【愛情】如地下情一樣嘅癮，係我對你嘅定義: 75. 隨心所欲

「呵～欠⋯」陸修然打咗個喊露，佢其實有啲眼瞓，但都係跟喺黎昕淇身後行入屋

一黑一白嘅兩條毛茸茸物體從一旁跑到玄關好奇一番，陸修然蹲低摸一摸貓，貓聽到黎昕淇開櫃拎貓糧添補嘅聲音就一枝箭跑走咗

「為食貓⋯」黎昕淇無奈嘆氣，然後拎起除咗落嚟嘅書包番房

推開虛掩住嘅房門就見到陸修然坐喺佢床邊，側身瞓低喺床上，但聽到黎昕淇入嚟之後就坐番起身

「你眼瞓啦？」黎昕淇拎起搭喺櫈上嘅居家服時問道





「少少。」陸修然仰起頭合埋眼，手放到校呔嘅領結上將校呔解鬆咗少許

「瞓陣。」黎昕淇講完就轉身行去廁所換衫

黎昕淇拎住換咗落嚟嘅校服番房，將校服掛番好喺衣架上面

陸修然背對住房門側身瞓喺黎昕淇嘅床上，佢瞓嘅位置好貼邊，入面騰空咗一大個位

「呵～欠⋯」黎昕淇將房門閂上，房內因為開咗冷氣而涼快，舒適嘅感覺令佢更加想瞓覺





合埋眼嘅陸修然忽然感覺到床尾嘅位置向下沉咗一下，一個重力落喺床上令貼住床褥嘅佢成個人都上下晃一晃

陸修然撐開眼，見到黎昕淇嘅手已經掀開內側嘅被，直接喺佢面前瞓入被窩

「你要瞓⋯？」陸修然用疲倦嘅聲線問道

「嗯⋯好眼瞓⋯」黎昕淇側身瞓低，用被蓋好自己，同陸修然中間嘅空位大到可以側身瞓多個人

黎昕淇嘅視線落喺眼前嘅陸修然身上，陸修然睇起嚟真係好攰，反應都慢咗半拍





黎昕淇自己都有啲蠢蠢欲動要瞓著嘅感覺，合上眼嘅瞬間就開始意識模糊

夜晚6點，陸修然先瞓醒睜開眼，雙眼睜開後第一樣映入眼簾嘅係黎昕淇嘅睡顏

晏晝嘅時候一定係太攰，成個人都冇太大反應，宜家瞓醒之後第一個作出反應嘅係心臟

「啱啱瞓嘅時候唔係分到超開⋯？」陸修然望住已經幾乎貼喺佢身前嘅黎昕淇，不過佢自己都移入咗

陸修然安靜咁定睛凝視，感覺到關係有變化嘅其實唔止黎昕淇一個，唔係表面上嘅關係變化，而係內裏一層嘅關係嘅變化，好似更加親近⋯

「唔⋯」黎昕淇輕皺一下眉頭，緩緩睜開眼抬起頭

「瞓醒啦？」陸修然見黎昕淇已經瞓醒就坐起身，拎起摺好放咗喺書枱上嘅校呔戴番好，「餓未？」

「嗯⋯」黎昕淇坐喺床上，雙手捧住臉頰仍然回緊神，「未餓⋯晏多少少先食嘢都唔遲⋯」





陸修然行去廁所，睡房內淨低黎昕淇一個人，稍微回想一下就覺得有啲熱嘅感覺；陸修然企喺洗手盆前面洗一洗面，令自己成個人都再清醒啲

「咔—」陸修然打開廁所門，一打開門陸修然下意識向後縮一下，黎昕淇突然出現喺門前

陸修然側一側身行出去，行到客廳抱起離遠已經望住佢嘅牛奶，牛奶乖乖咁喺陸修然懷中完全唔會掙扎

「我都話咗得番我同阿然嘅話，會變得不妙⋯」黎昕淇拎起面巾將臉上嘅水都抹走，「算啦，變就變啦⋯」

最近連黎昕淇自己都開始覺得就算佢同陸修然嘅關係唔再似以前一樣純粹都唔緊要，只要⋯

「喵～」牛奶抬起頭對陸修然嗲嗲咁叫一聲，毛茸茸嘅手喺陸修然嘅膊頭上拍咗一下

陸修然嘅餘光見到黎昕淇行出嚟，抱住牛奶一齊轉身望過去；黎昕淇行到陸修然面前，伸手輕掃牛奶嘅下巴





「做咩唔望我？壞貓貓⋯」黎昕淇撅一撅嘴，低聲抱怨道

陸修然將牛奶放低喺枱上，牛奶行到牆上嘅貓架下瞄準後輕盈跳到木架上，坐喺木架上高高在上咁望住佢地兩人

「陸修然你餓未？」黎昕淇微微側着頭

「未，你餓嘅話可以叫嘢食先。」陸修然回答

「我都未餓。」黎昕淇笑道一行入房打開書包，拎住今日未做完嘅功課放到枱上，拉開櫈坐低喺枱前做功課

兩人安靜咁各自做功課，黎昕淇專心致志咁喺功課簿上寫字，陸修然望住枱上嘅功課一啲都唔著急，因為冇一樣係聽日要交嘅功課

陸修然微微低頭，左手托住下巴，右手拎住原子筆，眼睛注視嘅地方卻唔係壓喺手下嘅功課，而係對面嘅黎昕淇

陸修然默默咁嘆一口氣，然後耷低頭提起筆打算先做功課；黎昕淇聽到嘆氣聲，寫字嘅手緩緩停低，抬頭望向陸修然，兩人嘅視線剛好擦肩而過





「如果宜家對上眼，又會唔知講咩好⋯」

兩人有默契咁抱住一樣嘅想法，選擇將專注力放喺功課上，其他嘅事先放喺一邊

⋯

江清懿食完飯坐喺梳化上睇手機，同鍾安而向坐一邊，鍾樂時喺廚房拎住雪糕行出嚟嘅時候自然咁揀坐喺中間

「啱啱食完飯冇幾耐又食雪糕。」江清懿瞄向鍾樂時手上嘅雪糕杯

「你食唔食呀？」鍾樂時咬住膠羹問道

「轉頭先。」江清懿嘅視線落番喺自己嘅手機上





鍾安而見鍾樂時坐低喺佢隔離，下意識將手機螢幕鎖上，佢都係等緊鄭洛苡覆佢，不過鍾樂時喺佢隔離顯得唔太安全

坐咗一陣之後，江清懿拎埋手機起身：「夠鐘食雪糕。」

「邊個話我啱啱食完飯冇幾耐又食雪糕？」鍾樂時一臉嫌棄道，視線跟住江清懿走

「我坐咗一陣啦嘛。」江清懿直接行到廚房打開冰箱

江清懿一閂埋雪櫃門，就比企喺門後嘅鍾樂時嚇咗一跳：「你又跟過嚟做咩？」

「八卦下嘛～」鍾樂時行到江清懿嘅面前，捉起佢拎住雪糕杯嘅手，「你食芒果味呀？食一啖食一啖。」

「一啖好啦。」江清懿無奈咁打開杯蓋，鍾樂時完全唔同佢客氣，食完一啖就高興咁跑番出廳坐喺鍾安而隔離

鍾安而嘅專注力喺手機上面，都冇注意到喺佢隔離想偷睇嘅鍾樂時，但可惜鍾安而嘅手機貼係防窺貼

「見到你偷笑啦鍾安而，同邊個傾計咁專心？」鍾樂時決定直接問鍾安而，「女仔呀？」

「你專心食雪糕啦。」鍾安而喺鄭洛苡覆佢之前將手機螢幕鎖上

「你話我聽先啦～」鍾樂時嘅興致一下起就勾起嚟，「邊個嚟㗎？至少話我知男定女呀～」

江清懿朝睡房行去嘅時候經過，啱啱好聽到兩人嘅對話，於是擰轉頭望咗一眼

「太可惜，一旦比鍾樂時發現嘅話，佢真係會纏到你講為止⋯」江清懿喺心中為鍾安而嘅不幸慨嘆




IG Link: https://www.instagram.com/nd_cotttoncandy/?hl=zh-tw