【愛情】如地下情一樣嘅癮，係我對你嘅定義: 91.
鍾樂時補完課番到屋企，一打開門後見到冇人嘅客廳，除鞋之後就直接走向江清懿嘅睡房
「叩叩—」「係。」
聽到房間嘅主人回應後，鍾樂時先推門入去
「鎖匙還番比你⋯」鍾樂時行到江清懿身旁，將鎖匙放喺江清懿嘅枱上
「唔該。」江清懿拎起鎖匙，走身行到書包前，將鎖匙放番喺書包入面
「唔洗⋯」鍾樂時輕嘆一口氣
「做咩嘆氣？」江清懿發現鍾樂時嘅悶悶不樂，平時嘅佢一番嚟，全家都知佢番嚟一樣，「做咩悶悶不樂？」
「小測唔識做⋯」鍾樂時雙手捉住書包帶，微微嘟起嘴低聲道
「下次溫書咪識做，小測啫，考試識做咪得。」江清懿喺番到電腦枱前坐低嘅時候經過鍾樂時身旁，伸手輕拍佢嘅後尾枕當作鼓勵
「嗯⋯」鍾樂時伸手摸一摸被輕拍過嘅位置
鍾樂時小心翼翼抬眼望江清懿，靈機一動跑到江清懿身旁，從旁攬住江清懿搖嚟搖去：「點算呀！小測都搞唔掂嘅話考試點算呀～點算呀～」
「考試再溫囉⋯」江清懿無奈咁將鍾樂時嘅手拎開
「你係唔係抱下都唔得？」鍾樂時扁起嘴氣沖沖咁問道
「咁大個人唔好抱嚟抱去啦⋯」江清懿嫌棄道，「要抱就去抱鍾安而，再唔係就去搵個男朋友抱到夠。」
「搵到帶比你過目下呀～」鍾樂時瞬間唔高興，鬥氣般道
「好呀，我要求唔太高。」江清懿冇察覺到鍾樂時嘅情緒，以為佢係講笑就附和佢
「你有冇中意邊個？」鍾樂時好奇咁問，「分享下？我唔會講出去㗎～幫你審視下～」
「冇囉⋯」江清懿搖搖頭
「我唔會嫌棄你㗎～你講啦～」鍾樂時一直氹江清懿講，咬咬牙之後鼓起勇氣道：「就算你中意我，我都唔會話比其他人知㗎⋯！」
「知唔知自己講緊咩？」江清懿輕皺起眉頭，「我同你係兄妹好唔好？我中意黎昕都唔會中意你啦係唔係⋯」
「唔得！黎昕係會長㗎！」鍾樂時衝口而出講咗出嚟，意識到自己講咗唔應該講嘅秘密，瞬間提手掩住自己嘅嘴
「你又講埋一份⋯」江清懿本來以為鍾樂時都係對緋聞感興趣嘅人，但望向佢嘅時候只見佢一臉慌張，「認真㗎？佢地拍緊拖？」
「唔係呀唔係呀⋯！我亂講㗎咋⋯！」「你真係好唔識講大話⋯」
鍾樂時嘅反應比江清懿完全睇穿，江清懿恍然大悟，難怪每次佢地幾個講起最近嘅緋聞嘅時候，黎昕淇都冇咩大反應，無論點講關於陸修然嘅事都好，黎昕淇都冇咩大反應
「原來係咁～」江清懿得知呢個事情真相後點點頭，伸手拉咗鍾樂時嘅手腕一下，「一齊咗好耐㗎啦？你幾時知㗎？」
「我唔知佢地實際一齊咗幾耐啦⋯我上兩個月先知佢地係拍緊拖⋯」鍾樂時見江清懿咁想知，猶疑不決咁開口，「鍾安而都知佢地拍緊拖。」
「得我唔知！？」江清懿震驚道
「我都係咁啱偷聽到先知，實際一齊咗幾耐，我就唔知啦～」鍾樂時聳肩，「所以，你離黎昕遠啲！會長會唔高興！」
「我同黎昕就係普通朋友，我地只係番工嘅同事⋯」江清懿解釋道，「你仲知啲咩？快啲講。」
「冇啦！你地唔係朋友咩？你去問黎昕會唔會直接啲？」鍾樂時氣沖沖轉身行到房門口，喺行出去之前回頭一望：「你問到嘅話記得話埋比我知！我都想知～」
江清懿望住房門閂上，感覺鍾樂時係打算好好利用自己去問黎昕淇，江清懿睇穿佢嘅小心思，當然唔會比佢得逞
「原來拍緊拖～但宋楚妍都好似唔知咁嘅⋯唔通佢冇同宋楚妍講？」江清懿靠住櫈背默默沉思，「連好朋友都唔講咁保密⋯？」
江清懿忽然間都對緋聞有啲感興趣，本來以為佢只係對陸修然唔感興趣，但原來喺「不感興趣」嘅背後隱藏咗一件令人目瞪口呆嘅事
夜晚
食完飯之後鍾安而喺廚房洗碗，今日係輪到佢洗碗嘅日子，江清懿攝手攝腳行入廚房，坐喺梳化嘅鍾樂時離遠已經瞄到江清懿偷偷摸摸咁行入廚房
「鍾安而！」江清懿一手搭住鍾安而，好似兩人好熟絡一樣搭住膊頭，鍾安而有啲疑惑，「黎昕同陸修然係咪拍緊拖？」
「你問我做咩⋯？」鍾安而唔似鍾樂時比人套兩句說講晒出嚟，「你唔去問黎昕？」
「你個妹今日番嚟唔小心爆咗比我聽啦～」江清懿沾沾自喜一樣笑道
「唔係我爆㗎！係你自己估到！」鍾樂時唔知幾時企咗喺廚房門口，望住江清懿入嚟就知佢不懷好意
「你行路點解冇聲⋯？」江清懿比佢嚇咗一跳，輕皺起眉頭
「我冇講比你知，係你估到咋～」鍾樂時再次強調道，行到鍾安而嘅另一邊，兩人成功咁將鍾安而夾喺中間，「哥哥你有冇知道其他嘢？你成日都喺會室同佢地一齊。」
「係囉！你成日喺會室，一定仲知啲咩嘅～」江清懿附和道，睇起嚟鍾安而知道嘅應該知道更多內情先係
「我都冇知好多⋯」鍾安而怕咗一唱一和嘅兩人，拎起抹布邊抹碗碟邊道：「只係有次咁啱入會室見到佢地拖住手，縮唔切。」
「真係㗎！？你冇同我講嘅？」鍾樂時驚訝一秒後就不滿起嚟，「仲有呢仲有呢？」
「嗰次一齊食飯⋯」鍾安而指一指江清懿，「你同宋楚妍講嘢，黎昕坐中間，可能靠得太近掛，會長唔高興，黎昕即刻就縮開。」
「哥哥你都知道太多啦掛～」鍾樂時對於自己錯過咗咁多精彩時刻感到惋惜
「咁應該都一齊咗好一段日子？」江清懿猜測道，「佢地都好忍得，可以忍咁耐⋯」
「呢個就真係難估，佢地喺我地面前相處都冇咩特別，普通到冇得再普通嗰種⋯」鍾樂時嘟起嘴，佢都試過推測，但太難估，「哥哥，你識咗女朋友嘅話會唔會同其他人講？」
「邊個呀？一齊咗啦？同鄭洛苡？」江清懿訝異咁望住鍾安而
IG Link: https://www.instagram.com/nd_cotttoncandy/?hl=zh-tw