【愛情】如地下情一樣嘅癮，係我對你嘅定義: 76. 咖啡
翌日朝早
「喺門口。」陸修然拎起手機send咗個message比黎昕淇
一早換好校服坐喺梳化睇緊新聞嘅黎昕淇，連忙起身行到門前開門，陸修然手上拎住老麥嘅早餐
「早晨。」黎昕淇伸手接過陸修然手上嘅膠袋，直接行到茶几前放低
「早⋯」陸修然嘅聲線係明顯嘅疲倦，佢將皮鞋除落嚟放喺鞋櫃前，書包先放喺餐枱前嘅櫈上
黎昕淇今日心情似乎好唔錯，將早餐從膠袋中拎出嚟嘅時候仲哼住歌
「你好眼瞓？」黎昕淇望咗坐低喺佢隔離嘅陸修然一眼
「你要唔要睇下宜家係幾點？宜家係朝早嘅6點半，我6點已經起咗身。」陸修然深呼吸令自己精神啲
琴晚陸修然喺門口著鞋準備走嘅時候，黎昕淇忽然話想食老麥早餐，然後兩人就約好咗朝早食完早餐先番學
「唔嬲啦，食嘢啦。」黎昕淇拎起匙羹塞到陸修然嘅手中
陸修然坐好起嚟，黎昕淇已經先一步食佢嘅早餐，陸修然望住心情愉悅嘅黎昕淇喺心入面嘆氣
「算啦算啦，佢食得開心就得啦⋯」陸修然拎起匙羹食佢嘅通心粉
雖然一大清早要起身去買早餐好攰，但至少見到黎昕淇心情愉悅開心嘅時候，陸修然都會覺得值得佢早起去買早餐
「食完可以再Hea一陣先出門口番學。」黎昕淇望住新聞報道中左上角嘅時間
先一步食完早餐嘅陸修然早就將佢嘅嘢放番入膠袋，等黎昕淇都食完之後先綁好膠袋，打算陣間出門口先一次過掉
「飽啦？」「飽啦。」
陸修然拎紙巾抹嘴，黎昕淇靠住櫈背頹坐喺梳化上；陸修然坐喺黎昕淇身旁嘅位置，黎昕淇自然就靠住陸修然坐，手臂貼住陸修然嘅手臂
「你眼瞓就瞓多陣先啦，陣間出門口叫醒你。」黎昕淇眼望手機耳聽新聞，開口順便同陸修然講一聲
「唔眼瞓，已經醒晒。」陸修然瞄一眼黎昕淇嘅手機螢幕，「話說我今日為咗你份早餐特登早起身咁多，係唔係應該有咩回禮？」
「呀⋯？」黎昕淇撥緊螢幕嘅手指都一頓，佢坐好望向陸修然，佢心入面已經大概估到陸修然要嘅回禮係咩，「宜家係⋯朝早6點45分⋯」
「有關係？朝早、晏晝定夜晚。」陸修然嘅手已經放喺黎昕淇嘅手腕上
黎昕淇耳根一紅，輕輕握拳，側身向住陸修然坐同時一臉認真咁講道：「下不為例呀。」
「嗯。」陸修然望住佢嘅認真不禁一笑，喺黎昕淇主動湊近之前，佢已經先一步迎上去
黎昕淇嘅手慣性一樣捉住陸修然嘅校呔領結朝自己拉，佢要陸修然彎腰遷就佢
因為將陸修然向自己方向拉近嘅關係，黎昕淇嘅上身微微向後傾，但下一秒黎昕淇就逐漸將佢嘅重心移到陸修然身上
朝早嘅吻似乎令人更加容易清醒，鼻尖前飄過濃郁嘅咖啡味，黎昕淇輕皺起眉頭將陸修然推開
「有咖啡味。」黎昕淇唔太中意咖啡嘅味道，因為咖啡中夾雜住苦澀嘅味道
「啱啱飲咗咖啡。」陸修然講道
黎昕淇嘅雙手搭喺陸修然嘅腰上，將頭靠喺陸修然嘅膊頭上，鼻尖喺佢嘅衫領上蹭一蹭
「佢身上嘅味道冇變⋯」安心嘅感覺喺黎昕淇嘅心底冒出，比起咖啡嘅味道，黎昕淇覺得佢本來嘅氣味更好聞
陸修然挺直腰坐好，將身稍微轉側向住黎昕淇嘅方向，雙手輕抱住黎昕淇
喺垂低頭嘅時候可以聞到黎昕淇頭髮上嘅洗髮水香味，成個人都乾乾淨淨一樣
黎昕淇嘅頭一郁，鼻尖不經意碰到陸修然嘅頸，噴灑嘅氣息令陸修然不禁握起拳頭，感覺到佢嘅鼻息時有種痕癢嘅感覺，但真正有痕癢感嘅係喺心上
黎昕淇看似不經意咁轉頭，微微抬頭下巴時唇輕碰喺陸修然嘅頸上，黎昕淇嘅視線落喺陸修然嘅喉核上，望住佢嘅喉核上下一動
陸修然瞄咗黎昕淇一眼，都唔知佢係有心定無意，不過直覺認為佢似係有心；佢抱住黎昕淇嘅雙臂間嘅範圍收窄，黎昕淇故意一樣喺佢頸上又蹭一蹭
黎昕淇雙腳曲起放到梳化上，雙腳放喺陸修然身後同背靠之間嘅空隙，本來搭喺陸修然腰間嘅雙手放到陸修然嘅膊頭上輕輕交搭住
陸修然嘅視線由電視移到黎昕淇身上，佢將自己嘅重心逐步放到黎昕淇身上微微前傾，黎昕淇比陸修然矮而且輕，無法完成承受陸修然嘅重量
黎昕淇向後瞓低喺梳化上，陸修然嘅右手放喺黎昕淇嘅後尾枕上，佢感覺到佢完全冇用力支撐住，自己一向佢逼近加壓，佢已經向後瞓低
「唔嫌我有咖啡味？」陸修然壓低聲線，用只有佢同黎昕淇之間咁近距離先聽到嘅聲量道
「少少啦。」黎昕淇輕哼一聲，雙手搭喺陸修然嘅膊頭上，看似有用力抵住實際上冇
陸修然湊近嘅時候，黎昕淇嘅心跳逐漸加速；瞓喺梳化上感受逐步逼近嘅壓力同體重，令人忍唔住緊張起嚟，姿勢睇起嚟有啲曖昧不明
鼻尖嘅輕碰後再到唇上嘅觸感，令人有種著迷嘅上癮感係正常嘅事⋯？腰間有種熾熱感，正確嚟講係成個人都有種熾熱感，明明屋企開住冷氣⋯
「嗯⋯！」黎昕淇不自覺喺喉嚨微微發聲，因為喺啱啱，陸修然喺佢嘅頸上輕吻一下，頓時有種電流通過而麻咗一下嘅感覺，「阿然—」
黎昕淇嘅說話講到嘴邊又被強制收回，雙手搭喺陸修然嘅膊頭上，將佢嘅校服都要捏皺
朝早嘅熱吻算係難得一見嘅放肆，比起晏晝嘅吻更加熱烈，令人更加上癮⋯
「好啦⋯就夠鐘出門口。」陸修然先一步停落嚟，雙手抱住黎昕淇嘅腰將佢一下子抱起坐好嘅梳化
「陸修然你睇下我個頭都亂晒啦！」黎昕淇摸一摸自己嘅頭髮，唔洗照鏡都知好亂
黎昕淇將髮圈解落嚟，放到陸修然嘅手上，一隻手捉住頭髮，另一隻手梳好頭髮，準備梳番一個整齊嘅低馬尾
陸修然望咗黎昕淇一眼，左手將黎昕淇攬到自己面前，喺黎昕淇嘅唇上輕吻一下；黎昕淇本來想伸手打陸修然一下，但雙手未騰空到出嚟，於是提起腳踢咗佢一下
「都已經唔係癮同解藥嘅問題⋯」陸修然喺心裏道，佢自己感覺到所有事都逐漸清晰起嚟，「阿昕應該⋯都一樣⋯」
IG Link: https://www.instagram.com/nd_cotttoncandy/?hl=zh-tw