咗一句
「所以，我喺你面前洗咩咁完美⋯」陸修然伸手將黎昕淇拉到懷中輕輕抱住
「隨便你啦⋯」黎昕淇抬頭望住陸修然緩緩眨一眨眼，手伸入陸修然嘅衫袖，摸到佢留低嘅咬痕
「叮！」𨋢門打開，黎昕淇拉住陸修然行出𨋢，拎出鎖匙企到屋企門前開門
門一打開，依舊有黑白雙貓迎接，黎昕淇行入房放低書包，見到陸修然仍然企喺玄關同芝麻、牛奶玩緊
陸修然行去梳化，兩隻貓就跟住佢行到梳化，跳到梳化上面，前腳踩喺陸修然身上
「成日見都仲咁好奇呀⋯」黎昕淇無奈一笑，行入廚房拎出貓糧倒到佢地嘅碗中
黑白貓聽到放飯嘅聲音，即刻踩住小碎步飛奔到飯碗前坐低開餐
「顧住放飯比貓。」黎昕淇一坐低，陸修然就不悅咁抱怨一句
「顧住同貓玩。」黎昕淇不忿反駁道，沉默一秒後，黎昕淇緩緩開口：「江清懿知道咗，佢話係副會長同樂時講比佢知⋯」
「係咩？」陸修然收起不悅，帶住淡淡嘅笑容
「偷笑⋯開心啦？」黎昕淇抿住唇，坐喺旁邊觀察呢個人嘅表情
「冇咩特別。」陸修然收起笑容聳肩，收起佢嘅微表情若無其事咁嘆一口氣，「鍾安而知道，連帶鍾樂時知都唔出奇。」
黎昕淇拎起裝住貓糧嘅盒起身行去廚房放番好，閂上櫃門一轉身，陸修然就出現喺佢眼前
「你做咩又喺我面前？」黎昕淇一見到佢就忍唔住笑，伸手捧住佢嘅臉頰，「行開一下都唔可以啦？」
「可以，比咗兩秒你。」陸修然認真咁點一點頭，「喺學校已經分開咗好耐。」
黎昕淇發現原來呢個人唔止佔有慾強，仲好痴身，分開一陣都唔可以
「兩秒？多謝喎⋯」黎昕淇無奈道，「多謝你咁有耐性。」
「唔係個個都值得等兩秒。」陸修然攬住黎昕淇行出廚房，一踏出廚房直接就將佢抱起
「你唔好跌我落嚟。」黎昕淇冇過份擔心，只係順口提醒一句，雙手冇用力，只係輕搭住喺陸修然嘅膊頭上
「喵～」牛奶見兩人行出嚟，即刻跑到陸修然嘅身邊跟住行
陸修然將黎昕淇放低喺梳化上，黎昕淇伸手拎起放喺旁邊嘅手機，陸修然稍微瞄咗一眼，見到係宋楚妍嘅message⋯
⋯
「請勿靠近車門—」地鐵嘅車門喺一連串嘅提示聲後閂門
黎昕淇嘅餘光見到企喺佢面前嘅人同佢著住同一間學校嘅校服，自然抬起望一眼
「早晨⋯」鄭洛苡嘅微笑略帶點尷尬
「早晨。」黎昕淇微微點頭
兩人對望一眼，但又唔知道要講咩好，雖然有一齊出去玩過，但實際上單獨一齊嘅時候又會唔知講咩好
列車再次穿出隧道駛入月台，車門打開嘅時候，鍾安而剛好喺呢一個車門位上車
IG Link: https://www.instagram.com/nd_cotttoncandy/?hl=zh-tw