【愛情】如地下情一樣嘅癮，係我對你嘅定義: 90.
黎昕淇拎住一個小紙袋到陸修然嘅家門前，正要伸手㩒門鐘嘅時候，佢嘅手垂低，拎起手機打電話比陸修然
十秒內，陸修然行到玄關開門，黎昕淇嘅嘴角微微撐起，攬住裝住髮圈嘅紙袋一臉乖巧咁企喺門前，不過眼見陸修然開咗門比佢，佢行入屋，企喺鞋櫃前將皮鞋除落嚟
黎昕淇喺陸修然面前冇太多嘅顧忌，直接行入陸修然嘅睡房、坐喺佢嘅電腦櫈上面，打開紙袋再欣賞下佢新買番嚟嘅髮圈
「新買啲咩？髮圈？」陸修然坐喺床邊，隨手拎起一個米色嘅大腸髮圈，「買咁多個？」
「呢幾個出街戴⋯」黎昕淇拎起大腸髮圈，然後又拎起一套五條嘅髮圈，「呢個番學戴，成日用用下又唔見一條，用耐咗又唔夠實，所以買過新嘅。」
「你啲髮圈有腳會走？」陸修然輕笑一聲
「無聊。」黎昕淇反咗個白眼，將枱上嘅髮圈都收好喺紙袋中
黎昕淇嘅手機剛好彈出一個新通知，順手拎起望一眼之後又忍唔住反個白眼，伸出另一隻手就喺陸修然嘅手臂上搣一下
「嘶！」陸修然比突如其楚嘅痛嚇到即刻縮手，都未搞得清狀況就比人用力搣咗一下，「做咩搣我呀？」
「會長你可唔可以唔好咁受人注目？」黎昕淇不禁嘆氣，將手機遞比陸修然睇，「日日都有人問，問完又唔信⋯搞到平時好平常咁企埋一齊都周身唔自在⋯」
有比較熟嘅同學回覆咗黎昕淇po嘅story，又係同一個問題，黎昕淇答到都唔太想答
「同你行埋一齊都好大壓力呀會長。」黎昕淇將手機鎖屏，佢已經唔想覆呢啲問題
「人太完美，冇辦法。」陸修然聳肩，呢種讚自己嘅方法令黎昕淇直接搖頭，伸手又搣咗陸修然一下，「不過對我嘅稱讚係事實。」
「不過配我就唔太好咁解⋯？」陸修然捉住黎昕淇嘅手腕輕力拉咗一下示意
「咁唔會所有人都覺得我地襯呀。」黎昕淇起身同時，陸修然坐入咗啲，騰出空位比黎昕淇，「總有人覺得唔可以接受。」
「嗯。」陸修然嘅笑意從雙眼中逐漸滲出嚟，雙手抱住坐喺佢懷中嘅黎昕淇
黎昕淇微微側身坐喺陸修然嘅雙腿間，背靠住陸修然嘅手臂同膝頭，抬頭就見到陸修然明顯嘅笑意
「我嘅意思係，假設性嚟講。」黎昕淇即時後補一句，「唔係以真實情況而言⋯」
「好。」陸修然冇反駁，只係微微點頭，伸手將黎昕淇嘅髮圈拉落嚟
「睇下，成日咁樣拉落嚟，我啲髮圈唔鬆就假啦⋯」黎昕淇將視線轉移到髮圈上，伸手拎起放喺枱上嘅紙袋，拆開一套五個嘅髮圈，「多謝你幫我快啲換新髮圈⋯」
黎昕淇將已經拉鬆咗嘅舊髮圈隨手就放入紙袋中，拎咗一個新嘅髮圈打算將頭髮綁番好
「你陣間都番去啦，仲綁嚟做咩？」陸修然提出佢嘅疑問
「唔⋯都係。」黎昕淇準備捉頭髮嘅手將頭髮隨意梳兩下就垂低，拎住新嘅髮圈喺手中把玩
陸修然垂眸，目光落喺黎昕淇嘅臉上，抱住佢嘅雙臂默默收窄範圍，黎昕淇抬頭偷瞄一眼，提手就搣佢一下
「嘶！」陸修然輕皺一下眉頭，「你都太大力啦掛⋯」
「冇呀，我好細力。」黎昕淇忍住笑意搖搖頭，「今次我搣嘅位置咁高，唔怕比人見到。」
「多謝你嘅細心，麻煩你下次細力啲⋯」陸修然雖然無奈，但如果黎昕淇係要搣佢嘅話，佢都唔會拒絕
黎昕淇抬頭定睛望咗一秒，喺佢嘅臉頰輕吻一下，隨即當冇事發生一樣靠喺陸修然嘅懷中
宋楚妍send message比黎昕淇，黎昕淇伸手拎起放喺枱上嘅手機後安然咁坐喺陸修然嘅懷中覆message
呢個角度，陸修然都可以清楚咁睇到佢地嘅對話內容，宋楚妍怕黎昕淇有中意嘅人唔同佢講一樣一直強調要話佢知
「比佢知你一直冇講真話嘅話係唔係要絕交？」陸修然喺黎昕淇嘅臉頰上輕吻一下後問道
「唔會嘅⋯」黎昕淇遲疑咁回答，連打字嘅動作都有緩衝，「佢會體諒我嘅，而且佢咁外協，佢會明白我。」
盯住佢嘅臉時間有啲長，陸修然微微彎腰低頭忍唔住想要索吻，坐喺佢懷中嘅人身上有陣陣香味，更加令佢喉核忍唔住滾動
陸修然握住黎昕淇拎住髮圈嘅手，黎昕淇順手咁就將髮圈套到陸修然嘅手中
喺分開喘息嘅時候，本來仍然帶住水潤感嘅唇連同喉嚨瞬間乾燥起嚟，呢種感覺總會令慾求不滿嘅感覺從心底升起
「幫你keep一個？」陸修然望住套喺手腕嘅髮圈，若有所思後低聲問道
「隨你中意啦⋯」黎昕淇深呼吸，左手搭喺陸修然嘅手上，食指勾起髮圈，「你想keep嘅話就⋯keep啦，幫你掛喺小白兔嗰度？」
「唔洗⋯」陸修然將佢抱得更緊，怕佢會輕易逃脫一樣牢牢固定，「戴住先，我陣間先掛上去⋯」
「識咗女朋友嘅話還番比我⋯」黎昕淇抿唇，低聲提醒道，「陣間比人地睇到，唔同你一齊唔好賴我⋯」
「唔會⋯」陸修然搖搖頭，語氣係對其他人唔會有嘅溫柔，「上次去買小白兔嘅時候，嗰個店員話你係我女朋友嘅時候，你唔係冇否認？」
「上次、上次唔計⋯！你就想⋯！」黎昕淇覺得自己好似跌入咗陸修然嘅圈套一樣，一手就搣喺陸修然嘅手臂上，「上次係因為我專心揀緊公仔⋯」
「宜家先否認會唔會太遲？」陸修然無奈問道
黎昕淇笑而不語，只係抬頭望住陸修然，伸手偷捏佢嘅臉頰同時輕抿唇，但佢冇察覺到陸修然嘅喉核上下滾動咗一下
陸修然忽然一下子抱起黎昕淇，本來喺佢懷中嘅人直接坐喺佢大脾上面比佢牢固咁抱喺懷中
「呀⋯！」黎昕淇不禁發出一聲，佢嘅雙手乖巧咁搭喺陸修然嘅膊頭上
呢個坐姿令黎昕淇嘅臉頰瞬間泛起紅霞，呢個姿勢好容易令人想入非非⋯
「想點呀？」黎昕淇擺出高傲嘅表情掩飾內心嘅羞澀，強裝鎮定，「上次唔計數㗎⋯！」
「邊次先計數？」陸修然壓低聲線，嘴角帶住一絲笑意
「次次都唔計！」黎昕淇輕哼一聲，又喺陸修然嘅手臂上搣一下，「唔會比你咁易得逞！」
IG Link: https://www.instagram.com/nd_cotttoncandy/?hl=zh-tw